Dn 12 - Mam Ostuncalco Bible

Mankb'il tq'ijlalil 123

1Tojtzunju' kmuj lu tzul Myel, aju' anjl nim toklen nxq'uqin ex nkolon ti'ju' ttanama.

B'isb'ajilxju' q'ij lu,

jun kmuj kse'n b'ajx tzik'a'

atxi'xj tej ktzajlen anq'inju' tnam.

Ajtponju' tq'ijlalil lu,

kche kletilju' xjal toj ttanama

ju' tz'ib'a'n kb'i toju' u'j.

2Nimqe'ju' nche wtan toj muqb'il kche jawil k'isji:

junjun tu'n kyanq'in tejumajx,

atzun junjuntl tu'n tel kych'ixaw ex tu'n ttz'e'yset kwitz tejumajx.

3Aye'tzunju' ichan ati knab'l,

aye' ẍe yek'unte tb'eyil b'a'n kye txqantl,

kche qoptz'ajel kse'n twitz kya'j;

¡kche qoptz'ajel kse'nqe' che'w tejumajx!

4Atzunta Danyel, k'u'ma tkyaqilju' ti'xti' lu toj ewaj ex jpunku'ya u'j b'a'nxi'x, tzmaxi'j ajtponju' mankb'il tq'ijlalil. Nim xjal kche b'etel toj jun plaj tu'n kpon toj jun plajtl tu'n tch'iyju' kyojtzqib'l.

5Ayine' Danyel, xinka'yine' kab'e'tl ichan wa'lqe'toq, junjun toj junjun plaju' nin a'.

6Kxoltzunju' kab'e' ichan lu xitqani'nju' jun teju' tok t-xb'alun tz'umin ju' atitoq tib'aju' nin a': ¿Jtojtzun che japunju' ti'xti' lu te lab'te'nxi'x?

7Atzunju' ichan toktoq t-xb'alun tz'umin jaw ti'nju' tq'ob' twitz kya'j, ex xittziya'n toj tb'iju' Dyos itz', ex tma: Toju' oxe'tl ab'q'i tk'i' nik'jan, tzmaxi'j minti' nyajlanjtztl tipumal ttanam Qman Dyos, tzmaxi'tzun kjapumela' b'aj ktxa'nju' ti'xti' lu.

8Xinb'i'nju'ye' intoq tma'n extzun mixti' kane toj nwitze'. Xinqani'ntzuntze' te: Qman Dyos ¿titi' kb'ajel tb'ajlenxi' ja'lu?, nchije' te.

9Atzunte tzaj ttzaq'we'n weye': Ljonxa tb'eya Danyel, qu'n aju' ti'xti' lu ati tu'n tten toj ewaj tzmaxi'j ajtponju' tq'ijlalil.

10Nimte' che ik'el toju' yajb'il q'ma'ntl, tik'lenxi'tzunju' yajb'il kyi'j che ẍnu'lixel ex che okyel tnik'alkyi'j. Aye'tzunju' xjal b'inchal myab'a'n che b'inchalxi'xtl il, ex layx kane toj kwitz titi'ju' nb'aji, aye'tzunju' ichan ati knab'l kkaneb'il toj kwitz tkyaqil.

11Oxk'al kyajnaq lajoj (1,290) q'ij che ik'el tkub'lenxi' najsa'nju' chojb'il nkub' atl junjun q'ij ex tu'n tkub' q'o'nju' chojb'il taq'wixi'x toju' ja te k'u'lb'il te Qman Dyos, chij.

12Tzalajb'ilte' teju' xjal nayon ex q'uqli tk'u'j tzmaxi'j ajtjapun b'aju' oxk'al qaqnaq o'lajoj (1,335) q'ij.

13Atzunta Danyel, b'eta tojxi'x tu'me'l tzmaxi'j ajtjapun b'aj ju' tq'ijlalil ex tz'ojlana, qu'n kjawil we' jumajtla k'molteju' tu'me'l t-xel teya, chij.