Jue 3 - Mam Ostuncalco Bible

Aye' tnam e'kyajten Kanaan

1Aye' tnam ja'lu e'kyaj tq'o'n Qman Dyos toju' tx'otx' naqx tu'n tik' kywitzlalilu' aj Israel na'mxtoq kyitz'ji tej tok q'oj tu'n tkub'ti'j Kanaan.

2E' kyej tq'o'n Qman Dyos kyxol tu'ntzun tb'ant kyq'ojin aj Israel b'ajxtoq che q'ojina'.

3Aye' e'kyajten ja'lu: Jwe' nejenel kye pilistey, kykyaqilju' aj Kanaan, aj Sidon exqe' aj eb'ey najlqe'toq twi' witz Lib'ano, tzajx twi' witz B'aal-ermon ex pomnix Amat.

4Kyuk'i'ltzun ja'lu ekub'a' tq'o'n Qman Dyos aj Israel tu'n tik'kywitzlalil qama che'x kyb'i'n chaq'b'il taq' kyeju' ojtxi' kyyajilb'en tu'nel Moyses.

5Iktzu'n tzyeta' kyanq'in aj Israel kyxol aj Kanaan, tyajajil Et, amorey, aj Perisya, eb'ey ex jeb'us,

6aye'tzu'n kyk'wal ex kymyal aj Israel eb'aj mje kyuk'i'l kyk'wal ex kymyalju' tnam lu, ex ek'ulun kyeju' kydyos.

E'tkol Otonyel aj Israel toj tq'ob' Kusan-risataym

7Myab'a'n ela'ju' kyb'inchb'aj aj Israel toj twitz Qman Dyos, qu'n ik'tna'l Qman Dyos kyu'n, ex ek'ulun kye chukchaq tilb'ilal B'aal ex Astarte.

8Tu'ntzun tpaj ja'lu tzaj ttx'u'jil Qman Dyos kyi'j ex eb'ajx tq'o'n toj tq'ob' Kusan-risataym, nimaqkawil toj Mesopotamya. Wajxaq ab'q'i e'ajb'en aj Israel te Kusan-risataym,

9tzmaxi'j t-xi' kykub'sa'n te Qman Dyos, atzunte Qman Dyos jaw t-sk'o'n jun klol kye. A Otonyel tk'wal Senas, titz'in Kaleb', klonkye:

10ten tipumal Otonyel tu'n t-xew Qman Dyos, ok te nejenel kye aj Israel; extzuntz toj q'oj ex kanb'an tu'n Qman Dyos tib'aj Kusan-risataym.

11Tb'ajlenxi'tzun ja'lu ten kab'naq (40) ab'q'i nak'b'il toju' tx'otx'.

E'tkol Eud aj Israel toj kyq'ob' aj Moab'

Tkyimlexi'tzun Otonyel,

12e'aq'wi jumajtl aj Israel b'inchal taq'wix twitz Qman Dyos, tu'ntzun tpaju' xitq'o'n Qman Dyos nimxi'x tipumal Eklon, nimaqkawil toj Moab', kyekywitz aj Israel.

13Tmujb'atib' Eklon kyuk'i'l aj Amon ex aj Amalek, e'q'ojintzuntz kyi'j aj Israel, ex tzyetju' nintnam toj tqan tut kyu'n.

14Wajxaqlajoj (18) ab'q'i e'ajb'en aj Israel te Eklon.

15-16E'kub'santzuntz te Qman Dyos, atzunte Qman Dyos jaw t-sk'o'n jun klol kye. A Eud tk'wal Kera kyxol tyajajil B'enjamin ok te klol kye. Xitzun kyma'n aj Israel te Eud tu'n t-xi' q'olte chojb'il te nimaqkawil Eklon, na'mxtoqtzun t-xi', kub' tb'incha'n jun tk'uẍtx'e'nb'il te kab'e' plaj twitzte, nik'jan metr twe'. Tnayajtoq Eud najb'en tu'n tq'ojin, qu'mtzun okx tk'lo'n tk'uẍtx'e'nb'il tjaq'u' tk'alb'il tojxi' t-xb'alun ku'j toj tb'a'nq'ob';

17xi'tzuntz q'olteju' chojb'il te Eklon, ju' etznitoq twitz b'a'nxi'x.

18T-xilenxi'tzun tq'o'n Eud chojb'il te Eklon, etz kyuk'i'lju' e'tzaj tuk'i'l,

19tetzunj kypon ja ta'qe' witzleb' nqayin tk'etz Kilkal, anjti'j Eud tk'etz Eklon ex xitma'n te kjalu:

Ati jun tqanil wu'ne' teya, naq a ati tu'n t-xinma'ne' teya tjunala, chij.

Xi'tzun tma'n nimaqkawil te tu'n lalun txi'pun tma'n, xitma'ntzuntz kyeju' intoq che ajb'en te tu'n kyetz tk'etz, ex eb'je'tz.

20Naqtzun nkyajten Eud tjunal tuk'i'l Eklon q'uqlitoq toju' tja te tojlab'l toj q'ijal, xi' lq'e tk'etz ex xitma'n te:

—Ate' tqanil saj wiq'i'ne' teya nimaqkawil, tu'n Dyos te', chij.

Atzunj tb'inte Eklon ja'lu, jaw we' toju' tq'uqb'il,

21atzunte Eud qu'n ana' tnayaj najb'en tu'n, jatztiq'i'n tk'uẍtx'e'nb'il toj tb'a'nq'ob' tu'nju' tnayaj, okt-xyu'ntzuntz toj tk'u'j Eklon.

22Kuwxi'x okx t-xyu'n toj tk'u'j Eklon, majx okxb'aju' k'uẍtx'e'nb'il tuk'i'lxi' tqan toj tchib'jil Eklon, majx kyej naj toj tk'u'j tu'nju' etznitwitz b'a'nxi'x, qu'n min etzti'ntl Eud.

23Eb'je'tztzun tjpu'n Eud tjpel ja kyuk'i'l jupb'ilkye, atzunte xi'etza' toj tokexspik'un.

24Tej matxitoq txi', e'ulju' intoq che ajb'en te nimaqkawil, tetzunj kyka'yinte jpu'ntoqte' ja, kub' kyxima'n qa okxtjpu'ntib' nimaqkawil toju' tja janojlana'.

25Tetzunj matxitoq che ayon nimtoj, eb'jaw lab'titzuntz tej kyka'yinte min q'o'n tu'n tetzju' nimaqkawil. Tzaj kyiq'i'ntzun taljatz, tetzunj tjqetju' ja kyu'n xikyka'yi'n kyajaw woqli twitz tx'otx'.

26Tej naqtoq ate'qe' xjal lu, oq Eud, ex texlenxi' jate'qe' witzleb' toj Kilkal, xi'kloltib' Seyirat.

27Tetzunj tkanun toj kytx'otx' aj Israel, xitq'ajtza'n chun kywi'witz te Eprayin tu'n kytxketu' aj Israel, ex kykyaqilx eb'ajku'tz twi' witz nejli Eud kywitz.

28Xitma'n Eud kye tu'n kyxilpe ti'j, qu'n oktoq che kanb'al tu'n Qman Dyos kyi'j aj Moab'ju' kyajq'oj. Exi'tzun lpetz ti'j ex e'kub'ten janaqch'i'n t-xe nin a' Jordan ex min kyaj tu'n tik'x jun xjal.

29Junmutx' jo'k'al (10,000) aj Moab' e'kub' kyb'yo'n toju' tq'ijlalil lu, kykyaqil kuw xjalqe' te q'oj ex min nche xob', mixti' jun tzaqpaj tu'n tkyaj anq'in.

30Iktzu'n kub'a'kyi'j aj Moab' kyu'n aj Israel. Tb'ajlenxi'tzun ja'lu ten kyajnaq (80) ab'q'i nak'b'il toju' tx'otx' Israel.

E'tkol Samkar aj Israel toj kyq'ob' pilistey

31Aju' juntl nejenel a Samkar, tk'wal Anat, e'kub' tb'yo'n junk'al lajnaq (600) pilistey tu'n jun tb'aqil txpetx wakx. Ex e'klet aj Israel tu'n.