2 S 12 - Mam Ostuncalco Bible

Tzak'u'njtz Dab'i tu'n Natan

1Tzaj tchq'o'n Qman Dyos Natan ju' t-sanjelal tk'etz Dab'i. Tetzunj tpon Natan tk'etz, xitma'n te:

—Atitoq kab'e' ichan toj jun nintnam. Aju' jun q'inun, atzu'n juntl prow.

2Nimtoq txqan tritju' q'inun ex twakyix,

3atzunte prow naq o'kxku' jun tal ttxu trit tzajni tlq'o'n. A kub' ch'isante, ex ch'iyte' tal trit kyuk'i'lju' tk'wal tk'etz; junxtoq nche wana' ex nche k'wana', ex ttzitk'u'j intoq wtana'. ¡Inxi'xtoq tk'u'jla'n ichanju' tal trit naku'j jun tmyal!

4Jumaj, pon jun xjal xb'etzalte ichan q'inun; atzunte q'inun mixti'x el jun tal rit mujqa wakx ti'jtk'u'j tu'n tkub' tb'incha'n twaju' tula, ape' tb'inchaju' elt-xk'a'yi'n tal tritju' prow ex kub' tb'incha'n te twaju' ula pon.

5Tzajtzun ttx'u'jil Dab'i ti'ju' ichan lu, ex xitma'n te Natan:

—¡Lu Qman Dyos in ka'yin, in ati tu'n tkub' b'yetju' xjal xb'inchante ja'lu!

6¡Ex ati tu'n tchjonte kyajmaj twi'ju' tal rit, qu'n mixti'x sexch'yon ti'tk'u'j! chij.

7Xitma'ntzun Natantz te:

—¡Aju'ya xjal lu! Ex lu matxi' tma Qman Dyos, ti'ja: Majaw nsk'o'na tu'n toka te nimaqkawil toj Israel, ex mankola toj tq'ob' Sawul;

8matxinq'o'ne' tja kawb'il teya exqe'ju' tqya Sawul, exqepe' kawb'il toj Israel ex toj Juda. Naqwitna' ch'i'n ja'lu, mawtlo txi' nq'o'n txqantl ti'xti'ye' teya.

9¿Titiqu'n sel tik'una'ya nyole', ex mya' b'a'n xtb'incha? Makub' tb'yo'na Uriy ju' itit, mache ajb'en aj Amon b'yolte tu'na ex matz'el tiq'i'nju'ya t-xu'jil.

10Machin eltik'o'na tej tokmiltz'uja ti'ju' t-xu'jil Uriy ju' itit tu'n tkub' t-xu'jila'na, ja'lo majx kjelten b'yojtib'il toj tjaya.

11Ayinku'ye' Dyos Manb'aj inchin q'mante: Knb'incha'ye' tu'n tjaw anq'inju' taq'wixil kyxolju' toj tjaya, ex twitzku'ya che elil wiq'ine' t-xu'jila ex kxe'l nq'o'ne' te junju' tyajajila, ex q'ijlku' kb'el kẍe kyuk'i'l.

12Qama tb'inchata' il toj ewaj, atzunwe' knb'incha'ye' kywitz kykyaqil aj Israel tojxi'x spik'un, chi Dyos, chi Natan te.

13Xitma'ntzun Dab'itz te Natan:

—Matxi' chin b'inchan ile' twitz Qman Dyos, chij.

Atzunte Natan xitma'n te:

—Myata kb'el tz'e'ysa'n twitz tu'n Qman Dyos, ex lay kyima.

14Naq o'kxju' tk'wala tzma sitz'j kkyimel, qu'n matxina' tb'inchaya jun nimaq il twitz Qman Dyos, chi Natan te.

15Tetzunj tanj Natan tja, tzaj tq'o'n Qman Dyos jun yab'il kuwxi'x ti'ju' tal tk'wal Dab'i itz'ji tuk'i'l t-xu'jil qtzan Uriy.

16Aq'witzun Dab'itz kub'sal twitz Qman Dyos ti'ju' tk'wal, mewayin, ex b'aj qonik'an tu'n kuẍli twitz tx'otx'.

17Aye'tzu'n tijwnaq najlqe'toq toju' tja te kawb'il intoq che'x q'malte te tu'n tjawe', atzunte mixti'x taj, ex mixti' taj tu'n twan kyuk'i'l.

18Tb'ajlenxi'tzun wuq q'ij kyimju' k'wal, aye'tzunju' nejenel kye t-xjal Dab'i intoq che xob' tu'n txi' kyma'n te, qu'n kub' kyxima'n: Tepena'j itz'xtoqju' k'wal, intoq qo'x yolin te ex mixti'x nqo' ok toj twi', ¡mitzunloyate' ja'lo matxi' kyim! ¡Jaku'lo tb'incha jun ti'xti' taq'wixi'x ajtb'inte!, chechij.

19Tetzunj tel tniky' Dab'i qa intoq che yolinju' nejenel kye t-xjal kyxolilex, kane toj twitz qa matxi'toq kyimju' k'wal; xi'tqani'ntzuntz kye:

—¿Ma matxi' kyimu' k'wal?, chij.

—Matxi' kyimte' —chechij.

20Jawe'tzun Dab'itz twitz tx'otx', b'aj ichin, b'aj ch'ixpun ex oktq'o'n k'ok'sb'il ti'j, okxtzuntz k'ulul te Qman Dyos toju' ja te k'u'lb'il. Tb'ajlenxi'tzun k'ulun, xi' wal tja.

21Xikyqani'ntzun nejeneltz te:

—¿Titi'tzun ntb'incha'na, nimaqkawil? Tej itz'xtoqju' ne'ẍ, intoq mewayina ex intoq oq'a ti'j; atzu'n ja'lo xkyim, ¡Majawe'ya ex makub' tena wal!, chechij te.

22Atzunte Dab'i xittzaq'we'n:

—Tej itz'xtoqju' ne'ẍ, intoq chin mewayine' ex intoq chin oq'e', qu'n kub' nxima'ne' qaj ktzajel q'aq'an tk'u'j Qman Dyos wi'je'.

23Atzu'n ja'lo matxi'na' kyim, ¿titi' k'ajb'ela' qama chin mewayintle', layna' tz'anjtzti'j wu'ne'? ¡Xipe' nxi'we' tk'etz, atzunte layx tz'anjtztlti'j nk'etze'! chij.

Titz'jlen Salmon

24Yajxi'tzuntel okten Dab'i q'uqb'alte tk'u'j B'esab'e ju' t-xu'jil. Xi' xb'etzalte ex kub'kẍe tuk'i'l, ex ul juntl tal, oktq'o'n Dab'i tb'i, Salomon. Tk'u'jlate Qman Dyos k'wal lu,

25ex tzaj tma'n te Dab'i tu'nel Natan ju' t-sanjelal. Oktzun tq'o'n Dab'i tb'iju' k'wal Jedidiyas, kse'nxju' tzaj tma'n Qman Dyos te.

Kub'ti'j Rab'a tu'n Dab'i(1 Cr 20.1-3)

26Atzuntlte Joab' xi' q'ojil ti'ju' nintnam Rab'a kytanam aj Amon, tetzunj ch'inxtoq ttzyetu' nintnam jata' kawb'il tu'n,

27xit-sma'n tqanil lu te Dab'i: Nchin q'ojine' ti'j Rab'a, ex matxi' tzyetu' nintnam wu'ne', ju' kuwsa'n kyu'n tb'eyil a' tjaq' tx'otx'.

28Qu'mtzun nimaqkawil, b'uyinqe'tza txqantl xjal te q'oj, lwix q'ojina ex tzyuma nintnam, qu'n qa ayine' ẍin b'inchante, jaku' tz'ok q'o'n nb'iye' ti'j, chij xit-sma'n.

29Ku, chi Dab'i eb'aj tb'u'yi'nju' t-xjal toj tneji'n ex e'xi' q'ojil ti'j Rab'a, ex tzyet kyu'n.

30Elkyiq'i'n q'anpwaq koron toj twi'ju' nimaqkawil, ate'k tb'anil ab'j ti'j, masch'i'n oxnaq kab'lajoj lib'r tk'i' nik'jan (72.6) talal ex jaxkyq'o'n toj twi' Dab'i. Ex nim ti'xti' twi' wi'yal etzkyiq'i'n Dab'i toju' nintnam lu,

31aye'tzunju' xjal ate'xtoq toju' nintnam, eb'je'tz tiq'i'n ex e'oktq'o'n aq'unal tuk'i'l job'l tze, yelb'i ex k'uxb'il pab'l toj si, ex tu'n ttzq'ajset ladris toj chuj. Ex ax tb'inchaju' kyi'ju' txqantl nimaqkytanam aj Amon, anjtzun ti'jtz kyuk'i'lu' t-xjal toj Jerusalen.