1Ntanam, b'intzju'ya nxnaq'tzb'ile';
¡b'inku'ya kxe'l nma'ne' teya!
2Chin yolile' toj techlal;
kyi'ju' ti'xti' e'wa'nqe' ttzajlenx ojtxi'.
3Aju' oje qb'i ex ojtzqi'n qu'n
aju' kyej q'ma'n qe kyu'n qman,
4lalun che kub'qewa'n kywitz qk'wal.
Qajwali'nktz Qman Dyos kyuk'i'lju' che itz'jel yajxi'tl
ex qajwali'nktz tu'nju' tipumal ex tb'inchb'en te lab'te'nqe'.
5kub' tq'o'n Qman Dyos jun kawb'il te Jakob';
kub' tq'o'n jun nuk'b'il tu'n kyoklpe aj Israel ti'j,
ex tchaq' kyeju' ojtxi' qyajilb'en tu'n t-xikyek'u'n kye kyyajajil che ul yajxi'tel,
6tu'ntzun kyojtzqinteju' kyyajajil che b'ju'l yajxi'tel,
e'kyk'wal che ul itz'ji,
tu'n txi' kyxnaq'tza'ntl kye kyk'wal;
7tu'ntzun tokqe kyk'u'j ti'j Dyos
ex tu'n lalun tzik'tna'lju' b'aj tb'incha'n kyu'n;
tu'n kyxi'kynima'n tchaq'b'il
8ex tu'n lalun che ok kse'nqe' ojtxi' kychman,
eb'jaw miltz'uj ex xnakqe',
min qe kyk'u'j toj kyanmi;
¡min xjapun kyol twitz Dyos!
9Aye' tyajajil Eprayin,
b'entnitoq kyten tu'n kyq'ojin tu'n smaj,
eb'ajkub' oq toju' q'ij tej tokju' q'oj;
10Min xikynima'n kyol b'entniti'j tuk'i'l Dyos
ex min kyaj tu'n txi' kyb'i'n t-xnaq'tzb'il.
11Ik'tna'lju' tb'incha Dyos kyu'n,
aye' b'a'nq'ob'aj tb'incha Dyos kywitz.
12E'tb'incha Dyos b'a'nq'ob'aj kywitzju' kyman
toju' tx'otx' Soan, toj Ejipt:
13kub' taq'pu'n ninnjab' toj kab'e', ex eb'jik'x tiq'i'n toj,
kyej tenju' a' naku'j tapi tu'n.
14Nejlitoq kywitz toj jun tnej muj te q'ijtl,
atzu'n qonik'an tu'n t-spik'umal jun tnej q'aq'.
15E'tjaqju' pik toj chq'ajlaj,
ex nim a' etz kyoj te kyk'wa' tu'n.
16¡Tb'incha Dyos tu'n tetz chitj nim a' toj pik
exb'et kse'n jun nin a'!
17Aye'tzunkye kukxtoq kyb'inchan ilju';
jawkyiq'i'nkyib' ti'j Dyos te jawnixi' toj chq'ajlaj.
18Oktoq kyq'o'n Dyos toj joyb'ilti'j
xikyqani'n kywa kse'nxtoqu' kyajb'il.
19Eb'aj yolin ti'j ex kyma:
¿Ma oktzun kb'entel tkub' tq'o'n Dyos qwa toj chq'ajlaj?
20Axte' tjaqte Dyos pik;
ex nim a' etzchitj toj
kub' qojli twitz tx'otx', kse'n jun nin a';
atzu'n ja'lu, ¿ma jaku'tzun b'ent ttzaj tq'o'n Dyos wab'j?
¿ma jaku' b'ent ttzaj tq'o'n kychi'ju' ttanam? Chechij.
21Tetzunj tb'inte Dyos ja'lu, tzaj ttx'u'jil;
¡ojexi'x jaw ja'yon ti'j Jakob',
kse'n jun q'aq'!
22Qu'n min okqe kyk'u'j ti'j Dyos
ex min kyokslaju' kolb'ilkye.
23Tu'npetzunju', tzaj tchq'o'n Dyos muj
ex tjaqju' kya'j;
24¡tzaj tchitu'n mana tib'aju' ttanam,
aju' triy te toj kya'j, tu'n kywan ti'j!
25¡E'wanju' xjal ti'j kywa anjl!
¡Nim kywa tzaj tq'o'n Dyos!
26Tzaj jub'inju' kyq'iq' twitz kya'j
toj tjawetzq'ij ex toj tnayajkya'j;
¡tu'n tipumal Dyos!
27Tzaj tchitu'n kychi'ju' ttanam;
¡e'tzaj chitj pich' twitz kya'j kse'n tz'awun ttzi ninnjab'!
28E'kub' tchitu'n Dyos toju' xmuj
ex kyi'jileju' kypach xb'alun.
29Eb'aj wantzuntz tzmax kyb'ajnoj b'a'nxi'x,
iktzun tb'incha Dyosju' kye kse'nxtoqu' kyajb'il.
30Na'mxtoqpe' tqe kyk'u'j tu'n kywan,
atixtoqju' kywa toj kytzi,
31tej tzaj ttx'u'jil Dyos kyib'aj
Eb'ajkub' tb'yo'nju' ichan nim kyipumal.
¡E'kub'tb'yo'nju' ichan atixi'x kynab'l tij Israel!
32Tu'npetzu'n tkyaqil ja'lu, eb'inchantl il twitz Dyos;
mixti'x kyokslaju' tb'inchb'en Dyos te lab'te'n.
33Qu'mtzun eltiq'i'n Dyos kychwinqlal
naku'j jun jiq'cha'nqe'
ex e'kub' tq'o'n toj yajb'il xob'ajilx.
34Qa nche b'yonjtz tu'n Dyos, nche jyontzuntz ti'j;
inok qe kyk'u'j ti'j, ex inxi'x che jyon ti'j;
35inultzuntz toj kyk'u'j qa a Dyos te toj kya'j
intoq xq'uqinkye ex in klonkye.
36Tb'anilxi'xpetzun che yolin
extzun naq chajyolil nb'je'tz toj ktzi,
37najchaqtoq ta' kyanmi ti'j Dyos
ex min nkb'incha'n kse'nxju' yol kyejni b'entti'j.
38Atzunte Dyos nimxi'x tk'u'jlalil,
kub' tnajsa'n kyil myab'a'n ex min e'kub' t-xitu'n;
b'a'npumaj tjuk' ttx'u'jil
ex min xitq'o'n anb'il teju' tq'oj.
39Tzaj tna'n Dyos qa naq xjalqe';
qa ikyqe' kse'n kyq'iq' inik' jumj ex min in anjtztlti'j.
40¡Jte' majlo min nche b'in te Dyos
ex okkyq'o'n ttx'u'jil toj chq'ajlaj!
41Ex intoq okkyq'o'ntl toj joyb'ilti'j;
¡intoq okkyq'o'n tb'is Dyos xjan tib'aj Israel!
42Min tzaj kyna'nju' q'ij
tej kyklet tu'n Dyos tu'n tkyaqil ipumalj, kyeju' kyajq'oj;
43tej tb'inchante nimaq ti'xti' te lab'te'n
kyoj kojb'il Soan, toj Ejipt;
44tej kyjaw b'entju' nin a' tu'n te chik',
ex min b'ent txi' kyk'wa'n aj Ejipt.
45E'tzaj tq'o'n xtx'o ex ta'jinchej kyib'aj,
b'aj kyaju'n tkyaqil ex kub' kyxitu'n;
46xitq'o'n twitz kyawal matxi'toq b'aj kyaq'una'n
kye ẍt'ikt'u'l tu'n tb'aj kywan.
47B'ajkub' t-xitu'n tqan kylob'aj iw ex kyawal
tu'n saqb'aqun ex txun che'w.
48Eb'aj kyimju' kywakyix ex kyrit
tu'n saqb'aqun tuk'i'l q'ankyaq.
49Tzaj tq'o'n Qman Dyos ttx'u'jil kyib'aj:
tx'u'jilj, k'ixk'oj ex yajb'il,
sanjelalqe' te kamik.
50¡Tzaj ttx'u'jil b'a'nxi'x!
Mix kub'a' tnajsa'n kyil,
tzajpe' tq'o'n kamik kyib'aj;
51¡tb'incha tu'n kyb'ajkyimju' tnejel k'wa'lb'aj
kye kykyaqil aj Ejipt tojx kytanam!
52Eb'je'tz tiq'i'n aj Israel kse'n jun k'loj rit;
xitiq'i'nju' ttanam toj chq'ajlaj.
53Xq'uqi'nqe' b'a'nxi'x tu'n tej kyb'je'tz tiq'i'n
tu'n lalun tzaj xob'il kyi'j,
aye'tzu'n kyajq'oj eb'ajkyaj muqli tjaq' ninnjab'.
54Tzaj tiq'i'n Dyos ttanam toju' tx'otx' xjan,
¡kywi'witz eb'aj kanb'et tu'nku'!
55Eb'je'l tiq'i'n xjal witzleb'ilqe' kywitzju' aj Israel;
ex b'ajx t-sipa'n tx'otx' kyxolju' kyyajajil,
ex e'kub' najan tu'n kyoju' kypach xb'alun.
56Aye'tzunkye okkyq'o'n Dyos te toj kya'j toj joyb'ilti'j
jawkyi'nkyib' ti'j
ex min exi' kynima'nju' tchaq'b'il;
57qu'n ikqe'xju' kse'nqe' kyman,
kyej kykolb'e'n Dyos ex min e'okslan te;
¡eb'ajkub' ch'okyix toj kyb'e naku'j jun tze ch'okti'j!
58Okkyq'o'n ttx'u'jil Dyos tu'n kyq'olb'eb'l te witzileb';
eb'aj k'ulun kywitz ex jaw xky'aqlin kyi'j.
59Tzaj ttx'u'jil Dyos tej tka'yinte ja'lu,
ex majx eb'je'l t-suchu'n aj Israel,
60ex kyej tkolb'i'n ja xjan toj Silo,
ju' tjatoq kyxolju' xjal.
61Taq' anb'il kyeju' tajq'oj tu'n t-xikyiq'i'n
techlal tajwalil ex toklen.
62Ojexi'x tx'u'jin kyi'ju' ttanam,
eb'ajx tq'o'n te twa kyk'uẍtx'e'nb'ilju' kyajq'oj.
63Eb'ajkyimju' ku'xun toj q'aq';
¡mixti'x ok tzalajb'il te mjeb'le'n kyi'ju' qpoj!
64Ex eb'aj kyimju' pale tu'n k'uẍtx'e'nb'il,
ex min e'oq'ju' kyxu'jil kyi'j.
65O'kx ttzaj tna'nttib' Qman Dyos naku'j intoq wtan,
naku'j jun xjal te q'oj inel q'e'n toj twi',
66ex kub'kyi'ju' tajq'oj, ex eb'ajkub' oq tu'n;
¡el kych'ixaw tejumajx!
67Expe' eb'je'l tik'u'n toj tja Jse,
ex min e'jaw t-sk'o'n tyajajil Eprayin;
68eye'kye' tyajajil Juda eb'jaw t-sk'o'n
extzu'n witz Syon k'u'jla'n tu'n.
69Jawtb'incha'n jun ja xjan, nimin twe' kse'n kya'j,
ex tkuwsa tu'n tten tejumajx kse'n tx'otx'.
70Jaw t-sk'o'n Dab'i ju' tmajen
aju' k'ik'leltoq rit;
71eltiq'i'n ti'ju' k'ik'lej rit,
tu'n t-xq'uqinteju' ttanam,
tu'n tok k'ik'lel kyi'ju' aj Israel.
72Ex e't-xq'uqi Dab'i ttanam Dyos;
e't-xq'uqi ex eb'ajx t-ẍaqlu'n
tuk'i'l nab'l ex tuk'i'l tkyaqil tk'u'j. Chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
