Sal 39 - Mam Ostuncalco Bible

Naqch'i'n toju' qchwinqlal

1Ojetoq ntziyaye' tu'n wanq'ine' b'a'n,

tu'n lalun chin b'inchan ile' tu'n waq'e',

ex tu'n njk'unte ntziye'

kwitzju' b'inchal myab'a'n.

2Ex oknq'o'n wib'e' me: mixtoqti' nchin yoline'.

¡Mixtoqpe'ti'x nchin yoline' ti'ju' b'a'n!

Atzu'n nk'ixk'oje' xitoq tichin;

3¡Inxi'xtoq q'aq'lixju' wanmiye' ttzi nk'u'je'!

ex kub' nximane' qa q'aq' ati woje',

nmatzuntze' tuk'i'l tq'ojq'ojel nwi'ye' kuw:

4Taye, yek'untza weye' ja chin pomela' b'aje'

ex jte' ab'q'i chin anq'ile';

tu'n tkane toj nwitze' qa naqch'i'n toju' nchwinqlale'

5Noq ch'i'n toju' nchwinqlale' saj tq'o'na;

mixti'x tz'oka' twitza.

¡Kykyaqil xjal noq jun kmuj nche ten, kse'n jun jiq'cha'n!

6¡Kykyaqil xjal nche ik' twitz tx'otx' kse'n jun leku'n!

Mixti'x tajb'en qama kub' tchmo'n txqan tq'inumal,

qu'n min b'i'n tu'n alkye kjelten tajaw.

7Qu'mtzun Nman Dyos, ¿Titi'tzun kb'el nyo'ne'?

¡Anatzu' q'uqla'we' nk'u'j ti'ja!

8Chin tkloma te tkyaqilju' wile';

lalun taja tu'n kyxmayinju' xnak wi'je'.

9Matz'oknq'o'n wib'e' me ex min ẍin yoline',

qu'n aya b'inchalte tten.

10Iq'imila yajb'il wib'aje';

matxi' chin kub'aje' tjaq'ju' yajb'il tu'n tq'ob'a.

11Inttzak'u'n teju'ya xjal ajtkub' ttz'e'ysa'na twitz tu'n tpaju' til,

tkyaqilju' nlaq ti'j, inok kse'n quq ajtkub' t-xitu'na.

¡Kykyaqilju' xjal naq jun jiq'cha'nqe'!

12Nman Dyos, b'intzju'ya nna'j Dyose',

¡b'intzju'ya nkub'sb'ile'!,

¡lalun naq chin tzaj tka'yi'na ajtel ta'l nwitze'!

Jun najchaq xjal qinwe' teya,

naq ajb'etun, kse'nqe' ojtxi' nyajilb'ene'.

13Iq'imil jun kmuj twitza wi'je', q'ontza anb'il tu'n ntzalaj jun kmuje',

na'mxku' nkyime', chiju' b'itzal.