1 Cr 11 - Mam Ostuncalco Bible

A Dab'i nimaqkawil toj Israel ex Juda(2 S 5.1-5)

1B'aj kyb'u'yi'n kyib' kykyaqilju' aj Israel ex exi' yolil tuk'i'l Dab'i toju' tnam Eb'ron. Atzuntzu' xa' kyma'n te ikjalu: qitz'inqib' tuk'i'la,

2axxi'x, maskye atoq Sawul nimaqkawil, a na'ta iq'ilkye aj Israel toj q'oj. Expena' oje ttziya Qman Dyos teya qa aya kxel ka'yinkyeju' ttanam aj Israel ex aya kkawil tib'aj, chechij te.

3Ikytzu'n, kykyaqilju' tijwnaq aj Israel e'yolin tuk'i'lu' nimaqkawil Dab'i toj Eb'ron, atzunte Dab'i b'antti'j jun tyol kyuky'i'l twitzku' Qman Dyos. Oktzun kyq'o'n Dab'i toj toklen te nimaqkawil toj Israel, kse'nx ojetoq tma Dyos toj ttzi Samwel.

Tzyetju' ipumalj toj Syon tu'n Dab'i(2 S 5.6-10)

4Exi' Dab'i kyuky'i'l kykyaqilju' aj Israel toj Jerusalen ju' ax tb'iju' Jeb'us. Atzu' najlqe'toq jeb'usey toju' tx'otx' lu,

5ex xikyma'n te Dab'i: Lay tz'oktzta tzalu, chechij. Atzunte Dab'i kub'ti'ju' ipumalj toj Syon tu'n, ju' okq'o'n tb'i Ninttanam Dab'i.

6Ojetoqtzun tma Dab'i: Alkye matz'ok tzaqpaj nejtl q'ojil kyi'ju' jeb'usey k'okyel nq'o'ne' te nejenel nim toklen, chij. A Joab' tk'wal Seruya, nejtl oktzaqpaj q'ojil kyi'j, okq'o'ntzuntz te nejenel.

7Okq'o'ntzun Dab'itz toj toklen toju' ja te ipumalj; qu'mtzun okq'o'n tb'i Ninttanam Dab'i.

8Tchaq'tzun Dab'i tu'n tjaw b'incha'n nintnam ti'jile, tzajx toju' kub'ni plansa'n ex ti'jile. Atzunte Joab' tchaq' tu'n tjaw b'incha'n jni'tl nintnam.

9Xi'toqtzu'n ttenxi'x tipumal Dab'i, ex atitoq Qman Dyos nimtipumal tuk'i'l.

E'nimaq q'ojil kyxol t-xjal Dab'i(2 S 23.8-39)

10Aye' t-xjal Dab'i ja'lu kuwqe'xi'x toj q'oj, ju' eonin ti'j toju' tkawb'il ex okkyq'o'n te nimaqkawil junx kyuky'i'l kykyaqilu' aj Israel, kse'nxju' ojetoq tma Qman dyos kye aj Israel.

11Aye' kyb'i tb'anil t-xjal Dab'i ja'lu te q'oj: A Jasob'eam, tk'wal Akmoni, nejenel kyeju' oxe' kuwqe' ex min nche xob', ju' e'kub'tb'yo'n o'lajnaq (300) ichan tu'n tch'ut tej tq'ojin jumaj.

12Lepchixju' Eleasar ti'j, tk'wal Dodo ju' aj Aoit, a junju' kyxolju' oxe' kuwqe' ex min nche xob'.

13Ten Eleasar tuk'i'l Dab'i toj Tas-damim, tej tkub' kyb'u'yi'n kyib'u' pilistey tu'n kyq'ojin atzu'. Atitoq jun kojb'il toju' tx'otx' lu awa'n seb'ad toj, ex tej kykub' oqu' aj Israel te q'oj kywitzu' pilistey,

14axtzu' kyaja' we' Eleasar kywitzu' pilistey toju' kojb'il lu ex klet tu'n, kub'kyi'ju' pilistey tu'n. Ikytzu'n e'kanb'ana' tu'n Qman Dyos.

15Junmaj, e'xt'anj oxe' kyxolju' junaq lajoj (30) kuw qe'xix ex min nchi xob', tk'etz Dab'i toju' jul toj pik, Adulam tbi'. Tkub' toqu' kyxmuj pilistey te q'oj toju' b'ya' Repaym.

16Atoqtzu' ta' Dab'i toju' ja te ipumalj, tej ate'toqju' xjal pilistey te q'oj toj B'elen.

17Pon tk'u'j Dab'i ex tma: ¡Naqwit alkye jun tzaj q'onte nk'wa'ye' ti'ju' a' toju' xoch ttziju' tnam B'elen!, chij.

18Aye'tzu'n oxe'ju' kuwqe' ex min nche xob', e'okx toju' kykojb'il pilistey ex jatzkyiq'i'n a' toju' xoch ati ttziju' tnam B'elen, tzaj kyiq'i'ntzuntz te tk'wa' Dab'i. Atzunte Dab'i min taj tu'n txi' tk'wa'n, naqkub' tqo'n te jun oyaj te Qman Dyos,

19ex tma: ¡Mixwit taja' Dyos tu'n txi' nk'wa'ne'! ¡Ku'xwitloj chin okyeltene' k'walte kychk'elju' ichan lu, qu'n makub' kyq'o'n kychwinqlal ex mache tx'anj q'elte!, chij. Ex mixti'x xitk'wa'n.

Atzun kyb'incha oxe'ju', kuwqe' ex min nche xob' toj q'oj.

20Atoq Ab'isay, titz'in mujqa ttzik Joab', nejenel kyeju' junaq lajoj (30) xjal min nche xob', Junmaj oktzaqpaj q'ojil kyi'j o'lajnaq (300) ichan ex e'kub' tb'yo'n tu'n tch'ut. Ikytzu'n tkanb'a toklen kyxolju' junaq lajoj (30),

21tk'amxi'xtzun ninb'iltetz kyekywitz, qu'n ok te kynejel. Naq o'kx minti' pon kse'nqe'ju' oxe' nejtl.

22Atzu'n B'enayiy, tk'wal Joyada, najli toj tnam Kab'seel, jun ichan min nxob' nimu' b'aj tb'incha'n. E'kub' tb'yo'n kab'e' tk'wal Aryel aj Moab'. Jun q'ij tej intoq kub' txun che'w, ku'x toj jun xoch, tojtzunju' xoch kub'a' tb'yo'n jun b'alun.

23Ex Kub' tb'yo'n jun aj Ejipt nimin twe', kab'e'lo metr tk'i' nik'jan twe' ex iq'i'ntoq jun tch'ut nimin twe' ex lan. Oktzaqpaj B'enayiy ti'j tuk'i'l jun tze, eltiq'i'n tch'ut ex tu'nxtzu'n kub'a' tb'yo'n.

24Kyu'ntzu'n tb'inchb'aj B'enayiy lu, tk'wal Joyada, tkanb'a toklen kyxolju' junaq lajoj (30) ichan min nche xob',

25ex tk'amxi'xtl ninb'ilte kyekywitz, naq o'kx min pon kse'nqe' oxe' tnejel. Ex oktq'o'n Dab'i toklen te nejenel kyeju' xq'uqilte.

26Aye' xjalju' min nche xob' toj q'oj ja'lu: Asael, ju' kyitz'inkyib' tuk'i'l Joab'; Elanan, tk'wal Dodo, aj B'elen;

27Samot, aj Arod; Eles, aj Paltit;

28Ira, tk'wal Ikyes, aj Tekoa; Ab'yeser, aj Anatot;

29Sib'ekay, aj Usa; Yay, aj Aoit;

30Maaray, aj Netopa; Eled, tk'wal B'aana ex aj Netopa;

31Itay, tk'wal Rib'ay, aj Wib'ea, ju' ati toj kytx'otx' B'enjamin; B'enayiy, aj Piraton;

32Iday, ju' najli ttzi a' Kaas; Ab'yel, ju' aj Arb'a;

33Asmab'et, aj B'awrim; Elyab'a, aj Saalb'on;

34exqe' tk'wal Jasen, aj Wison; Jonatan, tk'wal Sawe aj Arar;

35Ayam, tk'wal Sakar, ararit-x; Elipal, tk'wal Ur;

36Eper, aj Mekyera; Ayiy, aj Pelon;

37Esray, aj Larmel; Naaray, tk'wal Esb'ay;

38Joel, kyitz'inkyib' tuk'i'l Natan; Mib'ar, tk'wal Awray;

39Selek, aj Amon; Naaray, aj B'erot, ju' onil ti'j Joab' tk'wal Seruya;

40Ira, aj Jatir; Wareb', aj Jatirx;

41Uriy, ju' itit; Sab'a, tk'wal Alay;

42Adina, tk'wal Sisa, tyajajil Rub'en, nejenel kyeju' tyajajil, extzun junaq lajoj (30) ichan tuk'i'l;

43Anan, tk'wal Maaka; Josapat, aj Mitni;

44Osiy, aj Astarot; Sama ex Jeyel, tk'wal Otamqe', aj Aroer;

45Jedyael, tk'wal Simri, ex Joa ju' kyitz'inkyib' tuk'i'l, aj Tisi;

46Elyel, aj Maanaym; Jereb'ay ex Josab'iy, tk'wal Elnaamqe'; Itma, aj Moab';

47Elyel, Ob'ed ex Jaasyel, aj Sob'aqe'.