Lv 15 - Mam Ostuncalco Bible

Xnaq'tzb'il tib'aj ttz'ilil ichan

1-2Tzaj tma'n Qman Dyos kye Moyses ex Aaron tu'n t-xi' kyma'n kye aj Israel kjalu:

Qama tzaj yab'il toj ttz'a'lb'il jun ichan, kjelten tz'il.

3Aju' tz'il tu'n tpaju' ij yab'tl inel qojl kukxju' toj twi'ju' ttz'a'lb'il mujqa mamqet toj twi' ttz'a'lb'il tu'nxju' yab'il, tu'nju' lu in kyejten xjal tz'il.

4Jaxjaku' makub'a' kẍeju' ichan lu ex ja makyaja' qojl txqantl tu'n, kjel tz'il.

Alkyexku' ti'xti' jamakub'a' qe, kjel tz'il.

5Alkyexku' matxi tzyunteju' jamakub'a' kẍeju' ichan lu, ati tu'n ttxjonteju' t-xb'alun ex tu'n ttxjontetib' tu'n a', ex kjelten tz'il tzmaxi'j ajqok yupj.

6Alkyexku' makub' qe tib'aj tq'uqb'lenju' ichan lu, ati tu'n ttxjonteju' t-xb'alun ex tu'n ttxjontetib' tu'n a', ex kjelten tz'il tzmaxi'j ajqok yupj.

7Alkyexku' matxi tzyunteju' inel qojl ij ti'j, ati tu'n ttxjonteju' t-xb'alun ex tu'n ttxjontetib' tu'n a', ex kjelten tz'il tzmaxi'j ajqok yupj.

8Qama tz'ok ttzub'a'nju' yab' ti'j jun xjal b'a'n, aju' xjal lu ati tu'n ttxjonteju' t-xb'alun ex tu'n ttxjontetib' tu'n a', ex kjelten tz'il tzmaxi'j ajqok yupj.

9Alkyexku' iqb'il xjal ti'j chej matz'ajb'en tu'nju' inel qojl ij toj twi' ttz'a'lb'il, kjelten tz'il.

10Alkyexku' matxi tzyunte jun ti'xti' jamakub' qeya'ju' yab' lu, kjelten tz'il tzmaxi'j ajqok yupj.

Alkyexku' matxi iq'inte junju' ti'xti' lu, ati tu'n ttxjonteju' t-xb'alun ex tu'n ttxjontetib' tu'n a', ex kjelten tz'il tzmaxi'j ajqok yupj.

11Alkyexku' matz'ok tzyunteju' in qojl ij ti'j exqa mixti' xtx'jon tq'ob', ati tu'n ttxjonte t-xb'alun ex tu'n ttxjontetib' tu'n a', ex kjelten tz'il tzmaxi'j ajqok yupj.

12Ati tu'n tkub' pa'yetju' tx'otx' k'wil qama txi' ttzyu'nju' inel qojl ij ti'j; aye'tzu'n ti'xti' tzeqe' ati tu'n kytx'jet.

13Qatzun mab'anixju' ichan lu teju' tyab'il tu'n ij, ati tu'n t-ẍtilsantetib' toj wuq q'ij; kttxja'ju' t-xb'alun ex kttxja'tib' tu'n a' tzajnix toj t-xiklil, kjeltzuntz ẍtilun.

14Tojtzun twajxaqi'n q'ij ktzajel tiq'i'n kab'e' xlak'uk' mujqa kab'e' tal paloms, kxe'ltzuntz ttziju' Ja te Mujb'ab'ltib'il tu'n t-xi' tq'o'n teju' pale nwitze'.

15Atzu'n pale kb'eltq'o'n jun te chojb'il tu'n tpaj il, atzu'n juntl te chojb'il k'ok'sb'il, iktzu'n ktb'incha'ju' ẍtilsab'l teju' ichan yab' tu'n ij nwitze' ayine' Dyos Manb'aj.

16Qa ati jun ichan matz'el qojlju' ij toj twi' ttz'a'lb'il, kttxja'tib' tkyaqilju' t-xmilal toj a' ex kjelten tz'il tzmaxi'j ajqok yupj.

17Alkyexku' xb'alun mujqa tz'u'n makub' qojlju' ij tib'aj, ati tu'n txjet tu'n a' ex kjelten tz'il tzmaxi'j ajqok yupj.

18Qama kub' kẍe jun ichan tuk'i'l jun qya, kykab'ilx ati tu'n kytx'jonte kyib' tu'n a' ex che kjelten tz'il tzmaxi'j ajqok yupj.

Xnaq'tzb'il tib'aj kytz'ilil qya

19Ajtkb'u'l ttx'ajin jun qya, kjelten wuq q'ij tz'il.

Alkyexku' matxi tzyunte, kjelten tz'il tzmaxi'j ajqok yupj.

20Alkyexku' ti'xti' jamakub'a' kẍeju' qya lu toju' tq'ijlalil aj tkb'u'lju' ttx'ajin, kjelten tz'il.

Alkyexku' ti'xti' jamakub'a' qe, kjelten tz'il.

21Alkyexku' matxi tzyunteju' tkuẍb'len, ati tu'n txjonteju' t-xb'alun ex tu'n ttxjontetib' tu'n a', ex kjelten tz'il tzmaxi'j ajqok yupj.

22Alkyexku' matxi tzyunte jun ti'xti' jamakub'a' qeju' qya lu, ati tu'n ttxjonteju' t-xb'alun ex tu'n ttxjontetib' tu'n a', ex kjelten tz'il tzmaxi'j ajqok yupj.

23Qama txi' ttzyu'nju' tkuẍb'len mujqa tq'uqb'lenju' qya lu, kjelten tz'il tzmaxi'j ajqok yupj.

24Qama kub' kẍe jun ichan tuk'i'lju' qya lu, matxi' tz'el tiqa'nju' ttz'ilil, kjel tentzun wuq q'ijtz tz'il, ex ikxju' jamakub'a' kẍe.

25Qa nab'en ati jun qya matz'el qojl chik' ti'j na'mxtoq tjapun tq'ijlalil tu'n tkb'u'lju' ttx'ajin, exqa maqojl b'a'npun q'ij, mujqa matenxi'xtl tq'ijlalilju' ttx'ajin, kjelten tz'il tzmaxi'j aj tqjenju' chik' ti'j, naku'xwitloj kse'n aj tkb'u'lju' ttx'ajin.

26Jaxjaku' mawtana'ju' qya lu ex alkyexku' ti'xti' jamakub'a' qe akxku' in qojlu' chik' ti'j, kjelten tz'il, ikxju' kse'n ati toj tq'ijlalil aj tkb'u'lju' ttx'ajin.

27Alkyexku' matxi tzyunkyeju' ti'xti' lu, kjelten tz'il. Ati tu'n ttxjonte t-xb'alun ex tu'n ttxjontetib' tu'n a', ex kjelten tz'il tzmaxi'j ajqok yupj.

28Ajtzun tqjenju' chik' ti'j, b'a'n tu'n t-xi' tajla'n wuq q'ij, tb'ajlenxi'tzu'n wuq q'ij kjel ẍtilun.

29Tojtzun twajxaqi'n q'ij ktzajel tiq'i'n kab'e' tal xlak'uk' mujqa kab'e' tal paloms, che kxel tiq'i'ntzuntz teju' pale ttziju' Ja te Mujb'ab'ltib'il.

30Kb'eltq'o'n pale jun te chojb'il tu'n tpaj il, atzu'n juntl te chojb'il k'ok'sb'il. Iktzun ktb'incha' paleju' nwitze' ayine' Dyos Manb'aj tu'n t-ẍtilsetju' qya teju' chik' sel qojl ti'j,

31ikytzu'n che elela' kylaq'b'a'ne' aj Israel ti'ju' kytz'ilil, tu'n lalun che kyim tu'ntpaj qama b'aj kytz'ilsa'n najb'il ja najla' qine' kyxole', chi Dyos.

32Aye'tzun xnaq'tzb'il ja'lu kyi'ju' ichan inel qojl ij toj twi' kytz'a'lb'il ex kyi'ju' inel qojl junjun maj kyi'j, ju' inche kyejten tz'il tu'nju' yab'il lu;

33ex kyi'ju' qya inkb'u'l kytx'ajin toj xjawi'n ex kyi'ju' naqx in kb'u'l qojl chik' kye na'mtoq tkb'u'lju' kytx'ajin. Aye'tzun xnaq'tzb'ilju' tu'n tb'inchet kyeju' ichan mujqa kyeju' qya, ex kyeju' ichan inche kub'kẍe tuk'i'l jun qya ati toj tq'ijlalil ttx'ajin.