1Tkyimlenxi'tzun Sawul, kub'kyi'j aj Amalek tu'n Dab'i. Kyejtzun ten kab'e' q'ij Dab'itz Siklaj.
2Tojtzun toxi'n q'ij pon jun xjal te q'oj tzajni kyxolju' t-xjal Sawul matxi'toq b'aj t-ẍilu'nju' ti'j ex txqantoq tx'otx' toj twi' te yek'b'il b'is. Tej tpon twitz Dab'i, kub' meje majx kub'joqe twitz tx'otx' tuk'i'l ninb'il.
3Xi'tzun t-xjelu'n Dab'i te:
—¿Jasaja'ya?, chij.
—Ma chintzaj oqe' toju' kyxmuj aj Israel te q'oj, chiju' ichan xittzaq'we'n.
4—¿Titi'tzu'n xb'ajkyeye'? ¡B'inchama xtalb'il, q'mantza!, chi Dab'i okten qanilte.
Xi'tzun tma'nju' ichan:
—Mache kub' oqju' xjal ate'toq toju' q'oj, ex nimqe'ju' matxi' che b'aj. ¡Matxi' pena' b'aj Sawul tuk'i'l Jonatan ju' tk'wal!, chij.
5—¿Jatzun xtb'iya'ya qa matxi' b'aj Sawul ex Jonatan ju' tk'wal?, chi Dab'i xitqani'n te.
6Xitzun ttzaq'we'nju' ichan:
—Atinqintoqku'ye' twi' witz Kyilb'oa, tej xxi' nka'yi'ne' Sawul lutx'loktoq ti'ju' tch'ut, ex wile' ch'inxtoq tkub'ti'j kyu'n tajq'oj ate'kx ti'j chej ex kyoj karwaj.
7Texjtzunju' kmuj sanjtz ka'yin ti'jxi', tetzunj ẍin tile', ẍinx ttxko'ntzuntze'. Ku, nchije' ẍinxe' tk'etz.
8Saj tqani'ntzuntz alkyeqintoqe', xxi' nma'tzuntze' qa aj Amalek qine'.
9Saj tma'ntzuntz tu'n nponxi'xtle' tk'etz ex tu'n tkub' nb'yo'ne' jun elx, qu'n matxitoq tz'ok toj k'ixk'oj extzun itz'xtoq.
10Qu'mtzun ẍinpon lq'eye' tk'etz ex makub' nb'yo'ne', qu'n makane toj nwitze' qa laytoq b'entl tanq'in tkub'lenxi' ti'j. Ex matz'el wiq'i'ne' tkoron toj twi' exu' ti'j tq'ob' te oklenj, tu'n ttzaj wiq'i'ne' teya, taye, chij.
11Kub'tzun kyẍilu'n Dab'i kyi'j kyuk'i'lju' t-xjal te yek'b'il b'is,
12e'oq'tzuntz b'a'nxi'x ex e'mewayin tzmax qonik'an kyi'j Sawul ex Jonatan, qu'n e'ex ch'yon toj kyk'u'j, ex tu'nju' kub'kyi'j aj Israel t-xjal Qman Dyos te q'oj.
13Yajxi'tzuntel xitqani'n Dab'i teju' ku'xun pon q'inte tqanil:
—¿Ja najla'ya?, chij.
Atzunte xittzaq'we'n:
—Te najchaq xjal qinwe', aj Amalek qine', chij.
14Atzunte Dab'i xitma'n te:
—¿Se'n taq'witzun saq'pon tq'ob'a ti'ju' nimaqkawil sk'o'n tu'n Qman Dyos?, chij.
15Ex tzaj ttxko'n jun t-xjal te q'oj, ex tchaq' te:
—¡B'yonku'ya!, chij.
Aq'pon tb'yo'ntzuntz ex majx kyim tu'n,
16nxi'ku'toq tma'n Dab'i:
—Tu'nx tnab'la kykyimela'ya, qu'n axa xq'mante qa aya xkub' b'yonteju' nimaqkawil sk'o'n tu'n Qman Dyos, chij te.
Kyb'isjil Sawul ex Jonatan17Xitb'itza'n Dab'i jun b'itz te b'is tu'nju' kykamik Sawul tuk'i'l Jonatan ju' tk'wal,
18ex tchaq' tu'n txi' xnaq'tza'n kyeju' aj Juda. Xi' tz'ib'a'na'ju' b'itz lu toju' Kyuj Nimaqxjal Tnik'alkyi'j:
19¡Ayy Israel,
matxi' b'aju' tipumala kywi' witz!
¡Se'n taq'wi xkub' kyi'ju' nimaq q'ojil!
20Laluntzun t-xikyq'o'ne' tqanil toj Kat
ex lalun txikyma'ne' kyoj xky'ichb'e toj Askalon,
tu'n miche tzalaja' qya pilistey
tu'n miche xlik'puna'ju' qya mib'a'n che niman te Qman Dyos tu'n kytzalajb'il.
21¡Layxwit tzajtl jb'al ex mixwit kub'a' ta'l che'w
kyib'aje' witz toj Kilb'oa,
qu'n mache okye' tnajb'il kamik!
Atzu' eb'aja' wab'e'na' kolb'il kyeju' nimaq q'ojil.
Atzu' xkub'aja' tqoptz'ajilju'
tkolb'il Sawul.
22Mixti' jumaj ma'wt tz'anjtz kyi'j Sawul ex Jonatan
mixwitti' kychk'el ex ky-until
nimaq q'ojil min nche xob'
ti'ju' kyk'uẍtx'e'nb'il ex tal kysmaj.
23Majxtoq b'a'n xjalqe' Sawul ex Jonatan, inxi'xtoq che tzalaj xjal kyi'j,
mi kyelen tekyib' tej itz'qe'toq ex junx ẍe kyim.
¡Ojqelxi'xtoq che b'et kyekywitz t'iw!
¡Kuwqe'xi'x kyekywitz b'alun!
24¡Che oq'e' tmyal Israel ti'j Sawul,
qu'n intoq che ktxunjtze' tu'n toj xb'alun kyaq smo'n tky'i cha'x ex tz'umin sed,
ex intoq oktq'o'n kyilb'ilal q'anpwaq ttxa'nile!
25¡Se'n taq'wi xkub' kyi'ju' nimaq q'ojil
toju' kojb'il jab'aja' q'oj!
¡Kywi' nimaq witz xkyima' Jonatan!
26¡Nchin b'isune' b'a'nxi'x ti'ja witz'in, Jonatan!
¡Majx b'a'n xjal soka'ya weye'!
nimxi'x soka' tk'u'jlalila weye'
kyetwitz kyk'u'jlalil qya.
27¡Se'n taq'wi xkub'a' kyi'ju' nimaq q'ojil!
¡Matxi'tzun che kub' xitu'nju' q'ojb'il! chi Dab'i toju' tb'itz.
Who We AreWhat We EelieveWhat We Do
2025 by iamachristian.org,Inc All rights reserved.
