1 S 8 - Mam Ostuncalco Bible

Kyqani aj Israel kynimaqkawil

1Tej ttijin Samwel e'oktq'o'n tk'wal te nejenel kyxol aj Israel.

2Joel tb'iju' tnejel tk'wal, atzunju' tkab' Ab'iy tb'i, intoq che kawin B'eerseb'a.

3Aye'tzu'n tk'wal Samwel mitoqkxa' nkyb'incha'nju' kse'nte kyman, eb'jo'k jamjol ti'j pwaq, intoq kyb'incha'ju' kyajb'il xjal tu'n pwaq ex mixtoqti' nkyb'incha'n tnik'alilti'j toju' kawb'il.

4B'ajtzun kyb'u'yi'n kyib' kykyaqilju' tijwnaq kyxol aj Israel ex exi' yolil tuk'i'l Samwel toj Rama,

5xikyma'ntzuntz te: Matxi' tijinta, aye'tzu'n tk'wala mikxa'tl nkyb'incha'n kse'n ntb'incha'na; qu'mtzun q'o'nk junta nimaqkawil tu'n tkawin qib'aje', kse'nx in b'inchet kyoj txqantl nimaqtnam.

6Myab'a'n ela' toj twitz Samwel tu'nju' xikyqani'n tu'n tkawil jun nimaqkawil kyib'aj, qu'mtzun kub'ten yolil tuk'i'l Qman Dyos toj na'j Dyos,

7atzunte Qman Dyos tzaj ttzaq'we'n te: B'inchama alkyexku' nkyqani'n tnam, qu'n ayinwe' nchinel kyik'o'n tu'n lalun chin kawintle' kyib'aj, ex myata.

8Atxi'x kyetzlen wiq'i'ne' toj Ejipt, matxi' kyb'inchaxi' weye' kse'n nkyb'incha'n teya ja'lo, matxi' chin kyej kyq'o'ne' tu'n kyk'ulun kye junxi'tl dyos.

9Qu'mtzun b'inchama kse'n nkyqani'n; ex majx q'manxa kye ti'j tkyaqil toklenju' nimaqkawil kkawil kyib'aj, chij te.

10Xi'tzun tma'n Samwelju' tzaq'web'l tu'n Qman Dyos kyeju' tnam inkyqani'n jun nimaqkawil.

11Xitma'n kye:

—Atzun tzulju' kyib'aje' tu'nju' nimaqkawil kkawil kyib'aje': Che kxe'l tiq'i'nju' kyk'wale', ex che okyel tq'o'n junjun ti'j karwaj te q'oj, junjuntl ti'j chej, atzun junjuntl tu'n kyxi' xq'uqilte.

12Che okyel tq'o'n junjun te nejenel kyib'aj kab'k'al lajnaq (1,000) xjal te q'oj, atzun junjuntl kyib'aj kab'naqlajoj (50). Kche okyel q'o'n jte'kye' tu'n kyaq'unanteju'ye' ttx'otx', ex tu'n tjaw b'u'yitju' twitz tawal, mujqa b'inchalkyeju' kyq'ojb'il ex kykarwaj te q'oj.

13Ex che kxe'l tiq'i'nju' kymyale' tu'n kyajb'en te, b'inchal k'ok'sb'il, b'inchal twa ex chujal wab'j.

14Kb'el ttzyu'nju' tb'anil kytx'otx'e', exju' tb'anil kyawb'ile' ub'a ex olib'o, kxe'l tq'o'ntzuntz kyeju' nche kawin tuk'i'l.

15K'elel tiq'i'n tlajoji'n tnej ti'ju' kytriye' ex kyawale' ub'a, Kxe'l tq'o'ntzuntz kyeju' nche kawin tuk'i'l ex kyeju' nejenel kye t-xjal te q'oj.

16Ex kche elel tiq'i'nju' kymajine' ichan ex qya, exqe'ju' kywakyixe' ex kyb'ure' tb'anilqexi'x, tu'n kyaq'unan toju' taq'un.

17Ex kche eleltiq'i'n tlajoji'n tnej ti'ju' kyrite', expe' aye'ku'ye' kche ajb'ele' te.

18Alkyetzun q'ij qama che k'ab'je' tu'n tpaju' nimaqkawil ojetoq jawkysk'o'ne', lay che'x b'i'ntle' tu'n Qman Dyos.

19Aye'tzunkye' tnam, mixjun xikyb'i'n b'ajx tma'n Samwel kye, xikytzaq'we'n: Maskyelo ikju'.

—B'a'ntzun qa ikyju', qajb'ilqe' tu'n tten jun nimaqkawil,

20tu'n qokye' kse'nqe' txqantl nimaqtnam, tu'n tkawin, tu'n tchaq'un ex tu'n tnuk'un qib'aje' tu'n qxi'ye' toj q'oj, chechij.

21Tb'ajelenxi'tzun tb'i'n Samwel kyolju' tnam, b'ajx tma'n te Qman Dyos;

22atzunte Qman Dyos tzaj ttzaq'we'n te:

—B'inchama kye aju' inkyqani'n, q'onka jun nimaqkawil kye, chij.

Tchaq'tzun Samweltz tu'n tanjile kyi'ju' aj Israel tojilex kytanam.