Pr 11 - Mam Ostuncalco Bible

1Inel tik'u'n Qman Dyos malb'il min tz'aqli

atzunju' malb'il tz'aqli b'a'n nela' toj twitz.

2Inel qch'ixaw tu'nju' nimjtib'il;

aye'tzu'n min nkynima'n kyib' ati kynab'l.

3Ẍaqlu'nqekye' xjal tz'aqliqe' tu'n kytzinunal;

aye'tzunkye' chalyol che b'o'ljel tu'nxju' kysb'ub'l.

4Mixti'xte' q'inumal tajb'en ajtoka toj xjel,

atzu'n tnik'alilti'j kkletela tu'n te kamik.

5Tzinjsa'nti'j tchwinlal b'a'n xjal tu'n tnik'alilti'j,

atzu'n b'inchal myab'a'n kb'eltz'aq tojxju' tb'inchb'en.

6Inche tzaqpetju' b'a'n xjal tu'n tnik'alilti'j,

atzunju' jamjoni'n kb'el jtz'o'nkye nche' jawmiltz'uj.

7Ajtkyimju' b'inchal myab'a'n,

majx nkunaju' q'ub'ab'l tk'u'j ex jatoka' twitz.

8Intklo'n Qman Dyos tnik'alti'j toju' yajb'il,

ex nkyej tq'o'nju' b'inchal myab'a'n te t-xel.

9Inche b'o'lj wnaq tu'n tyolju' b'inchal myab'a'n,

tu'ntzu'n tk'atzilju' tnik'alti'j nche' kleta'.

10Tzalajb'ilte' toju' nintnam ajkyjaw b'entju' xjal tnik'alkyi'j;

ex nxi'x che tzalaj ajkykyimu' b'inchal myab'a'n.

11Tu'nju' ate' xjal tnik'alkyi'j nch'iya' jun nintnam;

atzu'n kyu'n b'inchal myab'a'n noq nche xitun.

12Aju' min nximan nyolin ti'j tamiw;

atzunte' ati tnab'l nkub' tjpu'n ttzi.

13Aju' jk'ulyol tkyaqil nxi' t-ẍtaq'i'n;

atzu'nte' xjal ati tnab'l minti' nb'aj tyoli'n.

14In b'o'ljte' tnam qa myab'a'nju' kawil;

qatzun b'a'npun q'ol nab'l, tkyaqil nel b'a'n.

15Alkyete mataq'tib' yolil tu'n tetz tk'as jun najchaq xjal, kb'o'ljel;

altzunkyete min ntq'o'ntib' yolil ti'j juntl, mixti'te' tb'is.

16Majx nima'nte' qya ati tnab'l,

atzunju' ichan sak' nten tq'inumal.

17Alkyete' ntzaj laqj tk'u'j ti'j juntl tex najb'ena';

alkyetzunte txkup xjal ax nchjonte.

18Mixti'x noka'te' twi' tk'u'ju' b'inchal myab'a'n;

atzu'n tkanb'ab'lju' b'a'n xjal npax twitz.

19B'a'n qoxe'la' qama txi' qb'incha'n tnik'alilti'j,

qatzun maqo'x lpe ti'ju' myab'a'n, xi' qxi' tb'eyil kamik.

20Inche el ik'u'nkye' taq'wix kynab'l tu'n Qman Dyos,

aye'tzunju' b'a'n kychwinlal ntzalaj kyi'j.

21Ilti'j kb'el kychjo'nkye' b'inchal myab'a'n,

aye'tzunju' tnik'alkyi'j che kletel.

22Aju' qya xa'wanku'xi'x ka'yin ex mixti' tnab'l,

ikxi'xu' kse'n jun xmilq'ob'j q'anpwaq ti'j ttxa'n b'och.

23Tkyaqil tb'iskyk'u'ju' tnik'alkyi'j b'a'n nela';

Atzu'n tb'iskyk'u'ju' b'inchal myab'a'n noq tokel tx'ujilj.

24Aju' xjal noyin nim tu'me'l t-xel intk'mo'n;

aye'tzun ẍk'u'ẍqe' nche kub' b'ajxi'tl.

25Alkyete b'a'n tz'oyin, njaw b'ent;

alkyete' noyin, ikxte ntk'mo'n.

26Alkyete nkub' t-xk'a'yi'n twitz awal naqx aj tjawx ti'j, intzaj txko'n toj twi';

atzunju' minti' nkub' t-xk'a'yi'n ntzaj qani'n b'a'n tib'aj.

27Alkyete' nb'et b'a'n, ex nb'inchanjtz xtalb'il te;

alkyetzunte' myab'a'n tel, myab'a'n kxe'la'.

28Ate' q'uqli tk'u'j ti'j tq'inumal kb'el pulj kse'n tzqij t-xaq tze,

aye'tzu'n tnik'alkyi'j che tzajel puqli kse'n cha'x t-xaq tze.

29Alkyete' min nchex tka'yi'n toj tja, kb'el b'aj;

alkyete naq takli k'okyil tmajen teju' ati tnab'l.

30A tkanb'ab'lju' tnik'alti'j aju' tchwinqlal,

atzunju' kykanb'ab'lju' ti tnab'l aju' nk'u'jlanjtz kyu'n xjal.

31Qa ntk'mo'nju' tnik'alti'j chojb'il tzalu twitz tx'otx',

¡mitzunloyate' b'inchal myab'a'n exju' aj il!