1¡Chin t-xq'uqima Nman Dyos, qu'n tuk'i'la njyo'na'ye' kolb'ilweye'!
2Oje txi' nma'ne' teya:
Aya Nman Dyos, aya ntzaj q'onte b'a'n weye';
mixti' juntl kse'n aya.
3Nxi'x chin tzalaje' kyu'nju' xjal toju' ntaname'
o'kxtzu' nche k'uluna' teya,
4aye'ju' nche kub' kychmo'n kywitzileb'
ex nche k'ulun kye tuk'i'l ninb'il.
¡Milo najchi'j tu'n telwe' chik' wu'n te chojb'il kywitzu' kydyos!
¡Milo najchi'j tu'n tjaw nma'nwe' kyb'i!
5Nman Dyos, aya wetzb'ile';
aya nky'i'wlana weye';
toj tq'ob'a ta'ju' nchwinqlale'.
6Achb'ajilxi'xju' nnajb'ile' yab'o'k;
¡tb'anilxi'xju' etzb'il nk'ame' teya!
7Kjawil nnima'nwe' Qman Dyos, qu'n ate ẍaqlul weye',
ex nyolin toj wanmiye' kyoj qonik'an tu'n nb'inchanteye' b'a'n.
8Majx na'n Qman Dyos wu'ne';
qa ati Dyos wuk'i'le', lay chin kub' tz'aqe'.
9Qu'mtzun nojni wanmiye' tu'n tzalajb'il.
Kchin anq'ile' q'uqlixi'x nk'u'je',
10layna' chin kyej tq'o'na toju' muqb'il,
¡lay kyej tq'o'na nniman teya toj jul!
11Ktzajel tyek'u'na tb'eyil chwinqlal weye'.
Nim tzalajb'il ati twitza;
ati tzalajb'il tejumajx tuk'i'la, chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
