Jue 19 - Mam Ostuncalco Bible

Jun b'aj ti'j aj Leb'i tuk'i'l tqya

1Toju' tq'ijlalil mixtoqti' nimaqkawil toj Israel, najlitoq jun aj Leb'i najchaq kywi'witz te Eprayin tzaj tiq'i'n jun qya aj B'elen toj Juda te tqya.

2Atzunte' qya lu jaw q'ojin tuk'i'l ex anjti'j tja tman toj B'elen. Tb'ajlenxi'tzun kyaje' xjaw tpomlen tja.

3Xi' aj Leb'i jyolte ex kub'sal twitz tu'n tanjtzti'j tuk'i'l. Xitiq'i'n jun tmajin ex kab'e' tb'ur, atzunj tpon, k'monjtz tu'nju' qya toj tja tman.

4Ex ikx k'monjtz toj tzalajb'il tu'n tmanju' qya, ex xitma'n tu'n tkyaj kyuk'i'l. E'kyaj oxe' q'ij aj Leb'i tuk'i'lju' tmajin tja tmanju' qya, e'wan, e'k'wan ex e'wtan,

5Tojtzun tkyaji'n q'ij b'a'nprim kyjawe' tu'n kyanj. Tetzunj ikytoqu' kyxi', xitma'n tman qya te tji:

—Wana nej, maskye naq jun piẍ twaya tu'ntzun atiku' tipumala toj b'e, chij.

6Ekub'tzun qe kykab'ilx wal ex k'wal, xi'tzun tma'n tmanju' txin te tu'n tkyaj jun qonik'antl toj tzalajb'il.

7B'a'ntzunqa tajb'ilte aj Leb'i tu'n tanj tej tjawe', okye'ju' tji ti'j tu'n tkyejten, ex kyejten.

8B'a'nprim tjawe' aj Leb'i toj tjwe'yi'n q'ij tu'n tanj, kub'san jumajtl tmanju' txin te tu'n t-xitwan jun twa nej, tu'ntzun atiku' tipumal; e'wantzuntz junx, o'kx tjaw q'ij.

9Tetzunj tjawe' aj Leb'i tu'n tanj tuk'i'lju' tqya exju' tmajin, xitma'nju' tji qa matxitoq jaw q'ij ex matxitoq qo'qex, ex xitma'n te tu'n tkyejten jun qonik'antl toj tzalajb'il ex tu'n tanj te prim toj jun q'ijtl.

10Atzunte' aj Leb'i min taj tu'n tkyejten jun qonik'antl, anj tuk'i'lju' tqya ex tmajin exju' kab'e' tb'ur tokx q'uqb'il kyi'j. Atzunj kykanun tk'etz Jeb'us, ju' Jerusalen,

11xitma'nju' majin te aj Leb'i:

—¿Ma b'a'n toj twitza tu'n qkyaj teju' qonik'an toju' ninkytanam jeb'usey? chij.

12Xitzun ttzaq'we'n aj Leb'i te:

—Lay qo'x toj jun nintnam qa mya kytanam aj Israel, qo'ya tzmax Kib'ea,

13qo'qe'ye' tu'n qkyaj wtan Kib'ea mujqa Rama, chij.

14Xikyljo'ntzun kyb'etz, tetzunj xi'toq tex q'ij e'pon Kib'ea, ninkytanam tyajajil B'enjamin.

15Ewe'tzuntz ex e'okx toj Kib'ea tu'n kykyaj te qonik'an atzu', ex kub' qe aj Leb'i toj k'wik, qu'n mix-a'lo' xiq'onte kykub'el tu'n kykyaj wtan.

16O'kx tik' jun tijwnaq tzajnix aq'unal toj kojb'il matxitoq qo ok yupj. Tetoq juntl tnam kywi'witz te Eprayin, naq te jte' q'ij atitoq atzu', qu'n tyajajil B'enjamin qekye' najlqe'toq toju' tnam Kib'ea.

17Tetzunj t-xi' tka'yi'n tijwnaqju' ajb'etu'n toj k'wik, xitqani'n te:

—¿Jasaja'ya, ex jamatxa'ya? chij.

18Xitzun ttzaq'we'n aj Leb'i te:

—Xi' xqo tzaja'ye' B'elen toj Juda ex maqo'xe' tzmax kywi'witz te Eprayin ja najla'qine'. Machin tene' B'elen, atzu'n ja'lo matz'anj wi'je' njaye', naqtzun a' mix-a'lo' ntzaj q'onte anb'il jatu'n qkyaja' wtane'.

19Atite k'ul ex ttxa triy te kywa nb'ure', ex atite qwaye' ex qk'wa'ye' te qoxile'. Mixti'te nojqelan qeye', chij.

20Atzunte' tijwnaq xittzaq'we'n te:

—Lalun b'isuna. Knb'incha'we' tkyaqilju' nojqelan teya. Myab'a'n toj nwitze' tu'n tex qonik'an tu'na toj k'wik, chij.

21Exitiq'i'ntzuntz tja, tetzunj tb'je'l kytxjo'n ajb'etu'n ti'j kyqan, e'wan ex ek'wan, ex xitq'o'n tijwnaq kywaju' b'ur.

22Tojtzu'n kmoj inxi'xtoq che tzalaj, b'aj kytxoli'n kyib' junjun ichan ti'ju' ja, ju' ate'toq toju' nintnam q'o'nkyib' b'inchal taq'wixil ex e'okten pojilteju' tjpel ja, intoq okx kyma'n teju' tijwnaq tajaw ja kjalu:

—¡Q'omitzju'ya ichan sul tuk'i'la! ¡Qajb'ile' tu'n qkub' kẍeye' tuk'i'l! chechij.

23Atzu'n tajaw ja kub'san kye:

—¡Lay witz'in, kyb'inchame' xtalb'il! ¡Lalun kyb'inchaye' taq'wix lu, qu'n mank'amwe' ichan lu tu'n tkyaj wtal njaye'!

24Qatzun kyajb'ile', ati na'ju' nmyale', na'mx t-xitzyu'nti'j tu'n ichan. Ex ati tqyaju' ichan. Che elex nq'o'ne' tu'n kykub' kyyaju'ne' ex tu'n kyb'inchanteye' kyuk'i'l titi' kyajb'ile'. Naq o'kx lan kyb'incha jun ti'xti'ye' taq'wix ti'ju' ichan lu, chij.

25Aye'tzunkye mixti' xikyb'i'n tyolju' tijwnaq, tzajtzu'n aj Leb'i etztq'o'n tqya toj b'e, e'oktzun ten ichan lu jwolte ex b'aj kyyajla'n tb'aj qonik'an, tzmax qsqix. Kyej kytzaqpi'ntzuntz.

26Intoqtzun qo elspik'e' tej tpon jumajtlu' qya tja tijwnaq, jatoq ta' tchmil, kub' tz'aq ttzija ex majx kyim.

27Tetzunj tjawe' tchmil, tjaqju' jatu'n t-xitljo'n tb'e, o'kx t-xitka'yi'n tqya woqli ttzija, tkub'qe' tq'ob' t-xeju' tjpel ja.

28Xitma'ntzuntz te:

—We'ktza qo'ya, chij.

Atzunte' qya mixti' tzaq'wi. Jawxtzun tq'o'nju' qya kyimnitl tib'aj jun b'ur, xi'tzun tljo'n tb'etz tu'n tpon tja.

29Tetzunj tpon tja, tzaj tiq'i'n jun qesb'il ex b'ajkub' tjonju' qtzan tqya toj kab'lajoj (12) piẍ, xit-sma'ntzuntz kyxol kykyaqilju' aj Israel.

30Kykyaqiltzunju' e'okka'yinte intoq kyma'n ikjalu:

—B'ajx qila' jun ti'xti' kse'n ja'lu kyetzlenju' aj Israel toj Ejipt. Ati tu'n qximan ti'ju' lu ex tu'n tkyejb'ent ti'j titi' kqb'incha' ti'j, chechij.