1Che numeku'ye' nwitze', tnam toj ninnjab'.
kyiq'i'nktz kyib'e' nimaqtnam, tu'n tkyaqil kyipumale'.
Kukytzaje', qoqe' yolin tib'aju' lu;
kqb'u'yi'qib' tu'n qyolin ti'j.
2¿Alkye kub' q'onte nimaqkawil lu toj tjawetzq'ij
ju' nkanb'an kukxju'?
¿Alkye nkub' q'onkye nimaqtnam toj tq'ob'
ex nb'inchante tu'n kyniman nimaqkawil te,
tu'n kykub'tchen ex tu'n kyxit-sputi'n kse'n ttxa triy
tu'n tk'uẍtx'e'nb'il ex tu'n t-smaj?
3¿Alkye nb'inchante tu'n tljonte toj kyq'ij ex chab'a' nkub'kyi'j tu'n
naku'j min nche kub'tqan twitz tx'otx'?
4¿Alkye matxi' b'inchante aq'untl lu?
¿Alkye oje kyej tz'ib'ante tqanil
ttzajlenx ojtxi'?
Ayine' Dyos Manb'aj, oqinkxe' Dyos,
ayine' tnejel ex mankb'il.
5Kyilju' tnam toj ninnjab'
ex tzaj tchi kyi'j;
majx lu'lunju' tx'otx' tkyaqil.
Xi'kytzaj, luqe' che ul.
6Teyile junjunju' nb'ant chukchaq aq'untl tu'n
ntkuwsa'ntib' ex ntoni'n juntel.
7Aju' b'inchal tilb'ilal nxi' oni'nte tx'nol q'anpwaq;
atzu'n npojin tk'i tx'inb'il nxi' oninte jumal pojb'il,
ex intma'n qa b'a'nju' tzuyb'ente,
ex nkyajtb'incha'n tilb'ilal b'a'nxi'x tu'n klawẍ
tu'n lalun ch'uyujla.
8Kyb'intzpe'ye' aj Israel, tyajajil Jakob',
nmajine', oje jawnsk'o'ne',
tnam tyajajil wamiwe' Ab'raam:
9Ayine' netzq'inteya tzmax ttxa'n tx'otx',
tzaj ntxko'na tzmax toju' tx'otx' najchaq
ex xinma'ne': Aya nmajine', nchije' teya.
Jaw nsk'o'na ex b'ajx tz'ela' wik'u'na'ya.
10Lalun xob'a', qu'n atinqinwe' tuk'i'la;
lan xob'a', ayinwe' Dyos jank'uluna'ya.
Nxinq'o'nwe' tipumala, inwoni'na,
tzyu'na wu'ne' toju' nq'ob'e' nkanb'an.
11Kykyaqilkye' nche ik'onteya
k'elel kych'ixaw ex che b'el me'ssa'n;
majx che b'el najsa'nkye'
nche q'ojin ti'ja.
12Kche tjya'ya tajq'oja
ex lay che elyal tu'na;
che okyelkye' nche q'ojin ti'ja
naku'j mixti'qe' teya.
13Qu'n xqno'na wu'ne'
ayine' Dyos Manb'aj janajb'ena'ya;
matxi' txinma'ne' teya: Lalun xob'a', chin onilwe' ti'ja, nchije' teya, chi Dyos.
14Intma'n Qman Dyos kjalu:
Aj Israel, tyajajil Jakob',
maskye b'o'sa ex mixti' tipumala,
lalun xob'a; chin onilwe' tuk'i'la.
Ayinwe' klolteya, ayine' Dyos Xjan te Israel.
15K'okyela wu'ne' te jun triyb'il,
ak'a'j ex kuw twitzte;
che b'eltchena witz, che b'el tquqsa'na,
che b'entelju' witz tu'na kse'nte ttxa triy.
16Che b'ajel t-xq'iq'i'na ex che kxeltiqa'n kyq'iq';
che b'ajex sputi'n tu'n kyq'iq' jb'al.
Che tzalajeltzuntze' wuk'i'le',
che tzalajele' wi'je' ayine' Dyos Xjal.
17Nche jyon a' xjal prowqe' ex mixti' ati kye
ex lay knet kyu'n.
Matxi' kuxtzqij toj kyqul tu'n k'waj;
ayintzunwe' chin xelka'yinkye,
ayine' Dyos Manb'aj janche ajb'ena' aj Israel, lay che kyajnkolb'e'ne'.
18Che jawitz poq'chaj a' wu'ne' kywi' sle'j witz
e' t-xiklil a' kyoj b'ya';
kjawil b'entju' chq'ajlaj wu'ne' te sob'on,
che jawitz poq'chaj a' wu'ne' toju' tzqij tx'otx'.
19Che kxe'lwawa'ne' k'ute toj chq'ajlaj,
e'tze akasya, ktxab' ex tqan olib'o;
che nch'isa'ye' tzaj toju' tzqij tx'otx'
kyuk'i'l tze ab'eto ex tzis,
20tu'n kylonte ex tu'n kyb'inte kykyaqil xjal,
tu'n t-xikyb'i'n ex tu'n tkane toj kywitz
qa tu'n wipumale' xnb'inchaju'ye' lu,
ayine' Dyos Manb'aj, Xjan kye aj Israel, chi Dyos.
Nxjelun Dyos kye witzleb'21Intma'n Qman Dyos, nimaqkawil kye tyajajil Jakob' kjalu:
Kukytzaje' witzleb' klolte kyib'e',
kukytzaje' klolte kyoklene'.
22Kukytzaje' q'malte qeye' titi' tzul yajxi'tl
ex chik'b'alte ti'ju' matxi' b'aj,
kb'el qb'i'nqe';
kymanqe'tzju'ye' ti'xti' che ul yajxi'tl
tu'n kykane ja che pomela' b'aj;
23kyma'ntze' titi' kb'ajel yajxi'tl,
kyek'untze' qa axxi'x dyosqe'ye'.
kyb'inchame' titi' kb'antel kyu'ne', b'a'n mujqa taq'wix,
jun ti'xti' tu'n qxob'e' ex tu'n toktchi qi'je'.
24¡Mixna'ti'xkye' kyoklen
ex mixti'xte nb'ent kyu'ne'!
Mijsoq'xte' xjal nk'ulun kyeye'.
25Kub' nq'o'ne' jun xjal toj tjawetzq'ij;
mantxoke' tb'i,
ex makanun toj tnayajkya'j.
Nche kub' twab'i'n kawil naku'j xoq'lqe';
kse'n b'inchal k'wil, nt-xyuq'i'n xoq'l tu'n tqan.
26¿Alkye q'manteju' lu atxi'x t-xe tnejel,
tu'nwtlo qb'inte?
¿alkye q'mante atxi'x ojtxi',
tu'nwtlo qka'yinte qa ax te?
Mix-a'lo' junkye' q'mante tpakb'al,
mix-a'lo' jun tb'i'wt jun kyole'.
27Ayine' inq'mante te Syon atxi'x t-xetnejel,
ex ayine' inxichq'onte jun sanjelal Jerusalen
q'malte te qa lwiy che ul jumajtlju' t-xjal.
28Nxinka'yine' ex mix-a'lo' juntl dyos nul;
mix-a'lo' jun tu'nwt tq'on nab'l,
mix-a'lo' jun ntzaj tzaq'wenkye' nxjele'.
29¡Mixti'x junkye atiwt toklen!
mixti'xte nb'ent kyu'n;
naq witzleb'qekye' xopa'j kyoj, chi Dyos.
Who We AreWhat We EelieveWhat We Do
2025 by iamachristian.org,Inc All rights reserved.
