Sal 136 - Mam Ostuncalco Bible

Tk'u'jlalil Qman Dyos tejumajx kyi'j aj Israel

1Kyq'onx chjonteye' te Qman Dyos, qu'n majx b'a'n te,

qu'n tejumajxju' tk'u'jlalil.

2Kyq'onx chjonteye' te Dyos, aju' nimxi'x toklen kyib'aj txqantl dyos,

qu'n tejumajxju' tk'u'jlalil.

3Kyq'onx chjonteye' teju' Qman Dyos in kawin kyib'aj xjal ati kyoklen,

qu'n tejumajxju' tk'u'jlalil.

4Qu'n o'kxte nb'inchankye nimaq ti'xti' te lab'te'n,

qu'n tejumajxju' tk'u'jlalil.

5Teju' b'inchante kya'j tuk'i'l nab'l,

qu'n tejumajxju' tk'u'jlalil.

6Teju' kub' q'onte tx'otx' tib'aj a',

qu'n tejumajxju' tk'u'jlalil.

7Teju' kub' b'inchante q'ij ex xjaw,

qu'n tejumajxju' tk'u'jlalil:

8kub' tb'incha'n q'ij tu'n tk'ent te q'ijtl,

qu'n tejumajxju' tk'u'jlalil;

9exju' xjaw kyuk'i'lju' che'w tu'n kyk'ent te qonik'an,

qu'n tejumajxju' tk'u'jlalil.

10Kyq'onx chjonteye' teju' kub' b'yonkye tnejel kyk'wal kykyaqilju' aj Ejipt,

qu'n tejumajxju' tk'u'jlalil.

11Teju' etz iq'inkye aj Israel toj Ejipt,

qu'n tejumajxju' tk'u'jlalil;

12tej txi' tnuqpi'n tq'ob' tuk'i'l nim tipumal,

qu'n tejumajxju' tk'u'jlalil.

13Teju' aq'punte Kyeq Ninnjab',

qu'n tejumajxju' tk'u'jlalil.

14Teju' ik'xq'inkye aj Israel toj ninnjab',

qu'n tejumajxju' tk'u'jlalil.

15Teju' kyej mulq'inte Paraon kyuk'i'l t-xjal te q'oj toju' Kyeq Ninnjab',

qu'n tejumajxju' tk'u'jlalil.

16Teju' xiq'inte ttanam toj chq'ajlaj,

qu'n tejumajxju' tk'u'jlalil.

17Teju' kub' b'yonkye nimaqkawil,

qu'n tejumajxju' tk'u'jlalil.

18Teju' elq'inte kychwinqlalju' nimaqkawil nim kyipumal,

qu'n tejumajxju' tk'u'jlalil:

19Teju' kub' b'yonte Siyon, nimaqkawil kye amorey,

qu'n tejumajxju' tk'u'jlalil;

20Teju' kub' b'yonte Ow, nimaqkawil te B'asan,

qu'n tejumajxju' tk'u'jlalil.

21Teju' kub'sipante kytx'otx'ju' nimaqkawil lu,

qu'n tejumajxju' tk'u'jlalil,

22tzaj tq'o'ntzuntz te kyetzb'il aj Israel tmajen,

qu'n tejumajxju' tk'u'jlalil.

23Teju' ntzaj na'nqe kse'n ato'qo' toj yajb'il,

qu'n tejumajxju' tk'u'jlalil.

24Teju' nklonqe kyeju' qajq'oj,

qu'n tejumajxju' tk'u'jlalil.

25Teju' intzaj q'onte kwa xjal ex kwa alu'mj,

qu'n tejumajxju' tk'u'jlalil.

26¡Kyq'onx chjonteye' teju' Qman Dyos te toj kya'j,

qu'n tejumajxju' tk'u'jlalil! Chiju' b'itzal.