Is 60 - Mam Ostuncalco Bible

Tajwalil ak'a'j Jerusalen

1We'ktza Jerusalen, qoptz'ajxa,

qu'n matxi' tzul spik'un teya

ex nqoptz'aju' tajwalil Qman Dyos tib'aja.

2Majx jupli qlolj twitz tx'otx',

toj qonik'an ta'qe' nimaqtnam,

atzu'n tib'aja kqoptz'ajel t-spik'umal Dyos

ex ktenb'elju' tajwalil tib'aja.

3Che ulju' nimaqtnam toju' t-spik'umala,

ex che ul nimaqkawil toj t-spik'umala ntzaj t-xe kya'j.

4Ka'yinxpe'ya ti'jileya:

inkyb'u'yi'n kyib' kykyaqil ex che ul tk'etza.

Tzmax najchaq che b'ajtzajela' tk'wala;

chle'nqe' tmyala ajkyb'ajtzaj.

5Okxi'x tzalajela ajkyxi tka'yi'na,

okxi'x nojel tanmiya tu'n tzalajb'il;

che tzajel q'i'n k'uwenj kyoju' tnam toj ninnjab' teya,

che kxe'l q'o'n kyq'inumal nimaqtnam teya.

6Nim txqan chej kamey che ul tk'etza

tzajniqe' toj Madyan ex Epa;

che b'ju'l kykyaqil aj Sab'a,

iqa'n q'anpwaq ex sturak kyu'n,

ex kkyq'a' tqanil tb'inchb'aj Qman Dyos tb'anilqexi'x.

7Che okyel kykyaqilju' rit toj Kyedar teya;

che ajb'elju' rit toj Neb'ayot teya,

tu'n kykub' tq'o'na te oyaj tb'anilxi'x

tib'aju' q'olb'eb'l twitz Qman Dyos,

majx tb'anilxi'x k'elela'ju' tja te k'u'lb'il tu'n.

8¿Alkyeqetzu'n nche lipan naku'x muj,

naku'j kse'nqe' paloms nchex lik'ik'in toj kyja?

9B'ark qekye' che ul junx,

kyuk'i'l b'ark te Tarsis nejliqe' kywitz txqantl

q'i'nqe' tk'wala ẍetzaj najchaq tu'n,

tuk'i'l kyq'anpwaq ex kysaqpwaq

te ninb'ilte Qman Dyos Xjan janche ajb'ena' aj Israel,

ju' okq'onte toklena nimxi'x.

10Najchaq xjalqe' che jawil b'inchantetl nimaqtapi ti'ja,

ex che ajb'el kynimaqkawil teya;

b'a'nqa kub' tz'e'ysa'n twitza tu'n Dyos tej ttzaj ttx'u'jil ti'ja,

atzu'n ja'lo matzajlaqjtk'u'j ti'ja tu'n tk'ujlalil.

11Che jqetelju' tjpela kukxju';

lay che jpet q'ijtl ex qonik'an,

tu'n kytzaj q'i'n kyq'inumal nimaqtnam teya

ex tu'n kyokxju' nimaqkawil kyuk'i'l txqantl tuk'i'la.

12Qa ati jun tnam min sajb'en teya, kb'el xitj;

b'a'ntzun nimaqtnam, majx che b'ajel xitj.

13Lu ntma'n Qman Dyos te Jerusalen:

Tzulju' q'inumal twi' witz Lib'ano tuk'i'la:

e'tze tzaj, tzis ex

tu'n tb'entju' njaye' xa'wanku'xi'x,

tu'n tajwaletju' jakb'ela' nq'o'n nqane'.

14Che b'ju'l kyk'walju' eb'aj yajlanteya

kb'el kyme'ssa'nkyib' twitza,

ex kykyaqilju' ntoq che el ik'onteya

che b'elmeje twitza

ex kkyma' teya: Ninttanam Qman Dyos,

Aya Syon te Dyos Xjan kye aj Israel, chechiku' teya.

15Lay kyej kolb'e'ntla,

lay kyej ik'o'na ex lay kyeja tjunala,

k'okyela tb'anilxi'x tejumajx wu'ne',

ktenb'el tzalajb'il toja tejumajx.

16Kxel kyq'o'n nimaqtnam tb'anil wab'j teya

ex ktzajel kyiq'i'n nimaqkawil kyq'inumal teya;

k'eleltzun tnik'tza qa ayine' Dyos Manb'aj klolteya,

qa ayine' Nim Wipumale' ja ajb'ena' Jakob', tzaqpilteya.

17Q'anpwaq kxe'l nq'o'ne' teya te t-xel q'ank'uxb'il,

ex saqpwaq te t-xel k'uxb'il,

ex q'ank'uxb'il te t-xel tze,

ex k'uxb'il te t-xel ab'j.

Kb'incha'ye' tu'n tkawin nak'b'il teya

ex tu'n txi' iq'i'na tu'n ttzinunal.

18Lay b'injtz jumajtl q'oj

kyxol xjal toju' ttx'otx'a

ex lay tzajtl xitb'il toju' tx'otx' tzyu'n tu'na,

okpe' k'okyel tq'o'na tb'i nimaqtapi ti'ja Kolb'il

exqe' tjpela k'okyel tq'o'na kyb'i ajwalb'il.

19Min nojqelantl tu'n ttzaj k'ant q'ij ti'ja te q'ijtl,

ex tu'nwt ttzaj k'ant xjaw ti'ja te q'onik'an,

qu'n ayine' Dyos Manb'aj chin okyel te t-spik'umala tejumajx;

ayine' Dyos Manb'aj, chin qoptz'ajele' ti'ja.

20Lay kub' yupju' q'ij exju' xjaw teya,

qu'n ayine' Dyos Manb'aj,

chin okyel te t-spik'umala tejumajx;

kb'ajel kytxa'nju' tq'ijlalil tb'isa.

21Che okyel kykyaqilju' xjal toja te b'a'nxjal,

che okyel tajawju' tx'otx' tejumajx,

ikyqe' kse'n t-xul junwi' awal ku'x wawa'ne',

taq'unb'en nq'ob' qe'ye'

tu'n nyek'unteye' wajwalile'.

22Che chmetelkye' jun tzb'ojtl xjal lu toj mutx'chaq;

che chmetelkye' tal naqjte'x kyb'aj lu te jun nintnam.

Knb'incha'ye' ayine' Dyos Manb'aj tu'n tb'ant lwiy,

tojxi'x tq'ijlalil, chi Dyos.