1 Cr 19 - Mam Ostuncalco Bible

Kub'kyi'j aj Sirya ex aj Amon tu'n Dab'i(2 S 10.1-19)

1Yajxi'tzuntel kyim Naas, kynimaqkawil aj Amon, ex atlju' tk'wal kawin te t-xel.

2Kub'tzun t-xima'n Dab'i qa oktoq k'okyel majx b'a'n tuk'i'l Anun, tk'wal Naas, qu'n majx b'a'n oka'ju' tman tuk'i'l, e'xitchq'o'n junjun sanjelal tu'n kyxi' q'olb'elte Anun tu'n tkyimlenju' tman. Tetzunj kyponju' ajb'el te Dab'i toju' kytx'otx' aj Amon,

3xikyma'n kynejel aj Amon te Anun kjalu: ¿Ma nxitoksla'na nimaqkawil qama che tzaj tchq'o'n Dab'i ichan lu q'olb'el, qa naq tu'n kyniman te tkyimlenju' tmana aya nimaqkawil? ¡Nenul ex ka'yilteju' qtx'otx' ẍe u'la' kye'lu! chechij te.

4Tchaq'tzun Anuntz tu'n kyokx jpu'nju' ajb'el te Dab'i, ex tu'n tb'je'l jonju' kyxmatzi exju' t-xya'mal kywi', ex tu'n tkub' laqu'nju' kyi'j ku'punx twi' kyẍo'p. E'etz tchq'o'ntzuntz.

5Tetzunj txi' q'unb'aj te Dab'i aju' b'inchanjtz kyi'ju' ichan lu, tchaq' tu'n kyxi' k'ulb'aj, qu'n matxi'toq tz'el kych'ixaw, ex tu'n txi' q'ma'n kye tu'n kykyaj tenpun toj Jeriko tzmaxi'j aj tch'iy jumajtlju' kyxmatzi, b'a'n kyanjtzuntz.

6Kane toj kywitzu' aj Amon qa matxi'toq che ok ajq'oj ti'j Dab'i, qu'mtzun xikysma'n Anun kyuky'ilu' aj Amon junk'al oxlajnaq (660) kyintal saqpwaq kyoj Mesopotamya, Sirya, Maaka ex Sob'a, tu'n kytzaj majena' karwaj te q'oj, ex tnej xjal te q'oj kyi'j chej,

7kyajmutx' (32,000) karwaj te q'oj tzaj kymajena'n, tuk'i'lxi' nimaqkawil toj Maaka kyuk'i'lju' t-xjal te q'oj. E'b'aj pon ex b'ajkub' kychmo'nkyib' tk'etz Medeb'a. Expe' eb'je'tzju' aj Amon kyoju' nimaqkytanam ex b'aj kyb'u'yi'n kyib' tu'n kyq'ojin.

8Tb'itzun Dab'i ja'lu, ex xitchq'o'n Joab' kyuky'i'l kykyaqilju' xjal te q'oj.

9E'tzaj lq'e aj Amon ex b'aj kyb'incha'n kyten tu'n kyq'ojin ttzi nintnam. Aye'tzu'n nimaqkawil e'tzaj kyuk'i'l e'kyajten toj kojb'il.

10Tetzunj tka'yinte Joab' xi'toq kytzaj q'ojil twitzxi' ex ti'jxi', e'jaw t-sk'o'n t-xjal b'a'nxi'x che q'ojin kyxol aj Israel ex tb'inchatib' tu'n tq'ojin kyi'ju' aj Sirya.

11Ex e'kub' tq'o'n jni'tl xjal te q'oj tjaq' tkawb'il Ab'isay kyitz'inkyib' tuk'i'l, tu'n kyq'ojin kyuk'i'l aj Amon,

12ex xitma'n te: Qa kuwxi'x che q'ojin aj Sirya kye nwitze', ktzajela onilweye', qatzun kuwxi'x che q'ojin aj Amon kyetwitza, chin onile' ti'ja.

13Kuwsam tib'a, ex kuwqo'x tu'n qq'ojin tu'nelju' ninqtanam ex kyu'nel nimaqttanam Qman Dyos. ¡Tb'inchaxwittzun Qman Dyos aju' b'a'n toj twitz! chij te.

14Xi'tzu'n Joab' kyuk'i'lju' t-xjal q'ojil kyi'ju' aj Sirya, aye'tzunkye e'kub' oq twitz.

15Tetzunj kyka'yinte aj Amon e'kub' oqu' aj Sirya, ex ikxkye e'kub' oq twitz Ab'isay kyitz'inkyib' tuk'i'l Joab', ex eb'jo'kx toju' nintnam. Anjtzun ti'j Joab'tz toj Jerusalen.

16Tetzunj kylonte aj Sirya matxi'toq kub'kyi'j kyu'n aj Israel, exi' kychq'o'n jte' xjal q'malte tu'n kytzaju' aj Sirya ate'toq jlajxi' nin a' Ewprates. Atoq Sopak nejenel kye, ju' nejenel kye t-xjal Adad-eser te q'oj.

17Xi'tzun q'ma'n ja'lu te Dab'i, eb'ajxtzun tb'u'yi'n kykyaqil aj Israel, e'ik'x jlajin toju' nin a' Jordan, exi'lq'e ex e'kub'ten tu'n kyq'ojin. E'kub' tnk'u'n Dab'i t-xjal te q'oj tu'n kyq'ojin kyi'ju' aj Sirya, ex e'q'ojin aj Sirya kyi'j,

18o'kx kykub' oq kywitzu' aj Israel, qu'n jo'mutx' (40,000) kyxjal tu'n kyqan e'kub' tb'yo'n Dab'i, atzun wuqlajk'al lajnaq (7,000) kyoju' kykarwaj te q'oj; expe' kub' tb'yo'n Dab'i Sopak, nejenel kye aj Sirya te q'oj.

19Tetzunj kyka'yinteju' mojb'a'ntoq kyib' tuk'i'l Adad-eser matxi'toq kub'kyi'j kyu'n aj Israel, kyma tu'n tten nak'b'il kyxol tuk'i'l Dab'i, e'kyajtentzuntz tjaq' tkawb'il. Atxi'xtzunj, min kyajtlju' aj Sirya tu'n kyonin kyi'ju' aj Amon.