Jer 32 - Mam Ostuncalco Bible

Tloq' Jeremiy jun tx'otx'

1Tzaj yolin Qman Dyos te Jeremiy toj tlajoji'n ab'q'i nkawin Sedekyiy toj Juda, twajxaqlajoji'ntoq ab'q'i nkawin Nab'ukodonosor.

2Intoq che q'ojin t-xjal nimaqkawil aj B'ab'ilon ti'j Jerusalen toju' tq'ijlalil lu, atzu'n Jeremiy t-sanjelal Dyos jpu'ntoq tpen xq'uqb'il ti'ju' ja te nimaqkawb'il.

3Ojetoq tchaq' nimaqkawil Sedekyiy tu'n tjpet, qu'n ojetoq tma Jeremiy kjalu: Matma Qman Dyos kjalu:

Knb'incha'ye' tu'n tkub' tz'aqju' nintnam lu toj tq'ob' nimaqkawil aj B'ab'ilon,

4ex lay jolpaju' nimaqkawil Sedekyiy toj kyq'ob' aj Kaldey, kb'eltz'aq toj tq'ob'ju' nimaqkawil aj B'ab'ilon ex ati tu'n tpon yek'ultib' twitz.

5Kxe'l tiq'i'n Nab'ukodonosor Sedekyiy tzmax B'ab'ilon, kjel tentzuntz nimtoj tzmax ajnmanteye'. B'a'nqa mache q'ojine' kyi'j aj Kaldey, layx che kanb'ane'. Ayine' Dyos Manb'aj nchin yolin, chi Qman Dyos, chi Jeremiy.

6Ex tma Jeremiy ikjalu: Tzaj yolin Qman Dyos weye', tman ikjalu:

7Ape' tila, tzul Anamel twitze'la tk'etza, ju' tk'wal Salum kyitz'inkyib' tuk'i'l tmana, q'malte teya ktlq'a'ya ch'i'n ttx'otx' toj Anatot, atita toklen tu'n tlq'onteya qu'n aya twitze'l nqaku'xi'x ti'j, chi Dyos.

8Ikxi'xju' tma Qman Dyos, ulju' nwitze'le' Anamel nk'itze' tpenju' xq'uqb'il ex tzaj tma'n weye' tu'n nlq'onteye' ttx'otx' ati Anatot, toj kytx'otx' tnej tyajajil B'enjamin, qu'n ayine' ati woklene' ti'j tu'n ntzyunteye', tu'nju' ayine' atixi'x woklene' tuk'i'l kyxol qwitze'le'. Tej tel nnik'e' ti'j qa jun chaq'b'il ja'lu tu'n Qman Dyos,

9-10nloq'e' tx'otx' te nwitze'le' Anamel. Xinq'o'ne' wuqlajoj saqpwaq te qu'n ikytzaja' tq'o'nju', ex kub' tu'jilju' loq'enj lu, ok sey ti'j ex sqitetti'j kyu'n tziyal.

11Etzwiq'i'ne' kab'e' tilb'ilalju' tu'jil, jpu'n ttziju' jun kse'nxju' nb'inchet ti'j jun tx'otx' malq'et, atzu'n juntl jqo'n,

12xinq'o'ntzuntze' te B'aruk, tk'wal Neriy ex tchman Maaseyiy, kywitzku' nwitze'le' Anamel, e'tziyal e'kub' sqitunteti'j ex kywitz kykyaqilju' aj Juda q'uqlqe'toq tpenju' xq'uqb'il.

13Kywitztzun xa' nma'ne' te B'aruk kjalu:

14Matma Qman Dyos nimtipumal nkyk'lu'n aj Israel ikjalu: Q'inxa kab'e' tilb'ilalju' tu'jil tx'otx' xlq'et lu, ju' jpu'nxi'x exju' jqo'n, k'u'nqe'xa toj jun tx'otx' k'wil, tu'ntzun tk'u'yet nim tab'q'iyil.

15Qu'n chi Qman Dyos nimtipumal nkyk'lu'n aj Israel ikjalu: Che lq'onjtzel jumajtl ja, awb'il e'tqan ub'a toju' tx'otx' lu, chij.

Tna'j Dyos Jeremiy

16T-xilenxi'tzun tq'o'n Jeremiy tu'jil tx'otx' te B'aruk tk'wal Neriy, xitma'n te Qman Dyos toj tna'j Dyos kjalu:

17Nman Dyos, tb'inchaju'ya kya'j ex tx'otx' tu'n nimtipumala. Mixti' jun ti'xti' laywit b'ent tu'na.

18Intyek'u'nta tk'ujlalil kye mutx' tnej xjal, ex nttz'e'ysa'na kywitz xjal tu'n tpaj kyil kyman. ¡Nman Dyos nimtipumala, a tb'iju'ya nimtipumal!

19Majx tb'anilxi'xta t-xim ex nimtipumala toju' taq'una. Intka'yi'na tkyaqilju' nkyb'incha'n xjal ex ntq'o'na tu'me'l t-xel teyile junjun kse'nxju' kyb'inchb'aj.

20E'tb'inchaya b'a'nq'ob'aj ex techlal toj Ejipt, expe' ljo'nx tb'inchanteya ja'lo toj Israel ex kyxol kykyaqil xjal, ikytzu'n matxi' b'ajb'injtzu' tb'iya.

21Etztiq'i'na ttanama Israel tu'n tipumala toj Ejipt, e'tb'inchaya b'a'nq'ob'aj ex techlal ex kykyaqil eb'aj t-xob'tza'na.

22Tzaj tq'o'nju'ya tb'anil tx'otx' lu kye aj Israel, kse'nx ojetoq ttziyaya kyeju' ojtxi' kyyajilb'en.

23Tetzunj kyoktz toju' tx'otx' ex tb'ajtzyet kytx'otx', min e'nimantl teya ex min e'oklpe tiju' xnaq'tzb'il b'ajx tq'o'na kye, ex mixti'x xikyb'incha'n tchaq'a kye. Qu'mtzun tzaja' tqo'na k'ixk'oj lu kyib'aj.

24Atzu'n ja'lo matxi' b'aj kyb'incha'n kaldey kyxwe'lil tu'n kyq'ojin ti'ju' nintnam, ex kb'elti'j kyu'n tu'nju' q'oj, we'yaj ex tx'u'j yab'il. Ka'nxtzun lon, Nman Dyos, njapunju' tyola.

25Atzuntlta Nman Dyos, tchaq'a tu'n nlq'onteye' tx'otx' ex tu'n nchjonteye' twi' kywitzku' tziyal, b'a'nqa makub' tz'aqu' nintnam toj kyq'ob' kaldey, chi Jeremiy toj tna'j Dyos.

26Tzajtzun ttzaq'we'n Qman Dyos te Jeremiy kjalu:

27Ayinweju'ye' Dyos Manb'aj kyib'aj kykyaqilju' itz'qe'. Mixti'x jun ti'xti' laywit b'ent wu'ne'.

28Qu'mtzun nxinma'ne' teya: Knb'incha'ye' tu'n tkub' tz'aqju' nintnam lu toj tq'ob' Nab'ukodonosor, nimaqkawil aj B'ab'ilon, ex toj kyq'ob' kaldey.

29Che okyexju' kaldey nchi q'ojin toju' nintnam ex k'okyel kyq'o'n tq'aq'al, kb'ajel kytz'e'ysa'n kyuk'i'lxi' ja, ja noka' q'o'n ntx'u'jile', nche kub' tz'e'ysa'n sturak twitz B'aal ex nche kub' q'o'n oyaj b'in kywitz txqantl dyos kyib'aj.

30Ttzajlenx ojtxi', kukx kyb'inchante aj Israel ex aj Juda myab'a'n nwitze', kukx tok kyq'o'n ntx'u'jilju'ye' kyu'n kywitzleb' ju' aye'x nche kub' b'inchankye. Ayine' Dyos Manb'aj nchin yolin.

31Exte' nintnam lu, ttzajlenx tej ttzyet tjaw b'inchet tzmax ja'lo, naqx q'ol ntx'u'jile' ta'ya'. Qu'mtzun knb'incha'ye' tu'n tkub'najsa'n,

32tu'ntzunte' xb'jo'k kyq'o'n aj Israel ex aj Juda ntx'u'jile' tu'nju' kyb'inchb'aj myab'a'n, ikyqe'xju' kynimaqkawil ex kynejel, e'pale ex sanjelal kyxol ex kykyaqilju' najlqe' toj Juda ex toj Jerusalen.

33Min nche tzaj ka'yin weye', naq kytze'lkyi'j ntzaj kymiltz'u'n weye', maskyetzun min nkyaj ntzaqpi'ne' tu'n kyxnaq'tzet, min nchin kyb'i'ne' ex min nkyq'a' tzak'u' kyib'.

34Mape' kub' kytz'ilsa'n ja te k'u'lb'il xjansa'n weye', mache kub' kyq'o'n kywitzleb' mixyab'a'nqe' toj.

35Ex eb'jaw kyb'incha'n q'olb'eb'l te B'aal toju' b'ya' B'en-inom, tz'e'ysb'ilkye kyk'wal ex kymyal te chojb'il twitz Molok, ikytzu'n ẍeb'inchana' il aj Juda, mab'aj kyb'incha'n ti'xti' mya ch'q'o'n wu'ne' expe' min xima'n wu'ne'.

Yol tziya'n ti'ju' tzul

36Ayine' Dyos Manb'aj, nche k'ulun aj Israel weye', nchin yoline' ti'ju' nintnam lu, ju' intma'na qa kb'eltz'aq toj tq'ob' nimaqkawil aj B'ab'ilon tu'nju' q'oj, we'yaj ex tu'n tx'u'j yab'il.

37Che b'ajel nb'u'yi'ne' kywnaqile' kyoj kykyaqilju' tx'otx' jamache'xa' nsputi'ne' tu'n ntx'u'jile' ex txqan nq'oje, ex che tzajel wiq'i'n jumajtle' toju' najb'il lu tu'n kyanq'in b'a'n.

38Che okyel te ntaname' ex che ajb'el weye'.

39Knb'incha'ye' tu'ntzun o'kxtzu' k'okyela'ten kyk'u'j ex kkyma' tu'n kyajwalinte nb'iye' toj tkyaqilju' kychwinqlal, tu'n kyten b'a'n exqe' kyyajajil.

40Kjel b'entti'j jun nyole' tejumajx kyuk'i'l: kntziya'ye' tu'n nb'inchanteye' b'a'n kye kukxju', ex kb'el nq'o'ne' toj kyanmi tu'n kyniman weye' tu'n tkyaqil kyk'u'j ex tu'n lan tz'el kypa'n kyib' wi'je'.

41Chin tzalajele' ajnb'inchanteye' b'a'n kye, ex axxi'x che najal wu'ne' toju' tx'otx' lu tu'n tkyaqil nk'u'je', chi Qman Dyos.

42Ex tmatl Qman Dyos ikjalu:

Kse'nx tej saj nq'o'ne' jun xitb'il nimxi'x ti'ju' tnam lu, ex ktzajel nq'o'ne' tkyaqilju' b'a'n matxi' ntziyaye'.

43Extzu'n nintnam lu xtmaya qa kjel chq'ajlajtl, mix-a'lo'tl xjal ex txkup knajal toj, ex kb'eltz'aq toj kyq'ob' kaldey, che lq'ol jumajtl kytx'otx'.

44Che lq'etel jumajtl ex kb'el kyu'jil, k'okyel sey kyi'j ex ksqitetel kyi'j kyu'n tziyal. Kb'inchetel ja'lu toj kytx'otx' tyajajil B'enjamin, ti'jile Jerusalen ex kyoju' nimaqtnam toj Juda, jni'x kyoju' tx'otx' kywi' witz ex toj plan, ex kyoju' nimaqtnam toj Nekeb', qu'n knb'incha'ye' tu'n lalun che yajtitl. Ayine' Dyos Manb'aj nchin yolin.