Pr 24 - Mam Ostuncalco Bible

- 19 -

1Lalun pon tk'u'ja kyi'ju' b'inchal myab'a'n

ex lalun tmujb'a tib'a kyuk'i'l.

2Qu'n o'kxtzu' nche' ximana' tu'n kyb'ujun

ex o'kx nkyoli'n, tu'n b'inchan myab'a'n.

- 20 -

3Tuk'i'l nab'l njaw b'incheta' jun ja,

ex tuk'i'l xim nku'x b'incheta' tq'uqlil;

4Ex tu'n ojtzqib'l nb'aj noja' kyoju' ja.

kyu'n txqan ti'xti' nimaq kyoklen ex tb'anilqe'.

- 21 -

5Ate b'a'n jun ichan ati tnab'l kyetwitz jun ichan kuw;

ate b'a'n ojtzqib'l kyetwitz ipumalj.

6Qu'n qama txi'ya q'ojil ati tu'n t-ximana

nojqelan tu'n txi' tjyona tu'me'l tu'n tkanb'ana.

- 22 -

7Majx njpet ttziju' xnak ajtpon twitz kawil,

qu'n najchaq ta' ti'ju' ojtzqib'l.

- 23 -

8Alkyete noq nximan taq'uxil,

a tb'iju' nok q'o'n (taq'wix tnab'l).

9A tnab'l xnakju' tu'n txi' b'inchal il;

mix-alo'xte' in ik'xtu'n tu'n tten tk'etzju' xjal twi'xmayil.

- 24 -

10Alkyete' nkub'numj ajttzaju' yajb'il,

na'ntzun ch'i'n tokslab'l tzu'.

- 25 -

11Klomqeya xjal xi' kxi' toj kamik;

tzaqpimqeya xjal ate'k twitz kamik.

12B'a'n qama tmaya qa mixti' tila;

mana' tz'ilwiya tu'nju' ojtzqil qanmi;

ex xq'uqilteya

aju' tzul chjonte teyele kse'nxju' taq'unb'en.

- 26 -

13Wana, q'a, ti'ju' ta'lkab' chi';

Nik'b'enxpe'ya tk'ok'jalxi'x.

14Ikytzu'n tchi'yal nab'lju' exju' ojtzqib'l;

qama knet tu'na, b'a'ntzun kxela'tza

jumajxtzun kqeb'il tk'u'jtza.

- 27 -

15Lalun kub' t-xima'na jun ti'xti' myab'a'n ti'ju' tnik'alti'j,

ex lalun che b'je'x telq'ana toj tja.

16Qu'n maskye wuq maj xkub' tz'aq, wuq maj kjawil we';

aye'tzunkye' b'inchal myab'a'n majx nche'x toj il.

- 28 -

17Lalun tzalaja ajtkub' tz'aqu' tajq'oja

ex lay tzalaj tanmiya aj txi' toj il,

18Qu'n lay tzalaj Dyos ajtka'yinte ja'lu,

jaku' tib'aja kub'a tz'aqxju' ttx'u'jil.

- 29 -

19Lalun tx'u'jina kyeju' b'inchal myab'a'n

expe' lalun tx'a'lti'j tk'u'ja kyi'j,

20Qu'n myab'a'n kjapumela' b'ajte' tchwinqlal:

¡kyupjelte' b'inchal myab'a'n ttxa'n kytzaj!

- 30 -

21Nk'yajul nimana te Dyos ex kye nimaqkawil,

lalun tmujb'a tib'a kyuk'i'l ajq'oj,

22qu'n minab'enx ajttzaj xitb'il kyib'aj,

mix-a'loxte b'ilte se'n kb'ajila'.

Jte'tl yol b'aj q'ma'n kyu'nju' ajnab'lil

23Ikx aye'ju' yol lu q'ma'nqe' kyu'n ajna:

Myab'a'n qa naq te jun nb'incheta' kawb'il.

24Aju' kawil qama tz'oktq'o'n mixti' tilju' nimaq til,

k'elil ik'u'n kyu'n tnam ex kb'ajel yasu'n;

25Qatzun nche kawin tojxi'x tnik'alti'j

nxi' qani'n ky'i'wb'il kyib'aj kyu'n xjal.

26Aju' b'a'n tzaq'web'l

iky nela' kse'n qma'tz.

27Nk'uma kkyaqilju' k'ajb'el teya

ex b'inchanxa taq'una toj kojb'il

b'inchanktzun tjatzuya.

28Lalun jawtiq'i'n jun yola ti'j twnaqila

ex lalun chanyola ti'j.

29Lalun taq' tu'me'l t-xela te juntl,

tu'nwt tb'inchanteya kse'n xb'inchanjtz teya.

30Mawile' ttx'otx'ju' ky'aj

ex tawalju' xnak xjal:

31Noqx txqan ch'i'x matx tzaj b'ent toj,

ex matzaj juptz'aj txqan itzaj toj jni'ju' ttapi ti'jile matx tzaj tilj.

32Tej nka'yinteye', majx kyej toj nwi'ye'

wile' ex el jun nnab'le' ti'j;

33naq tu'n ch'i'n qama tzajtwatla

exqa makub' tchle'n tq'ob'a,

34Tzul prowil ex k'okyel tzaqpaj ti'ja

kse'n jun eleq' iq'i'n tq'aq'.