Jer 30 - Mam Ostuncalco Bible

Tyol Qman Dyos ttziya ti'ju' tzul

1A yolu' tzaj tma'n Qman Dyos te Jeremiy ikjalu:

2A nyolju'ye' ayine' Dyos Manb'aj kjalu: Tz'ib'anku'xa toj jun u'j tkyaqilju' xb'ajx q'met teya,

3qu'n tzul q'ij knch'exb'eye' kychwinqlalju' ntaname' aj Israel ex aj Juda. Ayine' Dyos Manb'aj nchin yolin, chi Dyos.

4A tyol Qman Dyos ja'lu kyi'j aj Israel ex aj Juda.

5Chi Dyos kjalu:

¡Q'ojq'ojqe' xjal nche ẍch'in

tu'n xob'el ex min nche nak'e!

6Kyximankupe'ye'

qa jaku' tzul tal jun ichan.

¿Tiqu'ntzun nxi'x kyxqutz'la'n kyib'ju' ichan

naku'j tk'ixk'ojal ch'on wi'j kyi'j?

¿Tiqu'ntzun ẍekub' sb'une' kykyaqil?

7¡Xi' tulkanun jun tq'ijlalil ch'uẍxi'x,

b'ajx tzik'a' jumaj kse'n ja'lu!

Jun tq'ijlalil kuw k'okyela' kyeju' tyajajil Jakob',

oktzun che nkla'we'.

8Ayine' Dyos Manb'aj nimwipumale' nchin yolin:

Knkla'ye' ntaname' toju' yajb'ilte tojitz'jtib'il.

ex lay tz'ok jumajtl te k'a'yi'nmajin kye najchaq xjal.

9Ex k'ajb'el weye' ayine' Dyos Manb'aj, ex te Dab'i ju' k'okyel nq'o'ne' te tnimaqkawil.

Ktkla' Qman Dyos ttanam(Jer 46.27-28)

10Ayine' Dyos Manb'aj nchin yolin:

Lan che xob'e' tyajajil Jakob', nmajin,

lan che xob'e' aj Israel,

Kna' che nkla'kye' kyuk'i'lju' tk'wala

toju' najchaq tnam ja xanaqe' q'i'ne'.

Che anjetzkye' najal toj tzalajb'il,

toj nak'b'il, mix-alo' kxob'tzalkyeye'.

11Ayine' Dyos Manb'aj nchin yolin

antinwe' kyuk'i'le' klolkyeye'.

Che kb'el nxitu'ne' kykyaqil nimaqtnam,

tuk'i'lxi' jaẍe'xa' nsputi'ne'.

Aye'tzunkye' lay che kub' nxitu'ne'

naq kb'el ntz'e'ysa'n kywitze' toj kyila:

ilti'j kb'el ntz'e'ysa'ne' kywitze', chi Dyos.

12A xtma Qman Dyos ja'lu:

Layx q'anetju' kyk'ixb'lene',

mixti'te q'a'nb'ilte kyb'inchb'aje' myab'a'n.

13Mixalo'te k'okyel ka'yinkyeye',

mixalo'te kq'analte kyk'ixb'lene',

ex layx che q'anete'.

14Kykyaqilju' tajpaja sik' tna'la kyu'n,

min nche ximantl kyi'je'.

Mapena' che oknb'yo'ne' naku'j kyajq'ojqine',

makub' ntz'e'ysa'n kywitze' kuw,

tu'n tpaj txqan kyb'inchb'aje' myab'a'n,

tu'n tpaj kyile' nim.

15¿Tiqu'ntzun nche t'i'njeye' tu'n kyk'ixb'lene'?

Layx q'anette' kyk'ixk'oje.

Mache oke' wu'ne' toju' k'ixk'oj lu,

tu'nju' nim txqan kyile'

ex nim kyb'inchb'aje' myab'a'n.

16Ex che b'ajel b'yo'nkye' kykyaqilju' che b'ajel b'yonkyeye',

ex kykyaqilju' kyajq'oje' che b'ajxe'l q'i'n toj juntl tx'otx'.

knb'incha'ye' tu'n kyajunjtzu' che yajulkyeye',

ex tu'n kykub' alq'a'nju' che elq'al kyi'je'.

17Oktzun che nq'a'na' jumajtle',

knq'ana'ye' kyk'ixb'lene',

b'a'n qama kymaju' kyajq'oje':

Matxi' kyej kolb'e'nte Syon,

mix-a'lo'tlte nb'ajx tk'u'j ti'j, qa chechi.

Ayine' Dyos Manb'aj nchin yolin, chi Qman Dyos.

18Intma'n Qman Dyos kjalu:

K'eletz wiq'i'ne' ttanam Jakob' toj yajb'il,

ktzajel q'aq'anqk'u'je' ti'ju' ttx'o'tx',

che jawil b'inchetlu' nimaqtnam toju' kyik'len

exqe' tja nimaqkawb'il tojilex kykub'el.

19Che b'itzanjtzel b'itz aq'b'il chjonte kyoj

ex ktenb'el tzalajb'il kyoj.

Lay che kub'aj, knb'incha'we' tu'n kychmet.

Lay che el ik'o'n, qu'n che jawil nnima'ne'.

20Ikx che tenb'ela' aj Israel kse'n tnejel,

kuw che tenb'ela' kytanam nwitze',

ex kb'el ntz'e'ysa'ne' kywitzju' ate'k jtz'olkye.

21-22Kyxoltzun k'eletza' jun kynejel:

k'eletz jun kawil kyxolx.

Knb'incha'ye' tu'n ttzaj lq'e nk'etze',

¿Altzulokye jaku' tkuwsatib' tu'n ttzaj lq'e nk'etze'?

Che okyel te ntaname', ex chin okyele' te Kydyos.

Ayine' Dyos Manb'aj nchin yolin, chi Qman Dyos.

23Ikyte Dyos ttx'u'jil kse'n jun q'ankyaq,

se'n jun kyq'iq' jb'al

inxi'x ttoli'ntib' kyib'aju' b'inchal myab'a'n.

24K'elelxi'te Qman Dyos ttx'u'jil

ajtjapunju' tb'is tk'u'j.

Kpomel jun q'ij

che kaneb'el ja'lu toj kywitze'.