Sal 138 - Mam Ostuncalco Bible

Na'j Dyos aq'b'il chjonte te Qman Dyos

1Knq'a' chjonteye' teya Nman Dyos, tu'n tkyaqil nk'u'je';

kywitzku'pe' txqantl dyos chin b'itzale' teya.

2Chin b'el mejeye' tu'me'lju' tjaya xjan

q'ol chjonte teya tu'nju' tk'u'jlalila ex tyola njapun,

qu'n majaw tq'o'nju'ya tb'iya ex tyola

tib'aj tkyaqil ti'xti'.

3Tej nkub'sane' teya, intzaj ttzaq'we'na,

ex nim wipumale' tzaj tq'o'na.

4Che b'itzal kykyaqil nimaqkawil te twitz tx'otx' teya

aj t-xikyb'i'nju' yol kyejni ttziya'na.

5Kjawil ajwali'na Nman Dyos tu'n tkyaqilju' matxi' kub' t-xima'na,

qu'n nim toklenju' tajwalila.

6B'a'nqa tzmaxtzu' toj kya'j ta'ya Nman Dyos,

majx ka'yi'nju' xjal me's tu'na,

atzunju' ntnima'ntib' najchaq ta' ti'ja.

7Aya nxq'uqinte nchwinqlale',

tu'n tipumala

kse'n atinqine' toj xob'ajil,

inchin tklo'na te kytx'u'jilju' wajq'oje.

8¡Ktb'incha'ta tb'is tk'u'j weye' Nman Dyos!

Nman Dyos, tejumajxte' tk'u'jlalila;

¡Lalun kyejteneju' taq'una oje tzyet tu'na! Chiju' b'itzal.