Is 43 - Mam Ostuncalco Bible

O'kxte' Qman Dyos kolol

1Atzu'n ja'lo Israel, tyajajil Jakob'

Chi Qman Dyos b'inchanteya kjalu:

Lalun xob'a, qu'n matxi' kletta wu'ne';

tzaj ntxko'ne' tb'iya, wena'ta.

2Qama tzik'a' toj a', chin tenb'ilwe' tuk'i'la,

qama tzik'a' toj tnimal a', lay jaq'wiya;

qama tzik'a' toj q'aq', lay tz'e'ya,

lay jaw k'enta.

3Ayinwe' tajawa, klolteya,

ayine' Dyos xjan te Israel.

Malq'etta wu'ne';

matxi' che'x nq'o'ne' Ejipt, Etyopiy ex Seb'a

te chojb'il te kolpib'lteya,

4qu'n in nk'u'jla'na,

nim toklena ex kye tilwiya wu'ne'.

Nche'x nq'o'ne' xjal ex nimaqtnam

tu'n ttena weye' ex tu'n tkleta.

5Lalun xob'a, atinqina'we' tuk'i'la.

Che tzajel nb'u'ne' t-xjala

toj tjawetzq'ij ex toj tkub'exq'ij.

6Kxe'l nma'ne' toj tb'a'nq'ob'kya'j: Anjsanqe'tza,

atzu'n toj tnayajkya'j: Lan che kyajtiq'i'na.

Iq'inqe'tza nk'wale' ex nmyale'

tzmax najchaq, tzmax mankb'il ttxa'n tx'otx',

7kykyaqilju' iq'i'n nb'iye' kyu'n,

aye' e'kub' nb'incha'ne' ex eb'enti wu'ne',

aye' e'kub' nb'incha'ne' tu'n njaw nima'ne', nchije'.

8Kyiq'intze' ntaname',

ati twitz naq a min ka'yin,

ati t-ẍkyin naq a min b'in.

9Kyb'uyimkyib'e' kykyaqile' tnam,

kyb'uyim kyib'e' nimaqtnam.

¿Alkye junkye ojetoq tmaju' lu,

mujqa matxi'toq tmaju' matxi' tzik' ojtxi'?

Che kyq'onk tziyal ti'j tu'n kymante qa ax,

tu'ntzun tb'injtz ex tu'n tq'manjtz qa ax, chij.

10Chi Qman Dyos ntma'n:

Aye'kye' tziyal wu'ne',

aye'ye' nmajine', esk'ete' wu'ne'

tu'n telkynik'e' weye' ex tu'n tqe kyk'u'je' wi'je'

ex tu'n tkane toj kywitze' alkyeqine'.

Mixti'xi' juntl dyos oje ten nejtl nwitze',

ex lay ten juntl yajxi'tel.

11O'qinkxwe' Dyos Manb'aj;

mix-a'lo' juntl kkolol qa myayine', chij.

12Intma'n Qman Dyos kjalu:

Xinma'ne' ex xinpakb'a'ne': e'nkole';

mya junxi'tl dyos xb'inchante,

ex kanli kywitze'.

13Ayinweju'ye' Dyos kukxju'.

Mix-a'lo'te ktzaqpilkyeye' toj nq'ob'e'.

Mix-a'lo'te kxitulte nnb'incha'ne', chij.

14Chi Qman Dyos Xjan kye aj Israel kjalu:

Che kxe'lnchq'o'n xjale' B'ab'ilon

naqx tu'n kyklete'

ex che njqa'ye' kykyaqilju' ttzija,

atzu'n kytzalajb'il kaldey k'okyel te k'ixk'oj.

15Ayinweju'ye' Dyos Manb'aj, ch'isante Israel,

ayine' Dyos Xjan ex kynimaqkawile', chij.

16Tjaq Qman Dyos jun tal b'e toj ninnjab',

jun tal b'e toj tnimal a';

17E'etz jun k'loj xjal te q'oj nim kyipumal tu'n,

tuk'i'l kykarwaj ex kychej, te xitulkye.

Ekub'xon ex min b'ent kyjawe'tl;

e'kub' b'aj kse'n tmechil kantil nkub' yupj.

18Chi Qman Dyos ja'lo teju' ttanam:

Lalun tzajtna'ntlju'ya ewi,

lalun ximantla ti'ju' ojtxi'.

19Knb'incha' jun ti'xti'ye' junxi'tl,

ex ktka'yi'ya kb'antel ja'loxi'x.

Knjqa'ye' jun b'e toj chq'ajlaj

ex che jawil b'ent a' toju' tx'otx' min ntzaj tawal

20Kche nimalju' tojk'ul txkup weye',

exqe' ẍal ex ab'estrus,

qu'n kjawil poq'chaj a' wu'ne' toj chq'ajlaj,

che b'etel a' toju' tx'otx' min tq'o'n tawal,

tu'n tk'wanju' ntaname' sk'o'n wu'ne',

21aju' tnam kub' nb'incha'ne'

tu'n njaw nimane' kyu'n.

22Aye'tzunkye' aj Israel, tyajajil Jakob',

min ekub'sane' nwitze', e'el siktiye' wi'je'.

23Min kub' kyq'o'ne' rit te chojb'il k'ok'j nwitze'

ex mixti' njaw kynima'ne' kyu'n chojb'il.

mixna'ti' noktenwe' qanil oyaj teya, tu'nwt t-siktiya,

ex mixti' nyajuya, xi'wt nqani'ne' sturak teya.

24B'ajx tloq'a'xi'ta ptz'an tb'anil tk'ok'jal

tu'nwt ttzaj tiq'i'na te oyaj weye',

ex b'ajx chin jaw tnima'na tu'n t-until alu'mj te chojb'il.

Mapena' chin siktiye' tu'na kyu'nju' tila;

matz'ok ntx'u'jile' tu'na kyu'n tb'inchb'aja myab'a'n.

25Naqtzun tu'n ayine' Dyos janajb'ena'ya, kb'el nnajsa'ne' tb'inchb'aja

ex lay che tzajnna'ntlju'ye' tila.

26Qa ati wile' toj twitza, qq'ok qib' toj xjel.

Q'mantza tyola, atzun qil qa mixti' tila.

27B'inchan ilju' tnejel tyajilb'ena,

jawkyi'nkyib'ju' xnaq'tzalteya wi'je',

28kub' kysaqchb'e'n tkawilju'ya njaye';

qu'mtzun waje' tu'n tkub' xitu'n tnam Israel,

ju' tyajajil Jakob', ex tu'n tb'aj yasu'n.