2 S 20 - Mam Ostuncalco Bible

Jawtiq'i'ntib' Seb'a

1Atitoq jun ichan myab'a'n xjal kyxol tyajajil B'enjamin toj Wilwal, Seb'a tb'i, tk'wal B'ikri. Okten q'malte kyeju' tnam tu'n tjaw kyiq'i'n kyib' q'ojil, ex intoq tma'n: ¡Mixnati'xte' qoklen tuk'i'l Dab'i, tk'wal Jese! ¡Qo'qe'ye' qja qkyaqilx aj Israel!, chij.

2Kykyaqiltzunju' ichan aj Israel kyej kyqo'n Dab'i, ex exi' lpe ti'j Seb'a, tk'wal B'ikri. Aye'tzunkye' aj Juda, tzajx tk'etz Jordan ex tponx Jerusalen, e'kyajten tuk'i'lju' kynimaqkawil.

3Tej tpon jumajtl Dab'i toju' tja te kawb'il toj Jerusalen, exi' tiq'i'n lajoj tqya e'kyaj tq'o'n xq'uqilteju' tja nimaqkawb'il, toj jun ja ex e'kub' tq'o'n xq'uqil kyi'j, atzuntzu' e'tk'a'chaya' ex mixti' kub' kẍetl kyuk'i'l. Atzuntzu' eb'aj kyaja' jpu'na' ex mixti'tl kychmil tzmax tej tkyim.

4Yajxi'tzuntel tchaq'ju' nimaqkawil te Amasa:

—Txkonqe'tzju'ya ichan aj Juda, tu'n kytzaj tuk'i'la tza'lu toj oxe' q'ijtel, chij.

5Tetzunj txi' Amasa b'uyilkye, min kanunju' oxe' q'ij xiq'ma'n te.

6Xitma'ntzun Dab'i te Ab'isay:

—Nimxi'xtlte' taq'wixil ktb'incha' Seb'a qe kyetwitz tb'incha Ab'salon. Qu'mtzun k'okyela te nejenel kye nxjale' te q'oj ex kutxi'ya knolte, qu'n jaku' tz'okx toj jun nintnam jpu'mile ti'j tu'n nimaqtapi, jaku'tzun tzaqpajtz, chij.

7Etztzun Joab'tz toj Jerusalen kyuk'i'lju' t-xjal, exqe' seretey ex peletey xq'uqil nimaqkawilqe', exqe' b'a'nxi'x che q'ojin, e'etz toj Jerusalen tuk'i'l Ab'isay knolte Seb'a.

8Tetzunj ch'intltoq kypon tk'etzju' nin pik toj Kab'aon, etz Amasa k'lulkye toj kyb'e. Oksa'ntoqtzun ti'j Joab' te q'oj, k'lo'nk tk'alb'il tk'u'j, ex yob'a'nkju' t-xuyb'il atku'x toj tja toj jun plaj, ju' eltz'aq tej t-xilq'e tk'etz Amasa ex jaw tiq'i'ntl.

9Xi'tzun Joab'tz tzyulte t-xmatzi Amasa tu'n toktma'tzi'n, ex xitqani'n te:

—¿Ma b'a'n ta'ya, witz'in?, chij.

10Atzunte Amasa mixti' ximan ti'ju' t-xuyb'il Joab' tzyu'ntoq tu'n. Naqtzun myanim okx t-xyu'n Joab' toj tk'u'j ex majx etz chitq'uju' toj tk'u'j twitz tx'otx'. Majx b'aj ex min kub' tb'ajsa'nxi'xtl Joab' qu'n junx aq'pon tu'n. Xi'tzun kyljo'n Joab'tz tuk'i'l Ab'isay ju' titz'in knolti'j Seb'a, tk'wal B'ikri.

11Kub'tzun we' jun t-xjal Joab' tk'etzju' t-xmilal Amasa, ex tma:

—¡Alkyete atzu' ta' tuk'i'l Joab' ex tuk'i'l Dab'i, lpex ti'j Joab'!, chij.

12Inxtoqtzun t-xtoli'ntib' Amasa toju' tchk'el toj nky'ajchaq b'e; el laq'b'a'n ttx'u'k b'e tu'nju' xjal te q'oj lu ex jaxtq'o'n jun pinpa't tib'aj, qu'n xitka'yi'n qa kykyaqilju' xjal ljo'ntoq kypon intoq che kub' we' ka'yilte.

13Telenxi'tzun ti'n toj b'e, e ik' kykyaqilju' t-xjal Joab' tu'n kyxi' knolte Seb'a.

14Ik' Seb'a toj tkyaqil kytx'otx' tnej tyajajil Israel tzmax Ab'el-b'et-maaka, kykyaqiltzu'n tyajajil B'ikri b'aj kyb'u'yi'n kyib', ex e'okx lpe ti'j toju' nintnam.

15Tetzunj kypon t-xjal Joab' toj Ab'el-b'et-maaka, okkyb'incha'n kyxwe'lil ti'jxi' tapi tu'n tb'ent kyjax q'ojil ti'ju' nintnam, ex tzyet kyxitunteju' nintapi tu'n kykyaqil.

16O'kx myanim, tzaj ẍch'in jun qya tx'yanx tuk'i'l tzmax tib'aj nintapi ti'ju' nintnam:

—¡Kyb'inchame' xtalb'il, chin kyb'itze'! ¡Kymanxpe'ye' te Joab' tu'n ttzaj lq'e, qu'n wajb'ile' tu'n nyoline' tuk'i'l!, chij.

17Tetzunj tpon lq'e Joab', xitqani'n qya te:

—¿Ma aju'ya Joab'?, chij.

Atzunte xittzaq'we'n: ayine', chij.

Atzunju' qya xitma'n te:

—B'intzpe'ya nyole', ayine' ajb'el teya, chij.

Q'mantzna'ya, chij Joab'.

18Aq'witzuntz q'malte:

—Intoq q'manjtz ojtxi' kjalu: Alkyete tajb'il tu'n tb'inte jun tqanil, qaninx toj Ab'el. Ikytzu'n nb'aja' nk'eta' jun ti'xti'.

19Ajunqe' ninqtanam kyxolju' mixti' q'oj kyxol ex tnik'alkyi'j toj Israel, ¡ex nim kyoklen! Atzuntlta tajb'ila tu'n qkub' t-xitu'na. ¿Titiqu'n tajb'ila'ya tu'n tkub' t-xitu'na ttanam Qman Dyos?, chij te.

20Atzunte Joab' xittzaq'we'n te:

—¡Myana'te'! Myawe' tb'is nk'u'j tu'n tkub' nxitu'n ex tu'n tkyej nq'o'ne' naq tik'lentl.

21Myana'te' tnam, naqna' jun ichante' najli kywi' witz te Eprayin, Seb'a tb'i, qu'n majaw tiq'i'ntib' q'ojil ti'ju' nimaqkawil Dab'i. Kyq'omitze' tjunal, kyjeltzun nq'o'nwe' nintnamtz, chij.

Etztzun ttzaq'we'n qya te Joab':

—K'elex qxonqe' twi' teya tzmax tib'aj nintapi, chij.

22Xi'tzun qyatz tuk'i'l tu'me'l tyol ex kub'ti'j kynab'lju' xjal toju' tnam tu'n, el kyk'uẍpi'n twi' Seb'a, ex ku'tz kyxon te Joab'. Tchaq'tzun Joab'tz tu'n txi' q'ajtza'n chun tu'n tkyaj kytzaqpi'n nintnam, teyiletzun junjun e'anj kyja, atzunte Joab' anjtlti'j Jerusalen yolil tuk'i'l nimaqkawil.

Nimaq ajb'el kye t-xjal Dab'i(2 S 8.15-18; 1 Cr 18.14-17)

23Okq'o'n Joab' te nejenel kyib'aj kykyaqilju' xjal te q'oj toj Israel, atzunte B'enayiy, tk'wal Joyada, te nejenel kyib'aju' xq'uqil seretey ex peletey.

24Atzu'n Adoram ka'yilte aq'untl ilxi'xti'j, atzu'n Josapat tk'wal Alyud te t-ajtz'ib'al nimaqkawil.

25Atzu'n Seb'a tz'ib'al tqanil, aye'tzun paleju' Sadok ex Ab'yatar.

26Ex ikx Ira, aj Jayir, paletoq te Dab'i.