1Kwajwali'ye' toklena Nman Dyos nnimaqkawil;
kjawil nnimsa'ne' tb'iya kukxju'.
2Kjawil nnima'na atl junjun q'ij;
kjawil wajwali'ne' tb'iya kukxju' ex tejumajx.
3Nimta toklen Nman Dyos ex o'kxta tu'n tajwalit;
layx qopon kanune' ti'ju' toklena.
4Kjawil kyajwali'n manb'aj ex k'wa'lb'aj tb'inchb'ena,
che kxe'l pakb'a'nju' taq'unb'ena nimaq kyoklen.
5Kxe'l kyoli'n toklena tb'anilxi'x,
ex che kxe'l nma'ne' tb'inchb'ena te lab'te'n.
6Che kxe'l kyoli'nju' tb'inchb'ena nimaq kyoklen ex xob'ajilqe'x,
ayintzunwe' chin yolile' ti'ju' toklena.
7kxe'l kyoli'nju' tk'u'jlalila nimxi'x,
ex kxe'l kyb'itza'n tnik'alilti'j ntb'incha'na.
8Che'wte Qman Dyos tk'u'j ex nq'aq'an tk'u'j,
ati tpasens ex nim tk'u'jlalil.
9B'a'nxi'x te Qman Dyos kye kykyaqil,
ex kye tilwi taq'unb'en tu'n.
10¡Jawxwit ajwali'na Nman Dyos, kyu'n kykyaqilju' tb'inchb'aja!
¡Jawxwit nima'na kyu'nju' njapun tyola kyu'n!
11¡Txi'wt kyoli'n t-spik'umalju' tkawb'ila!
¡Che'xwit kyoli'n tb'inchb'ena nimaq kyoklen!
12¡Che'xwit kyma'nju' tipumala kye xjal
exju' t-spik'umal tkawb'ila!
13Tejumajxte' tkawb'ila,
in kawina toj tkyaqil tab'q'iyil.
14Tzyu'n qekye' nche kub' tz'aq tu'na Nman Dyos
ex nche jaw twab'a'na numjniqe'.
15Kykyaqil nche ayon ti'ja
tu'n txi' tq'o'na kywa tojxi'x tq'ijlalil.
16Intzaj tq'o'na kywa tu'n tq'ob'a
inche noj kykyaqilju' tch'isb'ena tu'na.
17Tz'aqlixi'xta Nman Dyos toj tkyaqilju' ntb'incha'na,
nim t-xtalb'ila kyib'aju' taq'unb'ena.
18Nqaku' ta'ya Nman Dyos kyk'etzju' nche k'ulun teya,
inche kub'san tu'n tkyaqil kyk'u'j.
19Intzaj ttzaq'we'na nkyqani'nju' nche niman te;
aj t-xikyqani'n o'nb'il teya, nche tzaj tb'i'na ex nche tklo'na.
20Inche t-xq'uqi'na nche k'u'jlanteya Nman Dyos,
aye'tzu'n b'inchal myab'a'n nche kub' t-xitu'na.
21¡Kjawil wajwali'na Nman Dyos!
¡Kykyaqilxwit che niman teju' tb'iya xjan,
te ja'lo ex tejumajx! Chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
