Sal 45 - Mam Ostuncalco Bible

Tnej yol te tmjeb'le'n nimaqkawil

1Nim yol tb'anilqexi'x nche b'ju'l toj nwi'ye';

ik waq'ju'ye' kse'n ttz'ib'il jun b'a'n ajtz'ib'al.

¡Kxe'l nma'ne' nyole' tb'anilqexi'x teju' nimaqkawil!

2¡O'kxta tb'anilxi'x kyxol kykyaqil ichan!

¡O'kx yol tb'anilqexi'x nche etz toj ttziya tma'na!

Qu'mtzun xky'i'wlanjtza'ya tu'n Dyos tejumajx.

3¡K'lonka tk'uẍtx'e'nb'ila tk'u'ja, aya min nxob'a!

¡Qu'n a tachb'ilju'ya inxi'x qoptz'aj!

4Iq'i'nktz tib'a, kawina,

tu'n tb'inchetju' ax

exju' tnik'alilti'j kyeju' min nkynima'n kyib'.

¡B'inchamqe'ya nimaq ti'xti' tb'anilqexi'x tu'n tb'a'nq'ob'a!

5Kche kb'el tz'aqju' tnam t-xe tqana, nimaqkawil;

ch'ut qe'xi'xju' tal t-smaja

kche pomel xuyli toj kyk'u'ju' tajq'oja.

6Te junmajxte' tkawb'ila, Nman Dyos,

jun kawb'il tnik'alti'j.

7In tk'u'jla'nju'ya b'a'n ex inel tik'u'na myab'a'n.

Qu'mtzun jaw sk'o'na tu'n Qman Dyos,

nimxi'x tzalajb'il tzaj tq'o'n teya

kyekywitzju' tuk'i'la.

8Inche k'ok'b'ixu' t-xb'aluna tu'n mir, alowe ex kanel;

injaw tzalajsa'na tu'n kyq'ojq'ojel chnab' tzintzin

kyoju' tja nimaqkawb'il uk'sa'n kyu'n tb'aq elepant.

9Ate' kymyal nimaqkawil kyxolju' qya ate' toj tjaya te kawb'il;

atzu'n t-xu'jila toj tb'a'nq'ob'ju' tq'uqb'ila ta',

txoli'n ti'ju' t-xb'alun tu'n q'anpwaq tb'anilxi'x.

10B'intza tal nmyal;

q'onk twi'ya ti'ju' kxe'l nma'ne' teya:

Tzik'x kyna'lju' kyb'aje' toj kyjaye' tu'na exqe' twnaqila,

11qu'n intzalaju' nimaqkawil ti'ju' tilb'ilala tb'anilxi'x;

nimana te qu'n ate tajawju'ya.

12Tzulu' tmyal nimaqkawil te Tiro twitza,

aye'ju' nimaq q'inun toju' tnam

kyuk'i'l oyaj te ninb'ilteya.

13¡Luju' tmyal nimaqkawil tz'okpun tb'anilxi'x!

¡Chmo'n t-xb'alun smo'n tk'i' q'anpwaq!

14Tz'okpun iq'i'n twitz nimaqkawil tuk'i'l t-xb'alun nqoptz'aj,

lepchqe'xju' txin ti'j, aye'ju' tuk'i'l q'poj qe'.

15Inche b'et tuk'i'l nim tzalajb'il;

nche tzalaj ljo'n kyb'jo'kx toju' tja nimaqkawil.

16Aye'tzu'n tk'wala, nimaqkawil

kche okyex qe toj kyq'uqb'ilju' tyajilb'ena,

che okyel kawil toj tkyaqilju' tnam.

17Knb'incha'ye' tu'n ttzaj na'nju' tb'iya

toj junjun ak'a'j tyajajil,

ex tu'n tjaw nima'na kukxju' kyu'n tnam, chiju' b'itzal.