Os 7 - Mam Ostuncalco Bible

1Qa wajb'ile' tu'n nq'aninteye' ntaname':

nelyal kyil Eprayin ex aj Samarya taq'wixi'x.

Qu'n kykyaqilx nche b'aj chanyol;

ikqe' kse'n eleq' nche b'jo'kx elq'al tk'u'ja

ex nche oktzaqpaj elq'al kyi'j xjal toj b'e.

2Min nche ximan ti'j

qa na'mile wu'ne' tkyaqil kyb'inchb'aj taq'wix.

atzu'n ja'lo mache jpet tu'nxju' kyb'inchb'en myab'a'n.

3Nxi'x kytzalajsa'n nimaqkawil exqe' nejenel

tu'n kyb'inchb'aj myab'a'n ex kychajyolil.

4Kykyaqilx ajpajilqe';

ikyqe' kse'n chuj, naqa xk'ent

inxi'x k'ent ajxi'x tkub' jayun

b'ankxpun ntx'amset tq'otjel wab'j.

5Ajtok tq'ij nimaqkawil,

majxkub' yab'ti tu'n b'in kyu'n nejenel

¡ex junx nela' kyuk'i'lju' nche xmayin!

6K'u'n kyq'oj toj kyanmi

nche oklq'e tk'etzu' nimaqkawil naqx tu'n tb'o'lj kyu'n.

min nche wtan ajtb'aj qonik'an

qu'n inxi'x che ximan

se'n kb'o'ljela' kyu'n ajqsqix.

7Kykyaqilx ikyqe' kse'n jun chuj nk'ant

majx ẍeb'aju' kawil kyu'n.

Kykyaqilju' kynimaqkawil matxi' che b'aj kyu'n

ex mix-a'lo' jun xqanin o'nb'il weye', chi Dyos.

Matz'el tpa'ntib'u' tnam ti'ju' Tdyos

8Matxi' txit-smo'ntib' Eprayin kyuk'i'l txqantl tnam.

Ikyte Eprayin kse'n jun muqin

noq jun plaj tzq'aj.

9Matz'elq'in tipumal kyu'n najchaq xjal.

Ex min neltnik' ti'j,

¡expe' matxi' kub' saqax t-xya'mal twi'

ex min nel tnik' ti'j!

10Axju' kynimb'ilkyib' aj Israel xtziyan kyi'jx

Extzun min nanjtzkyi'j,

ex min nche jyon wi'je' ayine' Kydyos.

11Ikyte Eprayin kse'n jun xu'ch

noq nttakla'ntib' ex min nximan:

nqanin o'nb'il te Ejipt

ex lwiy nxi'tl qanil tnab'l te Asirya.

12Ajtzun kxi' na'tz,

kxe'l nxone' pa te xpatxab' kyib'aj;

kche b'eltz'aqtzuntz wu'ne' kse'nqe' pich' twitz kya'j,

kche tzyetel wu'ne' tu'n tpaju' kyb'inchb'en taq'wix.

13¡Qab'anx kywitz tu'n sel kypa'n kyib' wi'je'!

Kb'elkyi'j tu'n xitb'ilkye,

qu'n majawkyi'nkyib' wi'je'.

Wajb'ilwe' tu'n kyklet wu'ne'

aye'tzunkye nche chanyol wi'je'.

14B'a'n qama che ẍch'in toj kuẍb'il,

min nche kub'san nwitze' tu'n tkyaqil kyanmi.

Maskye nkyk'ixb'sa'n kyib' ajkyqanin kywa triy ex kyk'wa' b'in;

¡matxi'na' jawkyi'nkyib' wi'je'!

15Oje che b'ajx nxnaq'tza'ne'

ex matxi'nq'o'ne' kyipumal,

aye'tzunkye mab'aj kyxima'n ti'xti' taq'wix wi'je'.

16Mache k'ulun jumajtl kye witzleb';

ikqe' kse'n jun smaj txalchi,

min pon yalju' tal janxa' nik'una'.

Tu'nju' kyol taq'wix wi'je'

kche b'ajelju' kynejel tu'n k'uẍtx'e'nb'il,

ex k'elel kych'ixaw toj Ejipt.