Am 8 - Mam Ostuncalco Bible

Jun chi'l lob'j q'an

1Tzaj tyek'u'n Qman Dyos ja'lu weye': Atitoq jun chi'l lob'j q'an,

2atzunte tzaj tqani'n weye':

—¿Titi' ntka'yi'na, Amos?

—Jun chi'l lob'j q'an, nchije' xintzaq'we'ne' te.

Atzunte tzaj tma'n weye':

Matxi' q'anaxte Israel; lay kub' nnajsa'n jumajtlju'ye' til.

3Toju' q'ij lu, kche okyelju' b'itz toj tja nimaqkawil te b'is. Nim xjal kkyimel, ex mlay q'ancha'lix aj kb'je'x xonju' kxmilal. Iku' chi Qman Dyos.

Xi' tul tz'e'ysb'il kywitz aj Israel

4Kyb'intzpe'ye' lu, aye'ye' nche oktene' yajulkyeju' xjal me'sqe', ex nche oktene' yajulkyeju' prow toju' tnam;

5aye'qeye' nche' q'mante: ¿Jtojtzunlo tzulju' tq'ij ak'a'j xjaw tu'n txi' qk'a'yi'nju' qtriy? ¿Jtojtzunlo tzulju' q'ij te ojb'il, tu'n txi' qk'a'yi'nju' twitz qawal wi'yal, ex tu'n tajb'enju' qmalb'ile' min tz'aqli ex tqan peẍ txalchi?

6¡Che qb'o'ljsanku' prow tzmax ajttzaj kyk'a'yi'nkyib' qe te lq'o'n majin, tu'n tchjetju' kyk'as, maskye naq tu'n jun muj xjab'! ¡Kxe'l qk'a'yi'nju' triy mixti' toj kye!

7Matxi' tma Qman Dyos tyol tu'nju' ntnima'ntib' Jakob', kjalu: Milo k'ik'ela' tna'lju' matxi' kyb'incha, chij.

8¿Ma laytzun tzaj lu'lunju' tx'otx' tu'n tpaj tkyaqil ja'lu?

¿Ma laytzun che oq'ju' najlqe' twitz?

¡Kjawil tanpujte' tx'otx' ex kb'el lob'chaj, nakuj kse'n a' Nilo!

9Chi Qman Dyos ntma'n kjalu: Toju' q'ij lu knb'incha'ye' tu'n tewantetib' q'ij te wanq'ij,

ex kb'el qloljixju' twitz tx'otx' te q'ijtl.

10Kche okyelju' ninq'ij wu'ne' te oq'el kyi'j kyimni,

aye'tzunju' b'itz che okyel wu'ne' te b'is kse'n toj utz'le'n;

knb'incha'ye' tu'n tok kyi'je' te b'is,

ex tu'n tel ksk'o'ji'n kwi'ye' te yek'b'il k'ixk'oj.

Che oq'ele' kse'n jun xjal noq' tu'n makyim jun twitz k'wal,

tkyaqil kpomel b'aj toj k'ixk'oj.

11Kpomel jun tq'ijlalil chi Qman Dyos ntma'n, tzul we'yaj twitz tx'otx' wu'ne';

mya we'yaj ti'j wab'j ex mya we'yaj ti'j a'; we'yajte' tu'n kb'inte xjal tyol Qman Dyos.

12Kche b'etenjeb'ilju' xjal jyolte tyol Qman Dyos,

ktzajelx kyu'n ttzi jun ninnjab', ex kpomelx ttzi juntl ninnjab',

ex che kxe'l jyolte toj tnayajkya'j ex toj tjawetzq'ij,

ex layx knet kyu'n.

13Che kb'el numju' tb'anil txin exqe'ju' ku'xun majx kuwqe'

tu'n k'waj toju' q'ij lu.

14Aye'tzunju' nkma'n jun kyol tu'n tjapun kyu'n kwitzju' witzileb' te Samarya;

aye' nche' q'mante: Toj tb'iju' tdyosa, Dan,

Ex toj kb'iju' dyos te B'erseb'a,

kche kb'eltz'aq ex lay che jawe'tl.