Sal 139 - Mam Ostuncalco Bible

Tkyaqil chik'li twitz Qman Dyos

1Nman Dyos, matxi' tzik'twitza wi'je' ex tojtzqi'n qina;

2Tojtzqi'na tkyaqil nb'incha'ne';

b'a'nqa najchaq ta'ya, inel tnik'a ti'ju' nxima'ne'.

3Tojtzqi'na tkyaqilju' nb'eye',

¡kanli twitza tkyaqilju' in nb'incha'ne'!

4Na'mxtoqpe' tel nma'n jun nyole',

kanlinajtl twitza, Nman Dyos.

5Atiya wi'jileye';

tkub'ju' tq'ob'a wib'aje' kolb'ilweye'.

6Lab'te'nxi'xte' ojtzqib'l lu, min nchin kanune' ti'j;

¡nimxi'xte', layx kane toj nwitze'!

7¿Jaloja tu'n nxa'ye' najchaq, ewal twitzju' t-xewa?

¿Jaloja tu'n nxa' oqe' twitza?

8Qama chin jawxe' twitz kya'j,

atiya atzu';

qama chin ku'xe' tjaq' tx'otx',

ex atiya atzu';

9qama chinx lipane' toj tjawetzq'ij,

mujqa chinxwite' najal jlajxi' Ninnjab' tkub'exq'ij,

10ex atinqine' toj tq'ob'a atzu';

¡lay chin kyej ttzaqpi'ne' tb'a'nq'ob'a!

11Qama kub' nxima'ne' tu'n wewane' toj qxopin,

mujqa jawwit b'entju' spik'un wi'jileye' te qonik'an,

12laype' b'ent nkub' tewa'ne' qxopin twitza,

ex spik'unte' qonik'an teya, kse'nxju' q'ijtl.

¡Junqe'xkye' qxopin tuk'i'lju' spik'un teya!

13Aya kub' b'inchante tkyaqil nxmilale';

inkub' tb'incha'na toj t-xmilal ntxuye'.

14Njaw wajwali'na qu'n nchin lab'tiye' tu'nju' ntene' ẍinkub' tb'incha'na,

qu'n lab'te'nxi'xte' tb'inchb'aja.

¡Matxi' tz'el nnik'e' ti'j b'a'nxi'x!

15Mya ewaj nch'iya'ye' twitza

tej ẍinaq' kuwixe' toj t-xmilal ntxuye',

tej nchin ch'iye' toj ewaj.

16Tilya tej intoq tb'incha'ntib'ju' nxmilale' tu'n tch'iy;

tkyaqil ja'lu tz'ib'a'nqe'tltoq toju' tuja.

Na'mxtoqpe' witz'jiye'

matxi'toq kyej techi'nju'ya tab'q'iyil nchwinqlale'.

17Nman Dyos,

nimxi'x kyxilenju' t-xima weye';

¡ex layx b'ent kyajlet!

18Chin okwit tene' ajlalkye, nimxi'xlo kyajlal kyetwitz twitz tz'awun;

qatzun mab'je'lpun kyajlet wu'ne', layxpe' cheb'aj kane toj nwitze'.

19Nman Dyos,

q'imila kychwinqlalju' b'inchal myab'a'n

ex laq'b'anqe'milju'ya b'yolxjal wi'je',

20aye' nche yolin taq'wix ti'ja

ex naq kyak'a'n njaw kyi'nkyib' ti'ja.

21Nman Dyos,

Ina' che elwik'o'nwe' nche el ik'unteya

ex nche elnsuchu'nju'ye' nche q'ojink ti'ja.

22¡Majx nche elwik'o'ne'!

¡Qu'n ex ajq'ojqe' wi'je'!

23Nman Dyos,

tzik'x twitza wi'je', tz'elx tnik'a ti'ju' wanmiye';

chin tq'oka toj joyb'ilwi'je', tz'elx tnik'a ti'ju' nnab'le';

24ka'yintza qa nchin b'ete' toj tb'eyil taq'wixil,

chin t-ẍaqluxa toju' b'e tejumajx, chiju' b'itzal.