Jue CHIK'B'AB'L - Mam Ostuncalco Bible
CHIK'B'AB'LAju' u'j lu nyolin ti'ju' tq'ijlalil tkyimlenxi' Joswe, mixtoqti' jun nejenel kyxolju' aj Israel ex mixti' jun kawil junxwit kyib'aj, ex mixtoqti' jun mujb'ab'ltib'il kyxol. Atitoq q'oj kyxol kyuk'i'lju' tnam kyi'jile, ex ati maj intoq tzaj q'oj kyxol junjun tnej kyyajajil aj Israel. Ate'x junjun tnejtl aj Kanaan e'kyajten kyxol, mixti'x kub'kyi'j ex min eb'je'x b'aj kyu'n aj Israel toju' tx'otx'. Mixti' tenxi'x nak'b'il kyxol, jachq'altoq ntzaj xitb'il kyxol, ex naq jte'chaq q'ij nak'b'il nten.Yajyab'xi'chaq njaw junjun nejenel kyxol ex ntwab'a'ntib' kywitzju' ajq'oj. Aye'ju' nejenel lu Ajkawil kyb'i ok, atzuntzu' oka' tb'iju' u'j lu te Kyuj Ajkawil. Nejenel qe'kye' ex kawilqe', ex intoq che ajb'en te ajkawil.A ntma'nju' toju' u'j lu aju' kyb'inchb'aju' nejenel. Aye' tu'n kytzaj na'yet-xi'xju' aye' kyb'inchb'aj Deb'ora ex B'arak, Gedeon ex Sanson. Min ik'kyna'lju' tnam lu tejumajx tu'n Qman Dyos, e'jaw t-sk'o'n junjunju' nejenel lu toj junjun tq'ijlalil. Intoq che anq'in aj Israel b'a'nqa b'a'n kyten twitz Qman Dyos, qatzun myab'a'n kyel twitz Qman Dyos, intoq tzaj taq'wix kyib'aj. Tu'npetzunju', intq'o'nte Qman Dyos tib' klolkyeju' ttanam qa matz'anjtzti'j kyanmi exqa nnanjtzkyi'j tuk'i'l.
