Cnt 2 - Mam Ostuncalco Bible

Tyol xu'jilb'aj

1Ayine' b'ech toju' plan tx'otx' te Saron,

ayine' rojs kyoju' b'ya', chij.

Tyol chmilb'aj

2Iky nchin laqju'ye' ti'j kyxol txqantl qya,

kse'n jun rojs kyxol ch'i'x, chij.

Tyol xu'jilb'aj

3Iky nchin laqju'ye' ti'j kyxol txqantl ichan,

kse'n junwi' mansan toj k'ul.

¡Majx tzalajb'il ajnkub' qeye' tjaq'ju' tewan!

¡Majx chi' nnela' tlob'jil weye'!

4Inxi'tiq'i'ne' toju' tja kye nimaqwan

intoq tzaj ka'yin weye' tuk'i'l tk'u'jlalil.

5¡Chin tkuwsama tu'n wab'j b'incha'n ti'j ub'a,

chin tk'a'chama tu'n lob'j mansan,

qu'n naqx tu'n nkyimtle' tu'nju' nxi'x chin laqje' ti'ja!

6¡Q'onku'ya tnayaj tq'ob'a tjaq' nwi'ye',

ex chin tchleka tu'n tb'a'nq'ob'a! chij.

Tyol chmilb'aj

7Kytziyantze' weye', qya aj Jerusalen,

tu'n t-xikyka'yi'ne' tal tojk'ul msat,

tu'n lan tz'el twatlju' qya nchin laqje' ti'j.

¡Wtanku'j tzmaxi'j ajtel twatl! chij.

Tkab' b'itzTyol xu'jilb'aj

8¡Luju' ichan nchin laqje' ti'j tzul!

¡Inxinb'i'ne' tq'ojq'ojel toj twi'!

Lu tzul nxlik'pun kyib'aju' k'ul,

lu tzul nxlik'pun kyib'aj witz.

9Iky ichanju' nchin laqje' ti'j kse'n jun msat:

kse'n jun tal msat.

¡Lu pena' atitl twitz tjpel ja,

in ka'yinktz ttzi tokex spik'un,

in ka'yinktz toj xopa'j!

10Tzaj tma'n ichan nchin laqje' ti'j kjalu:

We'ktza tal nmsat;

lwixa, qo'ya, inxi'x chin laqje' ti'ja.

11¡Ka'yinxpe'ya! Matxi' tzik'te' jb'alil

majx matxitiq'i'n jb'al.

12Matxi' che poq'chaju' b'ech toj kojb'il,

matxi' pon tq'ijlalil tu'n qb'itzan,

matxi' che aq' oq'ilju' tal paloms

tzalu toju' qnajb'il.

13Atitl twitzju' lob'j iw,

ex nche puk'chajtlju' tqan ub'a.

We'ktza, tal nmsat;

lwixa, qo'ya, inxi'x chin laqje' ti'ja.

14Aya tal npalomse', nokx tewa'ntib'a toj kyk'atxub' piky,

newanjxa kywitz nimaq pik,

yek'untz twitza weye',

wajb'ile' tu'n nb'inteye' toj twi'ya.

¡Majx tzalajb'ilte' ajtok nka'yi'na!

¡Majx tzalajb'il ajtyolina! chij.

Kyyol kykab'il

15Che kytzyume' chuẍ, aye' chuẍ b'o'sqe',

qu'n ate'qe'k yajulkye qawale',

aju' qawale' tzmaxi'x nub'chin, chechij.

Tyol xu'jilb'aj

16Wewe' ichan nchin laqje' ti'j, ex teqine'.

Nk'ik'len kyi'j trit kyxol b'ech rojs.

17Kutanjtz ti'ja, aya nchin laqje' ti'ja,

akx njawu'l q'ij ex nkub'naj qxopin;

kutetz oqa naku'j msat,

naku'j jun tal b'o's msat

kywitz nimaq k'ul.