1Tb'ajlenxi'tzun jte' q'ij, ten jun tkarwaj Ab'salon te q'oj ex txqan tchej, ex e'kub' tnik'u'n jun tnej xjal kab'naqlajoj (50) kyb'aj te xq'uqilte.
2Intoq jaw we' b'a'n prim ex nkub'ten ttzi b'e, ttzi nintnam, ex intoq che'x ttxko'n xjal nche b'aj pon twitz nimaqkawil tu'n tb'inchante tnik'alilti'j kye toj jun q'oj matzaj kyxol, ex intoq xitqani'n kye alkye nintnam ẍetzaja'. Qama txikyma'nju' xjal qa kyxol junju' tnej tyajajil Israel ẍetzaja',
3intoq xitma'n kye: Tnik'alti'jte' tyola ntma'na, tu'me'lxi'x, extzun mix-a'lo'xte nkub' b'inteya toju' tkawb'il, chij kye.
4Expe' nxittz'aqtza'ntl: ¡Ayinwte' ajkawil toju' tnam lu, ajwitlo kyul kykyaqilju' ati q'oj kyxol exqa toj tu'me'l q'malte weye', inwtlo nb'incha'ne' tnik'alilti'j kye!, chij.
5Expena' qama pon lq'e jun xjal q'olb'elte, nxitq'o'n Ab'salon tq'ob' te, nnoktchle'n ex nnoktma'tzi'n.
6Iktoqtzun ntb'incha'nju' kyuk'i'l kykyaqil aj Israel nche pon twitzju' nimaqkawil tu'n tb'inchanjtz tnik'alilti'j kye, ikytzu'n e'kanb'eta' tu'n.
7Tb'ajlenxi'tzun kyaje' ab'q'i, xitma'n Ab'salon teju' nimaqkawil:
—Chin kub'sale' teya nimaqkawil, q'ontza anb'il tu'n nxi'ye' Eb'ron, tu'n tjapunju' xintziya'ne' te Qman Dyos.
8Qu'n tej antintoqe' Kyesur, toj Sirya, ayine' ajb'el teya nimaqkawil, xintziya'ne' te Qman Dyos qa chin k'ulule' te, qama tz'anjtoq wi'je' Jerusalen, chij.
9Xi'tzun ttzaq'we'nju' nimaqkawil te:
—Kutxi'ya ex lalun b'ajx tk'u'ja, chij te.
Xi'tzun Ab'salontz Eb'ron.
10Tojxtzunju' kmuj lu, e'xitchq'o'n jte' t-sanjelal kyxol kykyaqilju' tnej tyajajil Israel q'malte kye qa naq aj txi' kyb'i'nju' tq'ojq'ojel chun, tu'n kyyolinte qa matxi'toq tz'ok q'o'n Ab'salon te nimaqkawil toj Eb'ron.
11Expe' exi' ttxko'n lajnaq (200) xjal aj Jerusalen, mixti' b'i'n kyu'n titi'ju' in b'aji, chechilo qa b'a'nju' txokb'enkye.
12Expe' xitchq'o'n Ab'salon ttxokli jun q'ol tnab'l Dab'i, Aytopel tb'i, najlitoq toj Wilo, ninttanam, tu'n tten tuk'i'l ajtkub' tq'o'n chojb'il. Ikytzu'n, xi'toq tten kyipumal tej tmoje kyol ti'ju' kawb'il ex xi'toq kyok txqantl t-xjal Ab'salon.
Etz oq Dab'i toj Jerusalen13Pon jun sanjelal q'malte te Dab'i qa matxi'toq tz'ok kymujb'a'nkyib' aj Israel tuk'i'l Ab'salon.
14Tchaq'tzun Dab'i kye kykyaqil nejenel kye t-xjal toj Jerusalen.
—¡Qo'qe' oq ja'loxi'x, qu'n qatzun min lay b'ent qklonte qib' te Ab'salon! ¡Ojqelqe'xe', lwix qo'qe'ye', qu'n jaku' kub'qi'j tu'n, ex jaku' qokub' tb'yo'n qkyaqilx tu'n k'uẍtx'e'nb'il toju' nintnam! chij kye.
15Xi'tzun kytzaq'we'ntz te nimaqkawil:
—Qb'incha'qe' ktma'ya qeye' nimaqkawil, chechij.
16Ikytzu'n etza' nimaqkawil kyuk'i'l kykyaqilju' ntoq che kawin tuk'i'l, noq o'qe'kx lajoj tqya e'kyaj tq'o'n xq'uqilteju' ja te kawb'il.
17Tetzlenxi'tzu'n nimaqkawil kyuk'i'l kykyaqilju' eb'je'tz tuk'i'l, e'kyajwe' tk'etzju' mankb'il ja ttxa'n nintnam.
18E'kub'tenju' nejenel kye t-xjal ttx'u'k, aye'tzu'n seretey ex peletey ju' xq'uqilte nimaqkawil, exqe' junk'al lajnaq (600) jetey e'ik'lpe ti'j kytzajx toj nintnam Kat, intoq che ik'o'k twitz nk'u'mile kyten.
19Tojtzu'n kmuj lu xitma'n nimaqkawil te Itay, aj Kat:
—¿Tiqu'ntzun saja'tlta quk'i'le'? Masb'a'n kutanj ti'ja tu'n tkyajtena tuk'i'lju' ak'a'j nimaqkawil, naqpena' etzni xla'ja'nta, tena' junxi'tl nintnam.
20¿Se'n taq'wi tu'n txi' nma'ne' teya tu'n ttzaja quk'i'le'? Mipena' jun b'i'n we'wu'n ja chin pomela'ye', extzun tzmapena' tula ewi. Masb'a'n kutanj ti'ja ex k'lenqe'xju'ya twnaqila. ¡Awttzun Qman Dyos k'iwlanteya ex ten tuk'i'la kukxju'!, chij te.
21Atzunte Itay xittzaq'we'n te nimaqkawil:
—Lu Qman Dyos nka'yin ex twitzku'ya nimaqkawil, jaxjaku' matena'ya axtzuntzu' chin tenb'ela'we' ayine' ajb'el teya, b'a'ntzun toj chwinqlal mujqa toj kamik, chij.
22—Kuna' tzaja quk'i'le', chi Dab'i te.
Ikytzu'n xi' Itay tuk'i'l Dab'i, junx kyuk'i'l kykyaqilju' t-xjal Dab'i exqe' eb'ajxlpe ti'j.
23Kykyaqilju' xjal ntoq che oq' b'a'nxi'x. Eb'jik'x kykyaqil toju' a' Sedron; iky'xtzun nimaqkawiltz nejlqe' kykyaqilju' xjal twitz toju' tb'eyil chq'ajlaj.
24Ex ajun Sadok xi' kyuk'i'l kykyaqil aj Leb'i iq'ilte tkaxil tchaq'b'il Qman Dyos, ju' kyej kyq'o'n tk'etz Ab'yatar tzmaxi'j kyetz kykyaqilju' xjal toju' nintnam.
25Atzunte nimaqkawil xitma'n te Sadok:
—Iq'inx jumajtlju'ya kax te Dyos toju' nintnam, qu'n qama tzaj q'aq'an tk'u'j Qman Dyos, k'anjetzwe' wi'j tu'n ex k'okyel nka'yi'n jumajtle' kax exju' ja tkub'a'.
26Qatzun matzaj tma'n qa min tzalaj wi'je', toj tq'ob' ta'qine'; b'incham wi'je' aju' b'a'n toj twitz, chij.
27Ex xitma'ntl nimaqkawil te pale Sadok:
—Kutanj kyi'je' tuk'i'l Ab'yatar toju' nintnam kyuk'i'l kyk'wale' ex lalun che b'isune'. Aya tuk'i'l tk'wala Aymaas, ex Ab'yatar tuk'i'lu' Jonatan ju' tk'wal.
28Ayintzunwe', chin kjeltene' kyoju' plan toj chq'ajlaj, tzmax ajtpon kypakb'ale' weye', chij.
29Anjtzun kyiq'i'ntl Sadok tuk'i'l Ab'yatar ju' tkax Qman Dyos toj Jerusalen, ex axtzu' e'kyaja'ten.
30Jax Dab'i twitzju' witz Olib'o; mixtoqti' t-xajab' ex intoq oq' ex ktxu'nkxju' twi' te yek'b'il b'is.
31Tetzunj txi' q'ma'n te Dab'i qa ajun Aytopel matxi'toq moje tuk'i'l Ab'salon, kub'san Dab'i twitz Qman Dyos tu'n tkub' xitju' nik'u'nti'j tu'n Aytopel.
32Tej tjapun Dab'i twi' witz, ja noka' k'u'lb'il te Qman Dyos, etz Usay k'lulte, kyxol tnej kyyajajil arkyit, b'ajni tlaqu'n t-xb'alun ex nojnokx toj twi' tu'n tx'otx'.
33Xitma'n Dab'i te:
—Qama tzaja wuk'i'le', k'okyela te jun iqtz weye';
34qatzun matz'anjti'ja toj Jerusalen exqa matxitma'na' te Ab'salon: Nimaqkawil, chin ajb'elwe' teya kse'n in ajb'ene' tnejel te tmana, qa chija te, k'onila wuk'i'le' tu'n tkub' xitet t-xim Aytopel,
35ate'qe'kye' pale Sadok ex Ab'yatar atzu'. Q'manxa kukxju' kye tkyaqilju' matb'iya toju' ja te kawb'il.
36Ex ate'qe' kyk'wal atzu', Aye' Aymaas ex Jonatan, tkyaqiltzunju' nb'aj q'manxa kye, tu'ntzun ttzaj kyma'n weye', chi Dab'i.
37Pontzu'n Usay, ju' tamiw Dab'i, toj Jerusalen, tojku'xi'xju' kmoj tej tokx Ab'salon toj nintnam.
Who We AreWhat We EelieveWhat We Do
2025 by iamachristian.org,Inc All rights reserved.
