Ez 22 - Mam Ostuncalco Bible

B'yojxjali'n toj Jerusalen

1Tzaj yolin Qman Dyos weye', tma:

2Ichan, aya kchik'b'alte tilju' nintnam b'yolxjal. Kxe'l tma'na tkyaqilju' ti'xti' taq'wixi'x oje tb'incha,

3ex kxe'l tma'na te: A ntma'n Dyos ja'lu: Aya nintnam, nche kub' tb'yo'na najliqe' toja ex nche kub' tb'incha'na witzleb' te tz'ilsab'l tib'a, ¡noqx tu'n tpontl kmuj teya!

4Matxi' b'aj ttz'ilsa'n tib'a tu'nju' b'yojwnaqi'n ẍe b'aj tb'incha'na ex kyu'n witzleb' matxi' che kub' tb'incha'na; matb'inchaya tu'n tq'naxa ex matzul lq'eju' kmuj te b'ajsb'il q'ij teya. Ikytzu'n, knb'incha'ye' tu'n tok i'li'na kyu'n tnam, tu'n kyxmayin kykyaqil nimaqtnam ti'ja.

5Che xmayilju' ate' nqaku' exqe' ate' najchaq ti'ja, aya nintnam, nim tyolinjtza tu'nju' twitzleb'i'n ex ttx'uyb'ila.

6Atzu' ta'qe' kawil kye aj Israel, najliqe' toj toja ex nxi'x che b'yon xjal, tkyaqilju' kyajb'il.

7Min nche nimanju' xjal najliqe' toja te kyman ex te kytxu, nche okten yajlalkyeju' najchaq xjal, nb'je'l kyiq'i'n ti'xti' kye meb'a ex kye qya kyimni kychmil.

8Min nche kynima'n najb'il xjanqe' weye' exqe' q'ij te ojlab'l.

9Tu'n tpaju' kychajyolil, ati kypaj junjun xjal najliqe' toja tu'n kykyim junjuntl; nche ten kyoju' nimaqwan nche kub' q'o'n ninb'ilkye witzleb', ex nche kyb'incha'n ti'xti' taq'wixi'x.

10Ate' junjun nche kub'kẍe tuk'i'l t-xu'jil kyman, mujqa tuk'i'lju' qya toju' tq'ijlalil akxtoq nkb'u'l ttx'ajin.

11Ate' junjun nche kub'kẍe tuk'i'l t-xu'jil kywnaqil, mujqa nche kub'kẍe ch'ixb'ilxi'x tuk'i'l kylib', mujqa nche oktzaqpaj jwolte jun tmyal kyman.

12Ate' junjuntlju' najliqe' toja nkyq'o'n k'ayi'kyib' tu'n kykub' kyb'yo'n junjuntl. Nkyq'o'n medi ch'ex tuk'i'l tub'chil, nb'je'l kyiq'i'n ti'xti' te kywnaqil ex nche b'jo'k tzaqpaj kyi'j, ex nchin nik'tna'le' kyu'n. Ayine' Dyos Manb'aj, nchin q'mante.

13Nchin q'ojine' tu'n tpaju' nelq'ana ex nb'yon xjala.

14Lalun t-ximaya qa kb'antel nmqete' tu'na ajnb'inchante jun ti'xti'ye' ti'ja. Ayine' Dyos Manb'aj, matxi' nmaye', ex kjapumel wu'ne':

15che kxe'l nsputi'ne' kyoj kykyaqil nimaqtnam, che xe'l nchto'ne' kyoj tkyaqil tx'otx', ex knẍtilsa'ya te tkyaqil ttz'ilila,

16taq'wix chin elela'ye' kywitzju' txqantl nimaqtnam tu'na, oktzun k'elel tnik'a qa ayine' Dyos Manb'aj, chi Dyos.

17Tzaj yolin Qman Dyos weye', tma:

18Iky nela' tnam Israel weye' kse'n txkyejleb'en mixti'tl tajb'en nkyaj ajtokx q'et q'ank'uxb'il, stayn, k'uxb'il, plom mujqa saqpwaq toj tq'aq'al chuj.

19Qu'mtzun, ayine' Dyos Manb'aj, nchin q'mante: Kykyaqilnaye' matxi' che okye' se'n jun ti'xti' mixti'tl tajb'en, che b'ajel nb'uyi'ne' toj Jerusalen.

20Kse'n saqpwaq, k'uxb'il q'anka'yin, k'uxb'il, plom ex stayn nche okxq'o'n junx toj chuj, ex nokx pichk'et q'aq' tjaq tu'n tkub' niwj, ikytzunwe', toj ntx'u'jile' kuw, che tzajel nb'u'yine' ex che tzajel niwje' wu'ne'.

21K'okyex nb'ichk'ane' tq'aq'al ntx'u'jile', che nb'uyi'tzuntze' tu'n kykub' niwje' toj tnky'ajchaqilju' nintnam.

22Ikytzu'n se'n nkub' niwju' saqpwaq toj chuj, ikxtzunkyeju'ye' toj nky'ajchaq nintnam. Ikytzu'n k'elela' kynik'e' weye', qa ayine' Dyos Manb'aj, matxi' nb'ajsa'ne' ntx'u'jile' kyi'je', chi Dyos.

23Tzaj yolin Qman Dyos weye', tma:

24Ichan, q'manxa kye aj Israel: Jun tnamqe'ye' tz'e'ysa'n kywitze' tu'n q'ijal ex mixti' a' toj,

25ate'qe'ye' toj jun tx'otx' naku'j b'alunqe' kawil toj, nche tzanun ex nkub' kytzaqu'n kychi'; nche'x kych'yo'n xjal toju' kytx'otx', nb'je'l kyelq'a'n kyk'uwen ex kyq'inumal ex nim qya nche kyej kyimnitl kychmil kyu'n.

26Nkytxalpu'n pale toju' tx'otx' lu tnab'lju' nxnaq'tzb'ile' ex nche kukytxa'ju'n ti'xti' xjanqe' toj nwitze'; mixti' ch'exb'eb'l kyu'n kyxolju' xjan tuk'i'lu' txa'ju'n, ex min nxikyxnaq'tza'n kye junjuntl tu'n telkynik' teju' ẍtilun exju' tz'il. Min nche nkynima'n q'ij te ojlab'l wu'ne', ex min nchin kynima'ne'.

27Ikyqe' nejenel teju' tnam lu kse'nqe' xo'j nkub' kytzaqu'n kychi', b'incha'ntl kyten tu'n tqojli chik' ex tu'n kyb'yon xjal naq tu'n kyjaw q'inumax.

28Nkub' kyewa'n sanjelalju' ax, kse'n jun xjal nokttxuma'n ti'j jun tapi; inkyma'n qa nchin yoline' kye toj witzik', ex nche kyma'n ti'xti' mya ax. Inkyma'n qa nche yolin toj nb'iye' extzun b'ajxa' chin yolinna'we' kye.

29Naq nche q'ojinju' xjal toj tnam ex nche b'aj elq'an; nche kub' kyyaju'n prow exqe' ati in ojqelan kye; nche oktzaqpaj ex mya tnik'alilti'j nkyb'incha'n kyeju' najchaq xjal.

30Matxi' njoye' jun kyxolju' xjal lu, inwt tb'incha'n jun b'a'n teju' tnam ex inwt tkub'san nwitze' tu'n lalun kub' nxitu'ne', ex mixti'x nknet wu'ne'.

31Qu'mtzun makub' ntz'e'ysa'ne' kywitz b'a'nxi'x ex mache kub' nxitu'ne' tu'n tq'aq'il ntx'u'jile', tu'n kychjonteju' kyb'inchb'en. Ayine' Dyos Manb'aj nchin q'mante.