1 Cr 21 - Mam Ostuncalco Bible

Jaw kyajlalju' tnam tu'n Dab'i(2 S 24.1-17)

1Jaw tiq'i'ntib'u' tajaw il kyi'ju' aj Israel, okxtq'o'n toj twi' Dab'i tu'n tjawtiq'i'n kyajlalu' aj Israel.

2Tchaq'tzun Dab'i te Joab' ex kyeju' nejenel kye tnam:

—Kukyxi'ye' ex kyiq'i'nktze' kyajlalju' aj Israel, tzajx B'eerseb'a tu'n tpon Dan, Kyiq'intztzuntze' tajlal weye' tu'n nb'inteye' jte' kyb'aj, chij.

3Atzunte Joab' xittzaq'we'n te:

—Awt Qman Dyos chmet-sankye jo'naq majtlju' ttanam kyib'ajxi'ju' ate' ja'lo; ¿Ajb'el qe'na' kykyaqil ja'lu teya nimaqkawil? ¿Tiqu'ntzun tajb'ila'ya tu'n tb'inchet ja'lu nimaqkawil? ¿Tiqu'n kxe'la' tq'o'na tnam Israel toj il? chi Joab'.

4Ilxi'xtzunti'j kub' tq'o'n nimaqkawil tchaq'b'il, etztzun Joab'tz, xi' toj tkyaqilu' tx'otx' te Israel ex anjtz jumajtlti'j Jerusalen.

5Xitq'o'n Joab' kyajlalju' tnam te Dab'i, atitoq qaqnaq wuqlajmutx' lajk'al (1,100,000) ichan b'a'nqe' te q'oj toj tkyaqil Israel, kab'naq wajxaqlajmutx' o'lajk'al (470,000) toj Juda.

6Min e'okju' kyyajajil Leb'i ex B'enjamin toju' tajlal lu, qu'n min kub'u' tchaq'b'il nimaqkawil toj twitz Joab'.

7Myab'a'n ela' tkyaqil ja'lu toj twitz Dyos, ex tzaj tq'o'n jun tz'e'ysb'il kywitz aj Israel.

8Jatztzun tpa'n Dab'i til twitz Dyos:

—Matxi' nb'incha jun nin ile' tu'n xnb'inchaye' lu. Chin kub'sale' ja'lo tu'n tkub' tnajsa'na wile' ayine' tmajina, qu'n machinokye' xnak twitza, chij.

9Tzajtzun tma'n Qman Dyostz te Kad, ju' janxjeluna' Dab'i:

10Kutxi'ya tk'etz Dab'i ex q'manxa te qa inche kub' nq'o'ne' oxe' ti'xti', tu'n tjaw t-sk'o'n kyxol alkye tajb'il tu'n nb'inchanteye', chi Dyos.

11Xi' Kad tk'etz Dab'i, ex xitma'n te:

—Chi Qman Dyos ikjalu: sk'onktza alkye tajb'ila

12ma aju' oxe' ab'q'i we'yaj, mujqa oxe' xjaw tu'n tkub'kyi'je' tu'n k'uẍtx'e'nb'il kyu'n kyajq'oje', mujqa oxe' q'ij yab'il toju' kytx'otx'e' tu'n tk'uẍtx'e'nb'il Qman Dyos, ajtulju' tanjl Qman Dyos xitul toj tkyaqilu' kytx'otx' aj Israel. Ximanku'ya alkye b'a'n toj twitza tu'ntzun txinma'ne' teju' saj chq'o'nweye', chij.

13Xi'tzun ttzaq'we'n Dab'i te Kad:

—Matxi' chin b'o'lje'. Alote b'a'n tu'n nkub' tz'aqe' toj tq'ob' Qman Dyos, mya toj kyq'ob' ichan, qu'n nimxi'xju' t-xtalb'il, chij.

14Tzajtzun tq'o'n Dyos jun tx'u'j yab'il kyib'aju' aj Israel, ex e'kyim wajxaq mutx' o'lajoj kal xjal (70,000).

15Tzajtzun tchq'o'n Dyos jun anjl xitulte Jerusalen. Tetzunj toktoq xitulte, tzaj tka'yi'n Qman Dyos, exch'yonju' xitb'il lu toj tk'u'j, ex tchaq' teju' anjl ntoq xitunte: ¡Tky'ixtzu'n, lalun txitljo'ntla! chij.

Atitoqu' tanjl Qman Dyos toju' kmuj lu ja ntriyina'toq Ornan jeb'usey.

16Tetzunj t-xitka'yi'n Dab'i, tilju' tanjl Qman Dyos atitoq kyxolu' kya'j tuk'i'lju' tx'otx', iq'i'ntoq jun tk'uẍtx'e'nb'il jawtznitl toj tja, nik'u'ntz ti'j Jerusalen. Ekub'tzun meje Dab'i kyuk'i'lju' tijwnaq, majx ku'punju' kyplaj twitz tx'otx', toktoq kyi'j jochin te b'is,

17xi'tzun tma'n Dab'i te Dyos:

—¡Ayinwe' ẍin q'mante tu'n tjaw kyajlalju' tnam! ¡Ayinweju'ye' ẍin b'inchan il ex ẍin b'inchanteju' myab'a'n! ¿Titi'tzunkye' xjal xkyb'incha lu mixti' kyil? Nman Dyos, chin kub'sale' teya, wib'ajwe' tu'n tkub' tz'aqa' tz'e'ysb'il witzb'aj ex kyib'aju' toj njaye', lalun che tky'ixb'saju'ya ttanama, chij.

Jawtb'incha'n Dab'i jun q'olb'eb'l(2 S 24.18-25)

18Tchaq'tzun tanjl Qman Dyostz tu'n txi' tma'n Kad te Dab'i tu'n tjaw tb'incha'n jun q'olb'eb'l te Qman Dyos ja intoq triyina' Ornan jeb'usey.

19Xi'tzun Dab'i b'inchalteju' xitma'n Kad te toj tb'i Qman Dyos.

20Atzu'n Ornan ju' intoq triyin, tej tanjtz ka'yinti'j, tilju' anjl, aye'tzu'n kyaje' tk'wal ate'toq tuk'i'l matxitoq che kub' ewan.

21Tetzunj tpon lq'e Dab'i ja ta'toq Ornan, xitka'yi'n Ornan ju' Dab'i ex etz jatoq in triyina' ex kub'joqe twitz Dab'i.

22Xi'tzun tma'n Dab'i te Ornan:

—Q'ontza najb'il jaintriyina'ya weye', tu'n tjaw b'inchet jun q'olb'eb'l te Qman Dyos toj. K'ayintza weye' kse'nxju' twi', tu'ntzun telju' tx'u'j yab'il toju' tnam, chij.

23Atzunte Ornan xittzaq'we'n te:

—Tzyuma nimaqkawil, ex b'inchama aju' b'a'n toj twitza. Che kxe'l nq'o'nwe' tman wakx te chojb'il k'ok'sb'il, exqe' aq'unb'il tu'n tel triy te si, atzu'n triy te oyaj. ¡Tkyaqil ja'lu kxe'l nq'o'ne' teya nimaqkawil! chij.

24Atzunte' nimaqkawil Dab'i xittzaq'we'n te:

—Chjonte teya, naq o'kx ati tu'n nlq'onteye' tkyaqil kse'nxju' twi', qu'n lay tz'el wiq'i'nju'ye' ati teya tu'n txi' nq'o'ne' te Qman Dyos ex tu'n txi' nq'o'ne' jun chojb'il k'oksb'il qa min xnloq'e', chij.

25Iktzu'n, xitchjo'n Dab'i junk'al lajnaq (600) piẍ q'anpwaq te Ornan twi'ju' najb'il,

26atzuntzu' tchaq'a' Dab'i tu'n tjaw b'inchet jun q'olb'eb'l te Qman Dyos ex e'kub' tq'o'n chojb'il k'ok'sb'il ex chojb'il te mujb'ab'ltib'il. Kub'santzuntz twitz Qman Dyos, ex tzaj ttzaq'we'n Dyos tuk'i'l q'aq' tzaj t-xon tzmax toj kya'j tib'aju' q'olb'eb'l te chojb'il k'osb'il.

27Tchaq'tzun Qman Dyostz teju' anjl tu'n tku'x tk'u'n jumajtlu' tk'uẍtx'e'nb'il.

Tkub'el tja Dyos

28Tetzunj tlonte Dab'i matxitoq tzaj tb'i'n Qman Dyos toju' kmoj lu ja intoq triyina' Ornan jeb'usey, kub' tq'o'n chojb'il atzu'.

29Maskye toju' ja xjan toj Kab'aon ta'toqju' ja xb'alun, jawtb'incha'n Moyses te Qman Dyos toj chq'ajlaj exju' q'olb'eb'l teju' chojb'il k'ok'sb'il,

30min b'ent txi' Dab'i xjelul te Dyos atzu', qu'n oktchi ti'j tej t-xitka'yi'n tk'uẍtx'e'nb'il tanjl Qman Dyos.