1 Cr 16 - Mam Ostuncalco Bible

1Pon iq'i'nju' kax te Dyos ex kub' q'o'n toj xmuj ojetoq jawtb'incha'n Dab'i. Eb'aj kub'tzun tz'e'ysa'n chojb'il k'ok'sb'il ex chojb'il te mujb'ab'ltib'il twitz Qman Dyos,

2Kykub'lenxi'tzunju' chojb'il tu'n Dab'i, tqani b'a'n kyib'aju' tnam toj tb'i Qman Dyos,

3ex xitq'o'n kywa kykyaqilju' aj Israel ichan ex qya, junjun wab'j triy, junjun muqin b'incha'n ti'j lob'j ex junjun b'incha'n ti'j ub'a tzqijsa'n.

4Eb'jo'k tq'o'n Dab'i jte' kyxolu' aj Leb'i tu'n kyajb'en tiju' kax te Dyos, tu'n kyik'sante, tu'n txi' kyq'o'n chjonte ex tu'n tjaw kyajwali'n Qman Dyos.

5Atoq Asap nejenel, atzu'n Sakariy tkab' nejenel; lepchqe'xju' Jeyel, Semiramot, Jeyel, Matatiy, Elyab', B'enayiy, Ob'ed-edom ex Jeyel, atitoq kychinab' tzintzin ex arpa. Atoq Asap q'ajtzalkyeju' txijtxij,

6aye'tzu'n pale B'enayiy ex Jaasyel intoq che chinb'an kukxju' kyi'ju' chun twitzju' kax k'ub'lteju' tyol Qman Dyos kyejni b'entti'j.

Tb'itz Dab'i te aq'b'il chjonte(Sal 105.1-15; 96.1-13; 106.47-48)

7Tojxtzu'n q'ij lu tchaq' Dab'i tnejel maj kye Asap exqe'ju' tuk'i'l tu'n tjaw kyajwali'n Qman Dyos kyu'nju' b'itz te aq'b'il chjonte lu:

8¡Qq'onx chjonte te Qman Dyos!

¡Qpakb'anxju' tb'i!

Qtx'olb'anxju' tb'inchb'en kyeju' tnam.

9Qoqe' b'itzan te ninb'ilte.

¡Qyolinqe'xju' tb'inchb'en nimaq kyoklen!

10Qoqe' tzalajx ti'ju' tb'i xjan.

¡Tzalajx qk'u'j

ayo' nqo jyon ti'j Qman Dyos!

11Qjyom Qman Dyos exju' tipumal;

qqaninx te Qman Dyos tkyaqil q'ij.

12Qna'ntzju' nimaq tb'inchb'en te lab'te'nqe'xi'x,

exqe'ju' tchaq'b'il kyejni tma'n:

13ayo'qo', tyajajil Israel tmajin,

ayo'qo', tk'wal Jakob' sk'o'nqo'tl.

14Ate Qman Dyosju', Dyos;

¡Ate nkawin tib'aj tkyaqil twitz tx'otx'!

15Maskye mache' ik' kab'k'al lajnaq (1,000) wiq kyyajajil xjal,

lay tzik'tna'lju' tyol kyejni b'entti'j tu'n,

16aju' tyol kyej b'entti'j tuk'i'l Ab'raam,

exju' tzajttziya'n te Isaak,

17ex tzaj tq'o'n kawb'il te Jakob',

jun tyol kyejni b'entti'j tejumajx qe aj Israelqo',

18tej tmante:

Kxe'l nq'o'ne' tx'otx' Kanaan teya

tu'n tok te tetzb'ila, chij.

19Maskye naq jte'xtoq qb'aj,

jte' najchaq xjalqo'toq toju' tx'otx'

20intoq qo iky' kyojile junjun tnam

ex intoq qo iky' kyojile junjun kawb'il,

21min taj Dyos tu'n qyajt;

expe' xitab'tzi'n kyeju' nimaqkawil:

22Lalun tzaq'pon kyq'ob'e' kyi'ju' xjal sk'o'nqe' wu'ne',

ex lalun che oktene' yajulkye nsanjelale', chij.

23Qoqe' b'itzan te Qman Dyos, qkyaqil najlqo' twitz tx'otx';

qpakb'anxju' tkolb'il atl junjun q'ij.

24Qyolinxju' tajwalil exqe' tb'inchb'en te lab'te'nqe'

kye kykyaqilu' tnam ex nimaqtnam,

25qu'n nimte Qman Dyos toklen

ex o'kxte tu'n tjaw ajwalit,

ati tu'n qxob'xi'x twitz kyekywitz kykyaqil kydyos xjal.

26Mixti'kye' kydyos txqantl tnam kyajb'en,

atzunte Qman Dyos e'kub' tb'incha'n kya'j.

27¡Inxi'x qoptz'aju' t-spik'umal!

¡Ati ipumalj ex tzalajb'il toju' tja xjan!

28Kynimsanktze' Qman Dyos najlqe'ye' kyoju' tnam

kynimanktze' Qman Dyos tu'nju' tipumal ex tajwalil;

29che nimane' te Qman Dyos tu'nju' toklen;

kukytzaje' tuk'i'l kyoyaje' twitz;

che k'ulun qe'ye' te Qman Dyos toju' tja xjan tb'anilxi'x.

30¡Che xob'xwit kykyaqilu' xjal twitz!

Kyej tkuwsa'nju' tx'otx' tu'n lalun yukchi.

31¡Che' tzalajxju' kya'j exju' tx'otx'!

q'manjtzxwit kyoju' nimaqtnam: ¡Ate Qman Dyos nimaqkawil!

32¡Tinunxju' ninnjab' kyuk'i'lxi' kykyaqilju' ate' toj!

¡Tzalajxju' kojb'il tuk'i'lxi' tkyaqilju' ati twitz!

33¡Che' ẍch'inxju' tze toj k'ul tu'n kytzalajb'il

twitz Qman Dyos, ju' tzul kawil twitz tx'otx'!

34Qq'onx chjonte te Qman Dyos, qu'n majx b'a'nte,

qu'n tejumajxju' tk'u'jlalil.

35Qmanx te:

¡Qo' tkloma Nman Dyos, ju' klolqe'ye'!

¡Qo' tiq'iktza tu'n qklete' kyxolju' nimaqtnam

tu'ntzun Qajwalinteju'ye' tb'iya xjan,

tu'ntzun qb'itzane' toj tzalajb'il teya!

36¡Nimanjtzxwitju' Qman Dyos tejumajx, ju' Qdyos! chij.

Kykyaqiltzunju' tnam xikytzaq'we'n: ¡Ikxwitju'!, chechij, jawkynima'n Qman Dyos.

37Ikytzu'n, e'kyaj tq'o'n Dab'i Asap kyuk'i'lju' tuk'i'l, twitzju' kax k'ub'lteju' yol kyajb'anti'j tu'n kyajb'en kukxju' kse'nxju' nojqelan atl junjun q'ij.

38Ex kyej tq'o'n Ob'ed-edom xq'uqil ttzija, kyuk'i'l oxnaq wajxaq tuk'i'l ax kyaq'unju', tuk'i'l Ob'ed-edom, tk'wal Jedutun, ex Osa.

39Atzu'n Sadok kyuk'i'lju' tuk'i'l paleqe'x e'kyaj tq'o'n twitzju' pach te Qman Dyos toju' ja xjan ati toj Kab'aon,

40tu'n tkub' kyq'o'n chojb'il k'ok'sb'il kukxju' twitz Qman Dyos tib'aju' q'olb'eb'l te chojb'il, prim ex qale, ikxi'x kse'n tz'ib'a'n toju' tkawb'il Qman Dyos kyej tq'o'n kye aj Israel.

41Ex ikx e'kyaj tq'o'n Eman, Jedutun kyk'etz kyuky'i'lu' jte'tl sk'o'nqe' ex q'ma'n kye tu'n txi' kyb'itza'n: Kyq'onx chjonteye' te Qman Dyos, qu'n tejumajxju' tk'u'jlalil.

42Intoq che chinb'an kyi'j chun, txijtxij ex junjuntl chnab', kyuky'i'lju' intoq che b'itzan te Dyos. Aye'tzu'n tk'wal Jedutun intoq che xq'uqin ttzija.

43Tb'ajlenxi'tzun ja'lu, kykyaqil b'aj anjkyi'j kyja, ikxte Dab'i anj q'olb'el kyeju' toj tja.