1 Cr 5 - Mam Ostuncalco Bible

Tyajajil Rub'en

1-3Aye' tk'wal Rub'en, ju' tnejel tk'wal Israel, aye': Anok, Palu, Erson ex Karmi. Atoqte Rub'en tnejel k'wa'lb'aj, tu'ntzunju' kub'kẍe tuk'i'lu' t-xu'jil tman, qu'mtzun elju' toklen te tnejel k'wa'lb'aj, xi' kyaja'tlju' oklenj lu kyeju' tk'wal Jse, juntl tk'wal Israel. A pena'te Juda nimxi'x tipumal ten kywitzju' titz'in ex ttzik, ex ti'j ela' jun nejenel; atzunju' oklenj te tnejel k'wa'lb'aj tetoq Jse.

4-6Aye' tyajajil Joel ja'lu: a Semayiy tman Wow, atzu'n Wow tman Simi, atzu'n Simi tman Mikayiy, atzu'n Mikayiy tman Reayiy, atzu'n Reayiy tman B'aal, atzu'n B'aal tman B'eera, ju' nejenel kye tyajajil Rub'en, okx jpu'n tu'n Tiklat-pileser, nimaqkawil toj Asirya.

7Aye' titz'in B'eera ja'lu, kse'nxju' ttxolil tz'ib'a'na' kyb'iju' k'loj kyyajil, aye': Jeyel, ju' nim toklen, ex Sakariy

8ex B'ela tk'wal Asas, tchman Sema ju' tk'wal Joel. Kub' najan B'ela toj tnam Aroer ex tzmax pona' b'aju' ttx'otx' jata' Neb'o ex B'aal-meon.

9Ex najan tu'me'l tjawetzq'ij tzmax ja ulna' b'aju' chq'ajlaj pomnix ttziju' nin a' Ewprates, ojexi'x e'chmetju' talu'n toj tx'otx' Kalaad.

10Tej tkawin Sawul, e'q'ojinju' tyajajil Rub'en kyuky'i'lju' tyajajil awar, kub'kyi'j kyu'n ex e'kub'ten najal toj tjawetzq'ij teju' tnej tx'otx' Kalaad.

Tyajajil Kad

11Aye' tyajajil Kad, ju' e'najan tk'etz kytx'otx' tyajajil Rub'en, toju' tnej tx'otx' B'asan, pomnix toju' nintnam Salka.

12Aye': Joel, ju' tnejel, tkab' Sapan, toxi'n Jaanay, atzu'n tkyaji'n Sopat.

13Aye' kywitze'l ja'lu, kse'nxju' kyyajajil kyman: Mikael, Mesulam, Seb'a, Joray, Jakan, Siya ex Eb'er, wuq kyb'aj tu'n kykyaqil.

14Aye' ja'lu tk'wal Ab'yayil qe', ju' tk'wal Uri, atzunte Uri tk'wal Jaroa, atzunte Jaroa tk'wal Kalaad, atzunte Kalaad tk'wal Mikael, atzunte Mikael tk'wal Jesisay, atzunte Jesisay tk'wal Jado, atzunte Jado tk'wal B'us.

15A Ayi tk'wal Ab'dyel ex tchman Wuni, nejenel kye kykyaqilju' kyyajajil.

16Kykyaqil ja'lu e'najan kyoju' tx'otx' Kalaad, B'asan ex kyoju' kykojb'il, ex kyoju' tx'otx' te k'ik'leb'l toj Saron, pomnix ttziyile kynaqach.

17Kykyaqil ja'lu tz'ib'a'nqe' toju' tu'jil ja tz'ib'a'na'qe' k'loj kyyajajil toju' tq'ijlalil tej kyten Jotam, nimaqkawil toj Juda, ex Jerob'oam, nimaqkawil toj Israel.

Tqanil kyi'ju' kab'e' tnej kyyajajil tk'i' nik'jan

18Aye'ju' tyajajil Rub'en ex Kad, kyuk'i'l niky'janju' tyajajil Manases, kuw xjal qe'toq te q'oj, iq'i'mile kykolb'il, kyk'uẍtx'e'nb'il ex kysmaj, xnaq'tza'nqe' b'a'nxi'x tu'n kyq'ojin. Jo'mutx' junlajk'al wajxaqlajnaq (44,760) ichan b'a'nqe' te q'oj.

19E' q'ojin kyi'ju' tyajajil Awar, kyi'ju' tyajajil Jetur, tyajajil Napis ex tyajajil Nodad;

20atzunte Dyos onin kyi'j, aye'tzu'n tyajajil Awar kyuky'i'lju' kymujb'a'nkyib' kyuk'i'l kub'kyi'j kyu'n, qu'n xikyqani'n te Dyos toju' q'oj lu tu'n tonin kyi'j. Onin Qman Dyos kyi'j qu'n okqe kyk'u'j ti'j.

21Ex b'ajx kyiq'i'n kyalu'nju' kyajq'oj, qaqmutx' jok'al (50,000) kamey, junaq junlajoj mutx' jok'al (250,000) rit, ex atzun jok'al (2,000) b'ur. Expe' exi'kyjtz'o'n kab'lajmutx' lajk'al (100,000) xjal tu'n kyokx kyjpu'n.

22Nim ajq'oj e'kyim kyu'n, qu'n atoq Dyos nq'ojin. E'kyajtzun tenju' tyajajil Rub'en najal atzu', tzmaxi'j tej kyex iq'i'n toju' kytx'otx'.

23E'kub' najanju' nik'jan tyajajil Manases toju' jun tnej tx'otx' xi'nix toj B'asan ex pomnix toj B'aal-emon, Senir ex twi' witz Ermon, qu'n nimtoq kyb'aj.

24Aye' nejenel ja'lu teyile kyyajajil kyman: Eper, Isi, Elyel, Asryel, Jeremiy, Odab'iy ex Jadyel, kykyaqil ja'lu xjalqe' te q'oj min nche xob', nim kyoklen ex nejenelqe' kyeju' kyyajajil kyman.

25Jawtzun kyi'nkyib' ti'ju' Kydyos kyyajilb'en ex min e'nimantl te, e'aq'wi k'ulul kywitz kydyosu' tnam, ju' ojetoq che kub' t-xitu'n Dyos ex eb'je'l tiq'i'n kywitz.

26Tu'ntzun tpaju', tzaj tchq'o'n Qman Dyosju' Pul, nimaqkawil toj Asirya, axju' Tiklat-pileser, ju' exq'inkyeju' tnej tyajajil Rub'en ex Kad, exqe' nik'jan tnej tyajajil Manases toju' kytx'otx'; e'xitiq'i'n kyoj Ala, Ab'or, Ara ex ttziju' nin a' Wosan, jaekyaja' ten.