Sof 3 - Mam Ostuncalco Bible

Til Jerusalen ex kolb'ilte

1¡Layxwitju' Jerusalen, pi's nintnam,

tz'ilsa'ntib' ex jtz'ol xjal!

2Minti' xitb'i'nju' tq'ojq'ojel twi' Qman Dyos

ex minti' taq' tzak'u' tib';

minti' sok qetk'u'j ti'j;

ex minti' xi' lq'e tk'etz Dyos.

3Nche' tzanunju' nejenel kye naku'j b'alun;

aye'tzunju' ajkawil kye, naku'j xo'jqe' toj chq'ajlaj

mixti' nkyaj kyq'o'n jun b'aq te prim.

4Aye'ju' kysanjelal mixti'x knab'l,

nche' b'jaw meltz'uj;

aye'ju' kpale nkub' ktz'ilsa'nju' xjanb'il

ex nche' ik' tib'aju' tkawb'il Qman Dyos.

5Atzunte Qman Dyos ati toju' nintnam;

ntb'incha'n b'a'n, myaju' taq'wix.

Atl prim nche ok xjal toj xjel tu'n.

Atzunte xjal b'inchal myab'a'n

mixpeti'x tojtzqi'n ch'ixaw.

6Ate Qman Dyos ntma'n kjalu:

Matxi' che b'ajnxitu'ne'

nimaqtnam

matxi' che b'aj kub' nxitu'ne'

ja nimaq kywe' exju' kytapi

ex matxi' che b'ajkyaju' kyxk'ichb'e

wu'ne' te chq'ajlaj,

mixti'tl jun xjal nb'et toj.

¡Toju' ninttanam tjunalx

mixti' jun xjal najli toj!

7Kub' nximane': Aju' Jerusalen kxob'el weye'

ex oklo tq'a kawi tib' weye;

tu'ntzun lalun kyej xitju' tja

tu'nju' matxi' kub' tz'e'yset twitz.

Aye'tzunkye ma'pe' che'x xi'xtl

b'inchal chukchaq il.

8Qu'mtzun, che ayone' ti'ju' q'ij

ajnjawe'ye' yolil taq'wix kyi'je'.

Ayine', Dyos Manb'aj nchin q'mante:

matxi' kub' nxima'ne' tu'n kytzaj b'u'yitju' nimaqtnam exqe' kawb'il

tu'n ttzaj nb'ajsa'ne' ntx'u'jile' kyib'aj,

aju' ntx'u'jile' inxi'x k'ant.

¡Tkyaqilju' tx'otx' kjel xitj

tu'n tkyeqil ntx'u'jile'!

9Ajtzun tponju' q'ij lu, knẍtilsa'ye'

kyolju' tnam,

tu'ntzun kykyaqilx che txokyil weye',

ex tu'n kykyaqilx tu'n kyajb'en weye'.

10Toju' jun plajtl kyeju' a' te Etyopiy,

tzulju' ntaname' b'ajxni sputj kub'sal

tuk'i'l oyaj weye'.

11Tojtzunju' tq'ijlalil lu,

lalun jaw ch'ixwitla ntanam

te junju' tb'inchb'aja

tej sel tpa'ntib'a wi'je',

oktzun che elel wiq'ine' ti'ja

aye'ju' la'jil kyib' ex nimal kyib',

ex lalun jaw tnima'ntl tib'a

twi'ju' witz xjan weye'.

12Che kjel nq'o'ne' xjal me'sqe' kxole'

ex mya nimal kyib',

atzu' k'okyela' qe' kyk'u'j wi'je'.

13Aye'ju' kche kjel anq'in toju' tnam te Israel

lalun che b'inchan mya tnik'alti'j,

lay che chanyol,

ex lay ten sb'ujtib'il toj ktzi.

Kche wal ex kche ojlal

mixti' xob'ajil kye.

B'itz te tzalajb'il tu'n Jerusalen

14¡B'itzana nintnam te Syon!

¡Che ẍch'ine' tu'n tzalajb'il, tnam te Israel!

¡Tzalajxa, Jerusalen,

tzalajxa tu'n tkyaqil tanmiya!

15Matxi' tz'eltiq'i'nte Qman Dyos tz'e'ysb'il twitza

ex matxi' che eltik'o'n tajq'oja.

Ate Qman Dyos, nimaqkawil te Israel, ati kyxole':

Mixti'tl tu'n t-xob'a te jun taq'wix.

16Tojtzunju' tq'ijlalil lu kxe'l q'ma'n te Jerusalen:

¡Lalun xob'a, Syon,

ex lalun taja tu'n tel kyipumalju' tq'ob'a!

17Atite' Qman Dyos kxole';

¡kuwxi'xte', ex kkletela tu'n!

Ntzalaj te Qman Dyos ti'ja.

Kxe'l tq'o'nju' ak'a'j chwinqlal teya tu'nju' tk'ujlalil;

ex kb'itzil toju' ttzalajb'il

18Kse'n toj ninq'ij.

Chi Qman Dyos kjalu:

Kntzaqpi'ya teju' taq'wix kxi'toq ttzaj ti'ja,

teju' ch'xawil ju' al tib'aja.

19Knq'a'ye' tu'me'l t-xel kyeju'

kykyaqilju' mache okten yajulteya.

Kchin onile' ti'ju' rit nkoxjne

ex ktzajel wiq'inju'ye' xi'nitz'aq;

kche jawil nimane' ex b'a'n yolb'il kyeye'

toj tkyaqil twitz tx'otx',

aye'ju' ik'b'il kyeye' xb'inchanjtz.

20Tojtzunju' tq'ijlalil lu

che ktzajel wiq'ine', kche tzajel nb'u'yine';

knch'exb'eye' kyanq'ib'le',

b'a'n kyolinjtze' ex ninb'el kyeye'

kxol kykyaqilju' tnam twitz tx'otx'.

Ayine', Dyos Manb'aj nchin q'mante.