Jer 27 - Mam Ostuncalco Bible

Kyiqb'il wakx te jun techlal

1Tzaj yolin Qman Dyos te Jeremiy toj tkyaji'n ab'q'i nkawin Sedekyiy, tk'wal Josiy, toj Juda,

2tma ikjalu: B'inchama jte' ky'jaj ex jun kyiqb'il wakx, q'onku'tzuntz ti'j tqula.

3Q'onxtzun jun tqaniltza kye nimaqkawil aj Edom, aj Moab', aj Amon, aj Tiro ex aj Sidon, kyi'ju' ajsanjelal nche ul xb'etzalte nimaqkawil Sedekyiy toj Jerusalen.

4Chaq'unxa tu'n t-xikyma'n kye kynimaqkawil qa ayine' Dyos Manb'aj nimwipumale' nchin q'mante kjalu:

5Kub' nb'incha'ne' tx'otx', exqe' xjal ex txkup ate' twitz, tuk'i'l nim wipumale', ex jaku' txinq'o'ne' ja wajb'ila'ye' tu'n txi' nq'o'ne'.

6Matxitzun kub' nq'o'ne' tkyaqilju' tx'otx' lu toj tq'ob' nmajine' Nab'ukodonosor, nimaqkawil toj B'ab'ilon, exqepe' tojk'ul txkup matxi' che kub' nq'o'ne' tjaq' tkawb'il.

7Kykyaqil nimaqtnam che kjel tjaq' tkawb'il, tjaq' kyawb'il tk'wal ex tchman, tzmax ajtpon kmoj tu'n tkyajtlu' ttanam tjaq' kykawb'il nimaqtnam ex nimaqkawil nim kyipumal.

8Qatzun ate' junjun nimaqtnam mo nimaqkawil min xkyaq' kawi'kyib' te Nab'ukodonosor, kb'el ntze'ysa'ne' kywitz tu'n q'oj, we'yaj ex tx'u'j yab'il, tzmax ajkykyaj kykyaqil tjaq' tkawb'il. Ayine' Dyos Manb'aj nchin yolin.

9Tu'ntzunju', lan che'x kyb'i'ne' sanjelal lu, ajnab'lil mo pjul witzik', exqe' ajk'a kyajb'il tu'n kymante titi' tzul ex ate'k q'malte kyeye' tu'n lalun kyaq'kyib'e' tjaq' tkawb'il nimaqkawil aj B'ab'ilon.

10Chajyolilte' nxikyma'n kyeye', ex o'kx kykanb'aye' che elel iq'i'ne' toju' tnam ex tu'n kyb'ajx nsputi'ne' ex tu'n kyb'aj kyime'.

11Atzunte' nintnam mataq'tib' tjaq' tkawb'il nimaqkawil aj B'ab'ilon, kxe'l nq'o'ne' anb'il te tu'n tkyejten tojxju' ttx'otx' tu'n tanq'in toj ex tu'n tawan toj. Ayine' Dyos Manb'aj nchin yolin, Chi Qman Dyos.

12Xinma'n weye' lu, ayine' Jeremiy, te Sedekyiy nimaqkawil toj Juda, expe' xinma'ne' te: Kyq'onkxkyib'e' tjaq' tkawb'ilu' nimaqkawil aj B'ab'ilon ex ttanam, che anq'iltzuntze'.

13¿Ma oktzun che kyimelkye' tuk'i'lju' ttanama toju' q'oj, tu'n we'yaj ex tx'u'j yab'il? Qu'n matxina' tmate Qman Dyos qa a kb'ajelju' kyi'j kykyaqil nimaqtnam qa min xkyaq'kyib' tjaq' tkawb'il nimaqkawil aj B'ab'ilon.

14Lan che'x kyb'i'nkye'ye' sanjelal na'j ate'k q'ol kynab'le' tu'n lalun kyaq'kyib'e' te nimaqkawil aj B'ab'ilon, qu'n chajyolilte' inkyma'n kyeye'.

15Intma'nte Qman Dyos qa mya chq'o'nqe' tu'n, naq kyak'a'n nche yolin toj tb'i Qman Dyos. Tu'ntzu'n che kxe'la' sputi'na'ye' tu'n Qman Dyos, ex che kyimele' kyuk'i'lxi' sanjelal nche q'mante lu kyeye'.

16Ex xinma'ne' kyeju' pale ex kye tkyaqilju' tnam ikjalu: A xtma Qman Dyos ja'lu: Lan che'x kyb'i'ne' sanjelal inkyma'n kyeye' qa lwiyxi'x che tzajel anjsa'ntlju' aq'unb'il toj tja Dyos eb'ajxq'i'n B'ab'ilon. Chajyolilte' lu inkyma'n kyeye'.

17¡Lan che'x kyb'i'ne'! Kyq'om kyib'e' tjaq' tkawb'il nimaqkawil aj B'ab'ilon, che anq'iltzuntze'. ¿Titz'okxb'ajti'j qa makyaju' nintnam lu naq txqan ttx'aq'a'n jatl?

18Qatzun t-sanjelal Dyos qexi'x, qa ayinxwe' nchin yolin, kyqaninxe' te Qman Dyos nimtipumal, tu'n lalun taj tu'n kyb'je'tzq'i'n aq'unb'il ate'x toj tja Dyos, toju' tja nimaqkawil toj Juda ex toj Jerusalen, tu'n lalun che b'ajxq'i'n B'ab'ilon, chi Dyos.

19-21Tej texq'i'n Jekoniy tk'wal Joakyin, nimaqkawil toj Juda, tu'n Nab'ukodonosor toj Jerusalen, ex xitiq'i'n B'ab'ilon kyuk'i'lxi' kykyaqilju' nimaq kyoklen toj Juda ex Jerusalen, min exitiq'i'n tqan tilb'ilal, exu' nin pil q'ank'uxb'il tkb'el a', exqe' tq'uqlil, exju' jni'tl aq'unb'il toj tja Dyos. Ape' ntma'n Qman Dyos nimtipumal kyi'ju' ti'xti' lu e'kyajten toj tja Dyos ex toj tja nimaqkawil toj Juda ex Jerusalen:

22Che kxelq'i'n B'ab'ilon, axtzuntzu' che kjela'ten, tzmaxi'j ajnmanteye' tu'n kytzaj wiq'i'n jumajtle' tzalu. Ayine' Dyos Manb'aj nchin yolin, chi Dyos, nchije' kye.