Ez 36 - Mam Ostuncalco Bible

B'a'n che kxe'la' aj Israel yajxi'tl

1Ichan, yolina toj nb'iye' kye witz toj Israel, ex q'manxa kye tu'n kyb'inteju' nyole'.

2Nxinma'ne', ayine' Dyos Manb'aj: Nkyxima'n tajq'oj Isarel qa aye' kyajawju' witz tejumajx.

3Q'manxtzuna kye toj nb'iye' kjalu: Chi Dyos ntma'n: In okq'oj kyi'je' toj tkyaqil plaj ex nche xitunjtze'; matxi' kub' kyq'o'n kyib'ju' te najchaq tnam kyi'je', nche xmayinju' xjal kyi'je' ex nche el ik'une' kyu'n.

4Qu'mtzun, e'witz toj Israel, kyb'intze' tyol Qman Dyos kye nimaq k'ul, ttxa'nwitz, nimaq a' ex b'ya'; kyeju' xitjnitl mixti'tl najalte ex kye nimaqtnam chq'ajlajqe'tl toj Israel, matxi' cheb'aj elq'a'n kyu'n tnam nqaku' kyk'etz ex matxi' che b'aj xmayi'n kyu'n.

5A ntma'n Dyos ja'lu: Kuwqe' nyole' tu'n ntx'u'jile' kyi'ju' txqantl tnam, axi'xpe' ti'j Edom, qu'n ojexi'x che tzalaj tej tkub' kytzyu'n ntx'otx'e' ex tuk'i'lxi'x ik'b'il eb'aj kyelq'anju' tawal tx'otx'.

6Yolina toj nb'iye' ti'ju' ttx'otx' Israel, ex q'manxa: A ntma'n Dyos ja'lu kyeju' witz, ttxa'nwitz, nimaq a' ex b'ya': Ati nyole' tuk'i'l ntx'u'jile', tu'n kypaju' yasb'il kyeye' kyu'n nimaqtnam te najchaq.

7Qu'mtzun kxe'l nma'ne', ayine' Dyos Manb'aj, che b'el ch'ixwikye' tnam ate' nqaku' kyk'etze'.

8Aye'tzunkye', witz toj Israel, che b'eljupe'kye' kyu'n nimaq tze ex kkyq'a' txqan kywitz teju' ntaname' Israel, naq ch'inxtl tanjtzti'j.

9Kche nkla'ye', ex knb'incha'ye' tu'n kyaq'unet ex tu'n kyok te awb'il.

10Knb'incha'ye' tu'n tchmetju' tnam Israel najli atzu'. Che chmetel xjal najal kyoju' nimaqtnam, aye'tzu'n kub'niqe' xitj che jawil b'inchetl.

11Knb'incha'ye' tu'n kychmet xjal ex alu'mj nimxi'x kyxole'. Nim xjal che najal kyeye' kse'nx tnejel, b'a'nxi'xtl che tenb'ela'ye' kyetwitz tnejel. Oktzun k'elel kynik'tze' qa ayine' Dyos Manb'aj.

12Knb'incha'ye' tu'n kyb'etju' ntaname' kyib'aje', e'witz toj Israel, ex tu'n tkub' kytzyu'n kytx'otx' kyi'je' tu'n kyok te tajaw, ex lay che kyajkyq'o'ntle' mixti' kyk'wal.

13In nma'ne', ayine' Dyos Manb'aj: nche okq'o'ne' witz te ch'yol xjal exqa nche kyej kyq'o'ne' kytaname' mixti'tl kyk'wal.

14Ja'lo lay che ch'yontlke' xjal ex lay che kyej kyq'o'ntle' tnam mixti'tl kyk'wal. Ayine' Dyos Manb'aj nchin q'mante.

15Lay waje' tu'n kyb'intetle' i'lb'il kyu'n najchaq nimaqtnam; lay che yasunjtztle' kyu'n tnam lu, qu'n lay che kyajtle' mixti' kyk'wale' toj tnam. Ayine' Dyos Manb'aj, nchin q'mante, chi Dyos.

16Tzaj yolin Qman Dyos weye', ex tma:

17Tej najlqe'toq aj Israel toj kytx'otx', kub' kytxa'ju'n tu'n kyb'inchb'aj myab'a'n. Tz'il toqju' nche anq'ina' toj nwitze' ex ntzaj molmone' kye.

18Ktzajeltzun nb'ajsa'n ntx'u'jiltze' kyib'aj tu'n tpaju' b'yoj wnaqil kyb'incha toju' tx'otx' ex tu'nju' tu'me'l b'aja' kytz'ilsa'n, ek'ulun kye witzleb',

19tu'ntzun ttz'e'yset kywitz tu'nju' kyb'inchb'en mache b'ajx nsputi'ne' kyoj txqantl tx'otx' ex nimaqtnam,

20Intoqtzun kub' kyili'n xjal nb'iye' xjan tu'n kpaj kyoj kykyaqilju' tnam janche pona', qu'n intoq kyma'n: Aye'tzun ttanam Dyos ja'lu, mache etz toju' kytx'otx'.

21Exch'yon weye', tej nka'yinteye' kub' txa'ju'n nb'iye' xjan tu'n kypaj aj Israel kyojile nimaqtnam jatoq nche pona.

22Qu'mtzun, q'manxa kye aj Israel: A ntma'n Dyos ja'lu: Aju' knb'incha'ye' mya tu'n kypaje' aj Israel, tu'ntpajwe' nb'iy xjan, matxi' kub' ili'n tu'n kypaje' kyoju' nimaqtnam ja matxi' che pona'ye'.

23Kxel nyek'u'ne' t-xjanilju' nb'iye' nim toklen kyxolju' nimaqtnam, ju' matxi' kub' i'li'n kyxol tu'n kypaje'; ajnb'inchanteye', k'elelkynik' qa ayine' Dyos Manb'aj. Ayine' nchin q'mante.

24Che eletz wiq'i'ne' kyoj kykyaqilju' tx'otx' ex nimaqtnam lu; che tzaje' nb'uyi'ne' ex che anjetz wiq'i'ne' toj kytx'otx'.

25Che b'ajel ntx'jo'ne' tu'n ẍtilun a', che b'ajel nẍtilsa'ne' te tkyaqil tz'il, che nẍtilsa'ye' tu'n ẍe ajb'ene' kye witzleb';

26kb'el nq'o'ne' jun kyanmiye' ak'a'j ex kyxewe' ak'a'j. K'elel wiq'i'ne' kyanmiye' kuw naku'j ab'j ex k'okyel nq'o'ne' jun kyanmiye' b'unin.

27Kb'el nq'o'ne' nxewe' kyoje', ex knb'incha'ye' tu'n kyjapun nkawb'ile' ex nchaq'b'ile' kyu'ne';

28che najale' toju' tx'otx' xinq'o'ne' kye kymane', che okyele' te ntaname' ex che ajb'ele' weye'.

29Che nkla'ye' te tkyaqilju' matz'ilsantlkyeye', kchmetel triy wu'ne', ex lay tzajtl we'yaj kyi'je' wu'ne'.

30Ex che witzalxi'xtlju' tze toj kojb'il wu'ne', tu'ntzun lantz'etl kych'ixawe' kywitz txqantl nimaqtnam tu'n we'yaj.

31Ajtzun ttzaj kyna'ne' kychwinqlale' taq'wix ex kyb'inchb'aje' myab'a'n, che b'elch'ixwiye' kyib'xkyib'e' tu'n tpaju' kyile' ex kyb'inchb'aje' myab'a'n.

32Ayine' Dyos Manb'aj nchin q'mante: Kyb'inku'ye' aj Israel, lay nb'inchawe' lu tu'n b'a'nqe'wte'; kych'ixwlenku'ye' ex che chukjixe' tu'nju' kychwinqlale' myab'a'n.

33Ayine' Dyos Manb'aj, nxinma'ne': Ajkẍtilsete' wu'ne' te tkyaqilju' kyile', che najale' wu'ne' kyoj nimaqkytaname' ex tu'n kyjaw kyb'incha'ntle' kub'ni xitj.

34Aju' tx'otx' ojetoq kyej chq'ajlajix, mya chq'ajlajtl, k'okyel te awb'il tu'n kyka'yinte kykyaqilju' che b'jik'el atzu'.

35Ex kq'manjtzel ti'j: Luju' tx'otx' ojetoq kyej chq'ajlajix, ja'lo naku'j awal toj Eden; luqe' nimaqtnam ojetoq che kyajxitj, eb'aj kyajtilu'n ex ttx'anqa'nqe'tl, ja'lo ja qe'tl kuwsa'nqe' ex naja'nqe'tl.

36K'eleltzun kynik' tnamtz ate' nqaku' kyk'etzju' itz'qe'x qa ayine' Dyos Manb'aj, nchin jawb'inchanteju' kub'ni xitj ex nchin awantetlju' ojetoq kyej b'o'lj. Ayine' Dyos Manb'aj, matxi' chin q'mante, ex knb'incha'ye'.

37In nma'ne', ayine' Dyos Manb'aj: Okpe' knb'incha'ye' juntl ti'xti'. Knb'incha'ye' kye aj Israel titi' makyqani tu'n nb'inchanteye' kye; che chmetel kyb'aj wu'ne' kse'n jun ch'laj rit.

38Knojel kyoju' nimaqtnam xitjniqe' kyu'n txqan xjal, naku'j kse'nqe' rit ajkyb'ajx q'i'n Jerusalen toj ninq'ij tu'n kyxi' q'et te chojb'il. K'eleltzun kynik'tz qa ayine' Dyos Manb'aj, chi Dyos.