Jue 14 - Mam Ostuncalco Bible

Tmjeb'le'n Sanson

1Jun q'ij ku'pun Sanson toju' tnam Timnat ex oklaqj ti'j jun txin pilistey,

2tetzunj tjawu'ltl tja, xitma'n kye tman ikjalu:

—Kyb'incham xtalb'ile', wajb'ile' tu'n kyxi'ye' qanilte jun txin pilistey oje wile' Timnat tu'n nmjeye' tuk'i'l, chij.

3Aye'tzu'n tman xikyma'n te:

—¿Titiqu'n xi'kxe'la'ya jyol t-xu'jila kyxol ma' pilistey? ¿ma mixtzunti'qe'tl txin kyxolju' qwitze'l, mujqa kyxol kykyaqilju' qxjalilx? chechij.

Atzunte Sanson xittzaq'we'n:

—Awe' txin lu nkub' toj nwitz, kyiq'i'ntze' te nxu'jile', chij.

4Mixtoqti' b'i'n kyu'n tman qa a tajb'il Qman Dyos tu'n tb'aj ikju', qu'n intoq tjyo'n tu'me'l tu'n tq'ojin kyi'j pilistey, ju' ntoq che kawin kyib'aj aj Israel toju' tq'ijlalil lu.

5Eku'xtzun Sansontz kyuk'i'lju' tman ex ttxu toju' nintnam Timnat. Tetzunj kyik' t-xol tqan ub'a teju' nintnam, oktzaqpaj jun qpoj b'alun ti'j Sanson nxi'x tzanun.

6Kb'u'l t-xew Qman Dyos tib'aj, ex b'aj t-ẍilu'nju' qpoj b'alun naq tu'n tq'ob', naku'tej jun tal chib' te; ex mixti'te xitma'n kye tman ti'ju' b'aj lu.

7Xi'tzuntz ex yolin tuk'i'lju' txin kub' toj twitz.

8Tik'lenxi'tzun jte' q'ij, tej t-xi' jumajtl Sanson tu'n tmje tuk'i'lju' txin, eltpa'n tib' ex xi' ka'yilteju' b'alun kyimnitl, o'kx t-xi' tka'yi'n nchi k'amin txqan onin ex jun aq toj t-xmilalju' b'alun.

9Jatz tlot'i'n ta'lkab' toj, xi'tzuntz nlo'n ti'j. Tetzunj tkub'kyi'ju' tman tu'n, xitq'o'n ta'lkab' kye ex xikylo'n, ex mixti' xitma'n kye qa toj t-xmilalju' kyimni b'alun etza' tu'n.

10Ku'pun tman Sanson ka'yilteju' txin; atzunte Sanson kub' ttzalajsa'n kse'nx nkyb'incha'n q'a aj kymje.

11Tzajtzun kyk'le'n pilistey junaqlajojtl (30) kamiw tu'n kyten tuk'i'l Sanson, qu'n matxitoq tz'ok kyka'yi'n ex intoq che xob' te.

12Xitzun tma'n Sanson kyeju' junaq lajoj (30) xjal lu ikjalu:

—Kxe'l nma'n jun yole' kyeye' tu'n tpon kynab'le' ti'j. Qa mapoq'et kyu'ne' toju' wuq q'ij nkub' qtzalajsa'n, kxe'l nq'o'n jun oyaje' kyeye': jun xb'alun tz'umin sed ex jun ch'ix kyi'je' teyile junjunkye'.

13Qatzun min xpon kynab'le' ti'j, teyile junjunkye' ktzajel tq'o'n jun pinpa't tz'umin sed ex i'jb'aj weye', chij.

Xi'tzun kytzaq'we'n te:

—Q'mantzna'ya titi' tu'n tpon qnab'le' ti'j. Luqo'ye' qob'ile' ti'j, chechij.

14Xitzun tma'n Sanson jun tyol tu'n tpon kynab'l ti'j ikjalu:

Matz'etz wab'j toju' intoq wan;

ex chi' setz toju' tx'u'jtoq, chij.

Matxitoqtzun b'aj oxe' q'ij, mixti'x npoq'et kyu'n;

15xikyma'ntzuntz toj twinqi'n q'ij teju' t-xu'jil Sanson:

—Jyom tu'me'la tu'n ttzaj tq'o'n tchmila tzaq'web'l teju' tyol saj tma'n tu'n qpoq'inteye', qatzun min kb'el qtz'e'ysa'na kyuk'i'lju' toj tjaya. ¡Ma qatzun naqxqo kytxoke' tu'n telkyiq'i'nju'ye' ati qeye'! chechij.

16Xi'tzun txintz tk'etz Sanson, in oq' tej t-xitma'n te ikjalu:

—¡Min nchin tk'u'jla'nta! ¡Inchin eltik'o'na! matxi tma'na jun tyola tu'n tpjet kyu'n nxjalile', atzu'n weye' b'ajx tzaj tma'na titi' tzaq'web'l te, chij.

Atzunte Sanson xittzaq'we'n te:

—Na'mxpena' t-xinma'nwe' te nmane' ex te ntxuye', mitzunloyate' tu'n t-xinma'ne' teya, chij.

17Atzunte' txin mixti'x qen tu'n toq' twitz Sanson toju' wuq q'ij kub' ttzalajsa'n, ilxi'xtoqti'j tu'n, xi'xtzun tma'n Sanson tzaq'web'l te yol toj twuqi'n q'ij te. Xi'tzun txintz q'malte kyeju' twnaqil.

18Tojtzu'n twuqi'n q'ij, na'mxtoq tex q'ij, xikyma'n aj Timnat tzaq'web'l te Sanson ikjalu:

¿Ti'xi'xtzun juntl ti'xti' chi'xi'x twitz ta'lkab',

ex alkyexi'x juntl majx tx'u'j kyetwitz b'alun?, chechij.

Atzunte Sanson xittzaq'we'n kye:

Naqwit min xkyjoy tu'me'l tuk'i'lju' tal nmsate'

mixwitloti' xpon toj kynab'le', chij.

19Yajxi'tzuntel kb'u'l t-xew Qman Dyos tib'aj Sanson; xi'tzun Sansontz toj nintnam Askalon ex e'kub' tb'yo'n junaq lajoj (30) ichan atzu', kyu'ntzunju' kyxb'alun b'je'l tiq'i'n, xitchjo'nju' xittziya'n kye' epjunteju' yol xitma'n kye. Anjtzuntz tja inxi'x tx'u'jin,

20atzu'n t-xu'jil xiq'o'n te jun q'a kyxolu' junaq lajoj ten tuk'i'l Sanson.