Sal 68 - Mam Ostuncalco Bible

Nnche kanb'an aj Israel

1Ajtaq'wi Dyos q'ojil,

inche'x slamju' tajq'oj;

aye'ju' ntx'a'lti'j kyk'u'j ti'j inche kub' oq twitz;

2inche kub'naj kse'n sib' toj kyq'iq',

inche kub' niwj kse'n ser toj q'aq';

¡tzpetni qe'kye' xjal b'inchal myab'a'n twitz Dyos!

3Aye'tzu'n b'a'n xjal nche tzalaj;

ati nak'b'il kyetwitz Dyos,

¡inche xlik'pun tu'n kytzalajb'il!

4Che b'itzan qe'kye' te Dyos,

kyb'itzanxe' b'itz toj tb'i;

kyajwalinktzju'ye' ati tib'aj muj.

¡Che tzalajxe' ti'j Qman Dyos!

¡Che tzalajxe' twitz!

5Ate Dyos najli toju' tja xjan,

Manb'aj kye meb'a

ex kolol kyi'ju' qya kyimni kychmil;

6Intq'o'nte Dyos najb'il teju' xjal mixti' najb'il te,

inche ttzaqpi'nju' jpu'nqe' ex intq'o'n kytzalajb'il;

aye'tzu'n nche jaw meltz'uj kche najal toj tx'otx' min tq'o'n tawal.

7Nman Dyos, tej nejlitoqa kywitzju' ttanama

intoq b'eta kyuk'i'l toj chq'ajlaj,

8jaw lu'lunju' tx'otx',

tzaj chitj jb'al twitz kya'j,

exju' witz Sinayi jawlu'lun twitzju' Qman Dyos,

janche k'uluna' aj Israel.

9Nman Dyos, nim jb'al tzaj tq'o'na

matxitoq kub' b'aju' ttanama, ex tzaj tq'o'na tipumal.

10Atzu' ekyeja' najana' ttanama na'tz

atzunta Nman Dyos, noqx tu'n tk'u'jlalila,

xitq'o'na aju' nnojqelan kyeju' prow.

11Tzaj tq'o'n Qman Dyos jun tqanil;

nim qya intoq che pakb'ante:

12¡Ljo'n kyb'ajx oqju' nimaqkawil kyuk'i'lju' kyxjal te q'oj! Chechij.

Aye'tzu'n qya eb'jo'kx toj kyja

b'aj kysipa'n ti'xti' b'je'l kyiq'i'n kyi'ju' ajq'oj kyxolilex,

13aye'tzunkye' e'kyajtene' kyxol ch'laj,

¡kse'n kyxik' paloms ktxu'n kyi'j tu'n saqpwaq!

¡Exju' kytzmal ktxu'n kyi'j tu'n q'anpwaq tb'anil!

14Tetzu'n kyb'aj oqju' nimaqkawil tu'n Dyos nimtipumal,

kub' saqche'w tib'aju' witz Salmon.

15¡Nim kyoklenju' witz B'asan

ex nimaq kywe'!

16Aye'ye' txqantl tnam,

¿titiqu'n ntx'a'lti'j kyk'u'je' ajt-xikyka'yinju'ye' witz

ja oje tmaya' Dyos tu'n tnajan?

¡Ate Qman Dyos, knajal atzu' tejumajx!

17Ku'tz Qman Dyos twi' witz Sinayi ex ul toju' tja xjan;

kyoju' tkarwaj nimxi'xtoq txqan kyb'aj.

18Nman Dyos, jawxa tzmax twi' witz ex eb'ajx tiq'i'nju'ya pres;

etk'ama chojb'il te tnam kyu'n xjal

expe' makyaq'kyib'ju' njaw kyiq'i'n kyib' ti'ja tuk'i'la, Nman Dyos.

19¡Nimanjtzxwit tb'i Qman Dyos ex klolqe,

ju' nqo toni'n atl junjun q'ij toj tkyaqilju' ti'xti'!

20Ate Qman Dyos nkolon

ex inqo klet tu'n teju' kamik.

21Ate Dyos kb'el pa'nte kywi' tajq'oj,

kywi'ju' mixti'x nkyaj kytzaqpi'nju' b'inchaj il.

22Oje tma Qman Dyos:

K'eletz wiq'i'ntla toju' tx'otx' B'asan;

ex toju' ninnjab' nim t-xe,

23tu'n tb'aj twab'ena

kychk'elju' tajq'oja

ex tu'n txi' kyk'wa'nju' ttx'yana. Chi Dyos.

24Nman Dyos, nnimaqkawile',

q'ancha'lqe' xjal txoli'n kyel toju' tjaya xjan

inche ik'san ninb'il teya.

25Nejliqe'ju' aj b'itzal

lepchqe'xtlju' aj chinb'al,

kyxoltzun ta'qe'ju qpoj

inche q'ajtzan tanb'orin.

26¡Kynimanktze' Qman Dyos kykyaqile'!

¡Kyb'uyim kyib'e' aj Israel ex kyajwali'nktze'!

27Nejli B'enjamin itz'inb'aj kywitz,

kyuk'i'l b'a'npun nejenel kye aj Juda,

aj Sab'ulon ex aj Neptali.

28Nman Dyos, yek'untza tipumala;

¡b'incham jumajtla t-xtalb'ila tb'inchaya qeye'!

29Tzmax toju' tjaya xjan, toj Jerusalen,

janpona' kyiq'i'n nimaqkawil oyaj teya,

30tzak'unqe'xju'ya aj Ejipt, naku'j txkupqe' toj ajlaj q'ajun,

aye' jun k'loj tman wakx tx'u'jqe' exqe' qpoj tman wakx

nkynima'kyib' tu'n kyq'inumal ex nche kub'kyme'sa'n tnam;

¡sputinqe'xju'ya xjal kyajb'il tu'n kyq'ojin!

31Toj Ejipt kche tzajela' sanjelj;

kjawil kymujb'a'n aj Etyopiy kyq'ob' twitz Dyos.

32¡Che b'itzan qe'ye' te Dyos kykyaqile' nche kawine' twitz tx'otx',

kyb'itzanxe' b'itz te Qman Dyos,

33teju' nb'et toj kya'j,

toju' kya'j tejumajx!

Kyb'intze' se'ntaq'wi nq'ajtiju' tq'ojq'ojel twi',

aju' tq'ojq'ojel twi' nimtipumal.

34Tz'elx kynik'e' ti'ju' tipumal Dyos:

aju' ati toklen tib'aj Israel,

npon kanun tipumal tzmax toj ẍkul kya'j.

35Tb'anilxi'xte Dyos toju' tja xjan;

intzaj tq'o'n Qman Dyos toklen ex tipumalju' ttanam.

¡Nimanjtzxwitju' Dyos! chiju' b'itzal.