1 R 3 - Mam Ostuncalco Bible

Mje Salomon tuk'i'l tmyal paraon

1Ok Salomon tajlal toj tja paraon, nimaqkawil aj Ejipt, tu'nju' mje tuk'i'l tmyal ex xitiq'i'n toju' Ninttanam Dab'i akxtoq ljo'n tjapun b'aj tb'inchetju' tja te kawb'il exju' tja Qman Dyos, exju' nintapi ti'jile Jerusalen.

2Aye'tzu'n xjal xi'toq nche kub'a' kyq'o'n chojb'il kywi'witz, ja nche k'uluna' xjal kye txqantl dyos, qu'n b'ajxtoq jawa' b'incha'n jun tja Dyos.

Xitqani'n Salomon tnab'l te Qman Dyos(2 Cr 1.1-13)

3Intoq ntk'u'jla'n Salomon Qman Dyos ex ntoq che'x tb'incha'n kawb'il kyajni tq'o'n Dab'i ju' tman, expe' aku' Salomon intoq kub' tq'o'n chojb'il ex sturak kywi'witz,

4expe' intoq xi' q'ol chojb'il Kab'aon, qu'n atoq najb'ilju' twi' witz nim toklen; intoq kub' tq'o'n kab'k'al lajnaq (1,000) chojb'il k'ok'sb'il atzu'.

5Kub' tyek'u'ntib' Qman Dyos te Salomon toj witzik' tejun qonik'an Kab'aon, ex tzaj tma'n te: Qanintza ti'xti'ku' tajb'ila, kxe'l nq'o'nwe' teya, chij.

6Atzunte Salomon xittzaq'we'n: Nim t-xtalb'ila taq'a te nma'ne', ju' tmajina Dab'i, qu'n mab'et b'a'n twitza, toj tnik'alilti'j ex tzinun tanmi twitza. Qu'mtzun nim t-xtalb'ila xtb'inchaya te ex mataq'a anb'il tu'n tkyaj jun tk'wal te t-xel toju' tq'uqb'il, kse'n xb'aj ja'lo.

7Taye, Nman Dyos, machin nok tq'o'na te nimaqkawil te t-xel Dab'i ju' nma'ne', maskye jun ku'xunqine' ex na'mx tik' nwitze' ti'j nim ti'xti'.

8Luqintzune' wa'lqink twitzju' tnam sk'o'n tu'na: jun tnam nimxi'x, qu'n tu'nju' txqan kyb'aj layx b'ent kyajlet ex lay tz'el kynik'tzil jte' kyb'aj.

9Q'ontza tu'n tok nxon nk'u'je' tu'n tkawetju' ttanama, ex tu'n tel nnik'e' alkyeju' b'a'n ex alkyeju' myab'a'n; qu'n ¿alxi'xkye jun kb'entel tkawinteju' ttanama lu nimxi'x txqan kyb'aj? chi Salomon.

10B'a'n ela'ju' tqanb'e'tz Salomon lu toj twitz Qman Dyos,

11ex tzaj tma'n te:

Ma'na tqaniju'ya lu, ex min xtqani jun tchwinqlala nimtoj, ex mya q'inumal, ex mya kykamikju' tajq'oja, a xtqaniju'ya nab'l tu'n tb'ant tkub'tb'ina ex tu'n tb'ant tkawina,

12knb'incha'ye' xtqaniya: kxe'l nq'o'ne' tnab'la ex tu'n t-ximana b'a'n, mix-alo' jun matxi tenju' tnab'l lu ex mix-alo' juntl ktenb'el te yajxi'tl.

13Expe' ikx kxe'l nq'o'ne' tq'inumala ex ninb'ilteya, aye' mixti' ẍe tqaniya, tu'ntzun mixti' juntl nimaqkawil kse'n aya toj tkyaqilju' tchwinqlala.

14Exqa matb'inchaya wajb'ile', exqa mache japunju' nkawb'ile' ex nchaq'b'ile' tu'na, kse'n tb'incha tmana Dab'i, kxe'l nq'o'nwe' tchwinqlala nimtoj, chi Dyos.

15Tej ttzaj tna'ntib' Salomon, eltnik' qa jun witzik'. Tetzunj tpon Jerusalen, pon twitzju' kax k'ub'lteju' yol kyejni b'entti'j tu'n Qman Dyos ex b'ajkub' tq'o'n chojb'il k'ok'sb'il ex chojb'il te b'inchjtib'il. Tb'ajlenxi'tzun ja'lu, kub' tq'o'n jun nimaqwan kye kykyaqilju' nche kawin tuk'i'l.

A Salomon ajkawil ati tnab'l

16Tojtzunju' tq'ijlalil lu e'pon kab'e' qya eqchqe' twitzju' nimaqkawil. Tetzunj kyokx twitz,

17tmaju' jun:

—¡Nimaqkawil! Junx ja najla'qoye' tuk'i'lju' qya lu, ex itz'ji jun wale' ato'toqe' junx.

18Tojtzun toxi'n q'ij titz'jlen wale', ul itz'ji talju' qya lu. Qkab'ilxe' ato'ye' toju' ja. Mix alo'toq juntl xjal ati quk'i'le'; qkab'ilxqeye' ato'ye' junx.

19Tojtzun jun qonik'an kyimu' talu' qya lu, qu'n kub'kẍe tib'aju' k'wal.

20Jawe'tzuntz tk'u'j aq'b'il tej nchin ktane', eltiq'i'n wale' nk'etze' ex kub' tkuẍb'a'n tk'etz, atzunju' tal kyimnitl kub' tkuẍb'a'n nk'etze'.

21Tetzun prim tej njawe'ye' q'olte tch'u' wale', o'kx txi' nka'yi'ne' kyimnitl. Atzunj t-xinka'yi'nxi'xe' tej qspik'e'xi'x, eltzun nnik'tze', myate walju'ye', chij.

22Atzu'n juntl qya tma:

—Minti', awe' wal aju' itz', ata' tal aju' kyimni, chij.

Atzunju' tnejel qya xittzaq'we'n:

Minti', ata' tal aju' kyimni, atzunwe' wal aju' itz', chij.

Iktzu'n, inxi'xtoq che wulj twitzju' nimaqkawil.

23Kub'tentzun nimaqkawiltz ximal ti'j: Intma'nju' qya lu qa a talju' k'wal itz', atzunju' kyimni talju' juntl qya; ¡Atzu'n juntl a noktq'o'nju' te tal aju' itz', atzu'n kyimnitl nnoktq'o'n te talju' juntl! chij.

24Tchaq'tzuntz:

—¡Kyiq'intz jun nk'uẍtx'e'nb'ile'! chij.

Tetzunj txiq'o'n k'uẍtx'e'nb'il te,

25tmatzuntz:

—Kyaq'punkuye' k'wal itz' toj kab'e', ex kyq'onxe' nik'jan te junjun, chij.

26Atzu'n ttxuju' ne'ẍ itz' jaw b'isun b'a'nxi'x ti'ju' tal, ex xitkub'sa'n te nimaqkawil:

—¡B'inchama xtalb'il nimaqkawil! ¡Lalun kub' tb'yo'nju'ya k'wal itz'! ¡Masb'a'n q'onxa teju' qya lu! chij.

Atzu'n juntl qya tma:

—¡Kub'ku' Kyaq'pu'nj! Tu'ntzun mitxa' q'o'n teya ex tu'n mitzaja' q'o'n weye', chij.

27Tchaq'tzun nimaqkawiltz:

—Kyq'onxju'ye' k'wal itz' teju' qya xq'mante tu'n lalun kub'yet, qu'n ate ttxu ku'xi'xju', chij.

28Kyb'i kykyaqil aj Israel tb'incha nimaqkawil ti'ju' q'oj lu, ex kyna' toj kyanmi tu'n kyniman te, qu'n kyil qa matxitoq tzaj tq'o'n Dyos tnab'l tu'n tkawin tojxi'x tu'me'l.