Os 9 - Mam Ostuncalco Bible

Tqanil tz'e'ysb'il kywitz aj Israel

1Lan che jawnaj tzalaje', Israel;

lan che xlik'pune' tu'n kytzalajb'ile' kse'n nkyb'incha'n txqantl tnam,

matxina' che oke' ajpajil

tu'n xkyaj kytzaqpi'ne' Dyos.

Ajtel twitz kyawale' kyoju' er ja inela' b'inchet triy

xi' nche q'ona' chjonteye' kyeju' mya dyos qe'.

2Tnam Israel, lay ten kytriye' ex kyb'ine'

ex lay kanun kyb'ine' ak'a'j.

3K'anjetlkyi'je' Ejipt,

ex kche wal tz'il wab'je' toj Asirya.

Lay che najantle' toju' ttanam Qman Dyos:

4lay che k'wantl b'ine' ninb'ilte Qman Dyos,

expe' lay b'entl kyq'on chojb'ile'.

Qama txi' kywan jun kywaye' naku'j te b'is,

ex che kjel tz'ilixju' che kxe'l wante.

Kxe'l kywane' wab'j lu,

extzun lay b'ent t-xikyiq'i'ne' toj tja Dyos.

5¿Titi' kb'antel kyu'ne' toju' ninq'ij

aju' nim toklen te Qman Dyos?

6Mana' che'x oqe' teju' xitb'il saj kyib'aje'

che tzyunjtzele' Ejipt,

ex che b'elex mqu'ne' Menpis.

Kb'el noj kyk'uwene' saqpwaq tu'n ch'i'x,

ex che ch'iyel ch'i'x toj kyxmuje'.

7¡Matxi' pon tq'ijlalil tu'n ttzaj tz'e'ysb'il kywitze'!

¡Matxi' pon tq'ijlalil tu'n kychjonteye' kyile'!

¡Oktb'i'ya Israel qa matxi' pon tq'ijlalil!

Ina' kyma'ne': Xnakte' t-sanjelal Dyos.

Okni toj twi'ju' ichan xewsa'n tu'n Dyos, chechije'

Iky nkyma'nju'ye' lu, qu'n nojniqe'ye' tu'n il,

nimxi'x kytx'u'jile'.

8Xq'uqilte Eprayin kub'a' tq'o'nte Dyos t-sanjelal

aye'tzunkye' nkub' kyq'o'ne' xpatxab' toj tb'e;

¡Inxi'xpe' walti'j kyk'u'je' ti'j toju' tja Dyos!

9Mache kub' tzuwixe' toju' kyile',

kse'nqe' najlqe'toq Kyib'ea.

Laytzun tzik'tna'lte' kyb'inb'aje' taq'wix tu'n Qman Dyos

ex kb'el ttz'e'ysa'n kywitze' tu'n tpaju' kyile'.

Kyajtel Israel tu'n tpaj til:

10Intma'n Qman Dyos kjalu:

Intzalaje' tej kyknete' wu'ne'

kse'n nknet lob'j ub'a tu'n jun xjal toj chq'ajlaj.

Iky eb'jela' ojtxi' kychmanju'ye' weye',

kse'n tnejel twitz lob'j iw.

tetzunj kypon tk'etz B'aal-peor

xi' kyaq'atlkyib' kyuk'i'lju' dyos mya ax,

mache ok ik'b'ajilqe'xi'x,

kse'nqe' witzileb' nche' kyk'u'jla'n.

11Lay tentlte' txqan tq'inumal Eprayin:

kxe'l iqa'n tu'n kyq'iq' kse'n t-xaq tze,

lay che oktlkye' qya ch'onwi',

lay tentlkye qya aj Israel kyal.

12Qatzun mache anq'in kyk'wal kyu'n,

ayinwe' chin elelq'inkye ex lay kyej junkye.

¡Qab'a'nx kyej xjal kywitz ajtel npa'nwib'e kyi'j!

13Nok nka'yi'ne' ikynche t-se'n Eprayin tk'wal

kse'nqe' txkup nche tzyet kyu'n xjal toj k'ul:

nche etztiq'in ex nche'x tq'o'n tu'n kykub' b'yo'n.

14¡Nman Dyos, b'inchama kye aju' tu'n tb'inchateya!

¡Tu'n lalun che alantlu' qya ex tu'n lalun tentl ta'l kyimi'ẍ!

Ttx'u'jil Qman Dyos ti'j Eprayin

15Chi Qman Dyos kjalu:

Kyb'inchaye' taq'wix tej kyule' Kyilkal,

atzuntzu' tzaja' ntx'u'jile' kyi'je'.

Tu'n tpaju' kyb'inchb'aje' taq'wix

kche elex nxla'ja'ne' toj njaye';

ex lay che nk'u'jlatle'.

kykyaqilxju' kynejele' pi'sqe'.

16Matxi' che k'ixb'iye' Eprayin;

kse'n jun tze tzqijtl tlok'

ex min nwitzantl.

b'a'n qama che ul kk'wale',

ayinwe' chin kb'el b'yonkye, chi Dyos.

17Aj Israel, che elel ik'o'ne' tu'n Qman Dyos

qu'n min nche okslane' te.

Qu'mtzun che ik'ele' toju' kytaname',

ex noq kche b'etenjele' kyojile junjun nimaqtnam.