1Lalun che kub' kyb'incha'ne' witzleb' ex tilb'ilal; lalun che jaw kyb'incha'ne' ab'j toj kytx'otx'e' xjanqe'wt ex ab'j tz'ib'a'n twitz; lalun che nimane' kywitz, qu'n ayinwe' Dyos Manb'aj.
2Kynimanku'ye' q'ij te ojlab'l; che nimanqe'ye' teju' njaye' xjan: ayinwe' Dyos Manb'aj.
3Qama che'x lpeye' kyi'ju' nkawb'ile' exqa mache japun nchaq'b'ile' kyu'ne', ex nche kyb'incha'ne',
4ktzajel nq'o'ne' jb'al tojxi'x tq'ijlalil, atzunju' tx'otx' exqe'ju' tze kkyq'a' kywitz;
5atitzun kytriytze' tzmaxi'j ajtul tq'ij lob'j ub'a, ex ati ub'a tzmaxi'j ajtul tq'ij awaj awal; kche wal wab'je' tzmaxi'j aj kynoje', ex kqeb'el kyk'u'je' toju' tx'otx'.
6B'a'n kche najala'ye' toju' tx'otx', ex lay che jaw sak'puje' ajkywtane', knkla'ju'ye' tx'otx' kye txkup xob'ajilqe'x ex te q'oj.
7Kche oqelju' kyajq'oje' kyeye', ex kche b'ajel kyu'ne' tu'n k'uẍtx'e'nb'il;
8Naqpe' kye jwe'kye' kche oqela' jo'naq, ex naq kye jo'naqkye' kche oqela' junmutx' lajk'al (10,000); che b'elkyb'yo'ne' kyajq'oje' tu'n k'uẍtx'e'nb'il.
9Kche ktzajel nka'yi'ne' tuk'i'l tzalajb'il, kchmetel kyb'aje' wu'ne', ex ktenb'elju' nyole' kyejni b'entti'j kyuk'i'le'.
10Kche wale' ti'ju' triy k'u'n te jnab'txi', expe' k'eletz kyiq'i'ne' lay b'aj tu'ntzun tokx kyk'u'nju'ye' ak'a'j triy.
11Kchin najalwe' kyxole', ex lay che elwik'o'ne';
12chin b'etele' kukxju' kyxole', ayine' chin okyel te Kydyose', aye'tzunkye' che okyel te ntaname'.
13Ayine' Dyos Manb'aj, inetz q'inkyeye' Ejipt tu'ntzun lalun che oktle' te majin k'a'yi'n kye aj Ejipt, ayine' ẍin toqinteju' yajb'il altoq kyib'aje', ex nche b'etle' mixti'tl kyxob'ele' wu'ne', chi Dyos.
Ab'tzib'l kyeju' myab'a'n che b'in(Dt 28.15-68)14Qatzun min ẍinx kyb'i'ne' exqa min xxikyb'incha'ne' tkyaqilju' nchaq'b'ile',
15qama che el kyik'o'ne' nkawb'ile' ex nnuk'b'ile', qa min ẍe kyk'ame', ex min xjapun junju' nchaq'b'ile' kyu'ne', mache el txalpujtzuntze' ti'ju' nyole' kyej b'entti'j kyuk'i'le',
16ex ikxwe' a knb'incha'ju'ye' kyi'je': ktzajel nq'o'ne' nxob'ele' kyib'aje' ex yab'il te kamik, kyaq, tyab' kywitze', ex che kb'el numje'; ex naqxgan kche awale' qu'n aye' kyajq'oje' kche walteju' twitz kyawale'.
17Kchin okyel miltz'uje' kyi'je', ex kb'elkyi'je' kyu'nju' kyajq'oje'; kb'elkyi'je' kyu'nju' inche ik'unkyeye', ex kche oqele' maskye mix a'lo' xla'jalkyeye'.
18Qatzun mixti'x xkyb'iye' tu'nju' lu, kb'el ntz'e'ysa'n wuq majtl kywitze', tu'n tpaju' kyile'.
19Kb'el nxitu'nju'ye' kypi'sale' toju' nimjtib'il, lay tzaj nq'o'ntle' jb'al kyib'aje' ex lay taq'tl tawalju' kytx'otx'e'.
20Naqxgan kche aq'unale', qu'n layx tzajte tx'otx' tawal, exqe'ju' tze lay kyaq'tl kywitz.
21Qatzun kukxju' kyu'ne' ex mixti'x inche b'ine' weye', kb'el ntz'e'ysa'n wuq majtl kywitze', kse'nxju' kyile'.
22Kche tzajel nq'o'ne' tojk'ul txkup xob'ajilqe'x kyib'aje' ex kche b'ajelju' kyk'wale' kyu'n, kche b'ajel kytzaqu'nju' kyalu'ne' ex kjel ko'pju' kyb'aje' ex lay che b'etl xjal toj kyb'eye'.
23Qatzun mixti'x inok toj kywi'ye' tu'nju' lu, qa kukx kyq'ojinju'ye' wi'je',
24ex ikxwe' chin q'ojile' kyi'je' ex kb'el ntz'e'ysa'n wuq majtl kywitze' tu'n tpaju' kyile'.
25Ktzajel nq'o'n jun q'oje' kyib'aje' tu'n tpaju' yol kyejni b'entti'j kyuky'i'le'; che xe'l oqe' ewal kyoj nimaqkytaname', ayintzunwe' che kxe'lnsma'ne' yab'il kyi'je' ex kb'elkyi'je' kyu'n kyajq'oje'.
26Ajtkub' nxitu'ne' kywaye' k'u'n kyu'ne', lajoj qya ktzq'ajsalte kywaye' toj jun chuj, kxel kysipa'n kyxole' ex lay che noje'.
27Qatzun min ẍin kyb'iye' tu'n ja'lu ex kukx kyq'ojine' wi'je',
28ikxwe' kchin q'ojile' kyi'je', kb'el ntz'e'ysa'n wuq majtl kywitze' tuk'i'l ntx'u'jile' tu'n tpaju' kyile'.
29Oktzun che kxel kych'yo'n kyk'waltze' ex kymyale'.
30Che kb'el nxitu'ne' kyja kywitzleb'e' ex che kb'el npa'ne' kyq'olb'eb'le' te sturak; che kb'el nch'uqb'a'ne' kyimniqe'tle' kyib'aju' kydyose' kyimniqe', kche elel wik'o'ne';
31che kb'el nxitu'ne' nimaqkytaname' ex che b'ajel nxitu'ne' kyja kywitzleb'e', lay chin tzalajtle' ti'ju' tk'ok'jal kyoyaje'.
32Kb'el nxitu'nju'ye' tx'otx', aye'tzu'n kyajq'oje' che ulel najal toj, kche lab'tel tu'n.
33Aye'tzunkye' che kxel nsputi'ne' kyxol nimaqtnam ex chin okyel lpeye' b'yolkyeye' tu'n k'uẍtx'e'nb'il; kjel chq'ajlajixu' kytx'otx'e', ex che kjel xitju' nimaqkytaname'.
34Kyjeltentzun tx'otx'tz toj nak'b'il tkyaqilju' tq'ijlalil kjel kytzaqpi'ne' ex ajkytene' toj kytx'otx' kyajq'o'je'; iktzun k'ojlala'ju' tu'n tokt-xelju' min sojlan kyu'ne'.
35K'ojlalju' tx'otx' toj tkyaqilju' tq'ijlalil makyej ten, te t-xelju' min sojlan kyu'ne' najli qe'toqe' twitz.
36Aye'tzunju' kywnaqile' mache kyej anq'in toj kytx'otx' kyajq'oje', k'okyel nq'o'ne' nin xob'el kyi'j, che kb'el oq naq tu'n tq'ojq'ojel jun t-xaq tze ajtkub' tz'aqi; che kb'el oq naku'xwitloj xla'ja'nqe' tu'n kyajq'oj tuk'i'l k'uẍtx'e'nb'il, kyjunalx che b'eltz'aqi ex mix a'lo'te xla'jalkye;
37kche jawil takpuj jun ti'j juntl naku'j inche oq toj q'oj, maskye mix a'lo' xla'jalkye; ¡mix-a'lo'x junkye' kweb'el kywitzju' kyajq'oje'!
38Che kb'el nb'yo'ne' kyxolu' nimaqtnam, ex che b'elb'ajsa'ne' kyu'n kyajq'oje' tojx kytx'otx'e';
39Aye'tzu'n mache kyej anq'in toj kytx'otx'u' kyajq'oje', che kyimel tu'ntpaj kyil; ¡che kyimel junx kyuky'i'lju' kyman tu'n tpajxju' kyil!
40Maskyetzun matz'el kynik'e' ti'ju' kyile' ex kyilju' kymane', tu'n min njapun nyole' kyu'ne' ex inche q'ojine' wi'je',
41ikxwe' kchin q'ojile' kyi'je' ex che kxel wiq'i'ne' toj kytx'otx'ju' kyajq'oje'; atzuntzu' kb'ela' me'sa'n kynab'le' tok kyi'j witzleb', kb'el kychjo'ntzun kyiltze'.
42Oktzun ktzajel nna'n nyoltze' kyej b'entti'j tuk'i'l Jakob', tuk'i'l Isaak, ex tuk'i'l Ab'raam, ex ktzajel nna'ne' tx'otx',
43ju' kjel kytzaqpi'ne' ex k'ojlal toju' tq'ijlalil lay che najane' twitz; kb'el kychjo'ntzun kyiltze', qu'n mache el kyik'o'ne' nnuk'b'ile' exqe' nkawb'ile'.
44Tu'npetzunju', maskye ate'qe'ye' toj kytx'otx'ju' kyajq'oje', lay che elwik'o'ne' ex lay che el wi'jla'ne'; lay che kub' nb'yo'ne' ex kjapumelu' nyole' kyej b'entti'j wu'ne' kyuk'i'lju' ojtxi' kyyajilb'ene', qu'n ayinwe' Dyos Manb'aj.
45Kpena' tzajel nna'ne' nyole' kyej b'entti'j kyuk'i'l tej kyetzwiq'i'ne' Ejipt kywitzju' nimaqtnam tu'n kyajb'ene' weye'. Ayine' Dyos Manb'aj, chi Dyos.
46Aye'tzun kawb'il ja'lu, e'nuk'b'il ex xnaq'tzb'il tzaj tq'o'n Qman Dyos te Moyses twi' witz Sinayi tu'n t-xitma'n kye aj Israel.
Who We AreWhat We EelieveWhat We Do
2025 by iamachristian.org,Inc All rights reserved.