Pr 13 - Mam Ostuncalco Bible

1Aju' k'wal ati tnab'l inxi' tb'i'nju' tzak'b'il tu'n manb'aj;

atzunju' mixti' tnab'l naqnik' tb'i'nju' tzak'b'il.

2Teyile junjun ntk'mo'nju' twitzlalil tyol,

aye'tzunju' nche' jawmiltz'uj ati tu'n kychjonte kyil.

3Alkyete' nkub' tjk'u'n taq', b'a'n kyxe'la';

atzunju' mya'l yolin nb'o'lj tu'nx tnab'l.

4In ka'ylaju' ky'ej ex mixti'te nokyal tu'n;

atzunju' naq'unan, nchmet ti'xti' te.

5Myab'a'nte' chajyolil tojtwitzju' xjal tnik'alti'j;

atzunju' b'inchal myab'a'n ch'ixb'ilxte'.

6Aju' tzinun xq'uqilte' xjal tnik'alti'j;

atzunju' aj il nkub'o'lj toju' il.

7Ate' xjal kuxi'xtej q'inunqe' extzun mixti'x ati kye;

ate'tzuntl nakutej mixti'xte' tixti'kye, wichaqa q'inunqe'.

8Aju' q'inun tu'nju' tq'inumal nelje ti'j;

atzunte' prow mixti'xte nelje ti'j.

9Nche qoptz'aju' tnik'alkyi'j kse'n spik'un ntilky'aj;

Aye'tzu'n b'inchal myab'a'n ikyqe' kse'n kantil yupjni.

10Noqx q'ojte' ntzaj tu'nju' nimjtib'il;

atzunju' nab'l atzu' ta' kyuk'i'lju' me's.

11Aju' pwaq nkanb'et tuk'i'l sb'ub'l lwiy nkub'naj;

atzunju' chab'a nkanb'et ika' tchmet.

12B'isb'ajilxte' q'uqb'ab'l k'u'j minti' njapun,

qatzun njapunju' qajb'il, ikyxixte' kse'n jun wi' tze txijli.

13Alkyete' minti' ntb'i'n tzak'b'il tzul toj tk'u'j;

alkyetzunte matxi tb'i'n ktk'ma' tu'me'l t-xel.

14Nim tajb'en tyoju' ati tnab'l toj chwinqlal

tu'n qklet toj tq'ob' kamik.

15Aju' b'a'n tnab'l b'a'n tilwi,

aye'tzu'n xmletz' nche kub'o'lj.

16Alkyete ati tnab'l nximan b'a'nxi'x,

atzunju' xjal mixti' tnab'l, ntzalaj toju' t-xnakyil.

17Aju' myab'a'n sanjelal nqo' b'o'lj tu'n,

atzunju' b'a'n sanjelal nqo klet tu'n.

18Alkyete minti' xtb'i nab'l kb'el prowix ex k'elel tch'ixaw;

atzunju' ntq'a' tzak'u'tib' nim oklenj ktk'ma'.

19Tzalajb'ilte' ajtjapunju' tb'isqk'u'j.

aye'tzu'n xnak layx kyej kytzaqpi'n myab'a'n.

20B'eta kyuk'i'lju' ati kynab'l, k'okyeltzun tnab'ltza;

qatzun matmujb'a tib'a kyuk'i'lju' xnak kb'el yajtiya.

21Aye'ju' aj il majx nche' joyli tu'nju' myab'a'n;

aye'tzu'n tnik'alkyi'j che tzajel k'i'wlana toju' b'a'n.

22A tq'inumalju' b'a'n xjal npon kanun kye tchman;

atzunte' aj il aju' tq'inumal nkyej toj kyq'ob'ju' tnik'alkyi'j.

23Nim twaju' prow nchmet toju' ttx'otx',

atzu'n ja mixti' tnik'alilti'j nim nkub' yajti.

24Qa nlaqja tiju' tk'wala, tzak'unxa;

alkyete' naq nka'yin ti'j, min ntk'u'jlan.

25Aju' xjal tnik'alti'j nwan b'a'nxi'x,

atzunju' b'inchal myab'a'n mixti'x nnoj.