Ez 13 - Mam Ostuncalco Bible

Kb'el ttz'e'ysa'n Qman Dyos kywitzju' sanjelal chalyolqe'

1Tzaj yolin Qman Dyos weye', ex tma:

2Yolin toj nb'iye' kyi'ju' sanjelal kyxol aj Israel, aye' sanjelal lu kyolxkye nkyma'n, q'manxa kye: Kyb'ime' tyol Qman Dyos:

3¡Layqe'xwitju' sanjelal mixti' kynab'l, lepchiqe'x ti'jxju' kynab'l ex mixti'xi' matxi' tzaj yek'u'n kye axwit!

4Ikyqe' t-sanjela, Israel, kse'nqe' chuẍ najliqe' toj ttx'anqa'n ja.

5Mixti'xi'te kyb'incha tu'n kyktelju' aj Israel, tu'nwtlo miche yajta' toj q'oj ajtulju' tq'ijlalil tu'n Qman Dyos.

6Mya ax qe' nche tzaj yek'u'n kye exu' tqanil nkyma'n noq chajyolilqe'. Inkyma'n qa ayine' chq'olkye, extzun b'ajx che'xa' ncheq'o'nawe', ¡intzun che ayon tu'n tjapunju' kyol!

7¡Chajyolil qekye' naku'j kywitzik'! ¡mya ax qe'ju' tqanil nkyma'n! Inkyma'n qa ayine' ẍintzaj chq'onkye, mixtzunti'we' nxinma'n kye.

8Qu'mtzun nxinma'ne' kyeye', ayine' Dyos. Ina' kyma'ne' ti'xti' mya ax ex chajyoilil qe' kywitzik'e', ajq'oj qine' kyi'je'. Ayine' Dyos Manb'aj nchin q'mante.

9K'aq'pomel nq'ob'e' tu'n ttz'e'yset kywitzju' sanjelal ati kywitzik' mya ax qe' ex chajyolilju' tpakb'alil kyu'n. Lay che ten toju' b'uyjtib'il teju' ntaname' Israel; lay ku'x kyb'i toju' tu'jil kyb'i aj Israel, ex lay che okx toju' kytx'otx' aj Israel. K'eleltzun kynik'tze' qa ayine' Dyos Manb'aj.

10Iku', mache kub' kysb'u'n ntaname', inkyma'n qa tkyaqil b'a'nile tel, extzun axxi'x mikxa'ju'. Ikyqe'ju' kse'n jun xjal njaw tb'incha'n jun tapi myab'a'n b'inchb'ente ex nok txuma'n ti'j.

11Q'manxa kyeju' nche txuman ti'j tapi, qa tzul tz'aqju' tapi. Tzul nin jb'al, ex tzul saqb'aqun naku'j ab'j, ex tzul kyq'iq'jb'al njub'in,

12ex kb'el tz'aqju' tapi. Kxel qani'ntzuntz kye: ¿Ti'tzu'n xb'aj ti'ju' txun sok kyq'o'ne' ti'ju' tapi? chiku'

13Qu'mtzun nxinma'ne', ayine', Dyos Manb'aj: Tzul nq'o'ne' jun kyq'iq' jb'al toj ntx'u'jile', tzul nq'o'ne' txqan jb'al tuk'i'l saqb'aqun naku'j ab'jqe', tu'n tb'aj xitj tkyaqil tu'n nq'oje.

14Ex kb'el nxi'tu'ne' tapi sok kytxuma'ne' ti'j; kb'el nxone' twitz tx'otx', ex kjel q'ancha'lixju' tq'uqb'il. Iku', kb'el tz'aqju' tapi twitz tx'otx', ex che kyimele' kyu'n ttx'anqa'n loq' ajtkub' tilj. K'eleltzun kynik'tze' qa ayine' Dyos Manb'aj.

15Tzulnb'ajsa'ne' ntx'u'jile' ti'ju' tapi lu, ex kyi'ju' ẍe oktxumanteti'j, aye'tzu'n xjal kkyma': Majx xkub'ajte' tapi ex majx ẍeb'aju' e'oktxumanteti'j,

16mya axte' kywitzik'ju' kysanjel aj Israel, ax qe' tqanil kyu'n te Jerusalen qa b'a'nile tel tkyaqil, extzun axxi'x mikxa'ju', chechiku'. Ayine' Dyos Manb'aj nchin q'mante.

Kttz'e'ysa' Qman Dyos kywitzju' qya sanjelalqe'

17Ichan, q'manxa ja'lo kyeju' qya toj ttanama nche yolin toj nb'iye' tu'nx kynab'l,

18q'manxa kye kjalu:

A ntma'n Dyos ja'lu: ¡Layqe'xwite' nche b'ete' tzyulkye xjal; ex nkub' kytz'so'ne patzb'il naku'j ati toklen tu'ntzun kykyaqil xjal che okq'onte ti'j kyq'ob' kse'n echb'il q'ij, ex nche kyb'incha'ne' xb'alun toj wi'yj tu'ntzun kykyaqil xjal che jax q'onte toj kywi'! ¿Ma toj kyq'ob'e' ta' kychwinqlal ntaname' ex kamik kyi'j, kse'nx kyajb'ile'?

19Inel kyiq'i'ne' nch'ixawe' kywitzju' ntaname' naq tu'n junjun txab' Seb'ad ex tu'n junjun piẍ wab'j; nche kub' kyb'yo'ne' xjal mixti' tu'n kykyim; ex min nche kub' kyb'yo'ne' xjal ati tu'n tkyim, ikytzu'n nche kub'kysb'u'ne' ntaname', inxikyb'i'nju' chajyolil.

20Qu'mtzun inma'ne', ayine' Dyos Manb'aj, kjalu: Machin oke' ajq'oj kyi'ju' patzb'il naku'j ati kyoklen nkyb'incha'ne', nche ajb'en kyu'ne' tzuyb'il xjal kse'n pich' toj xpatxab'. Kche ntzaqpi'weye' xjal lu toj kyq'ob'e', ex che kjel nq'o'ne' tu'n kylipan tzaqpi'nqe';

21kntzaqpi'ye' ntaname' toj kyq'ob'e' ex teju' xb'alun njax kyq'o'ne' toj kywi', ex lay che tzyetl kyu'ne'. K'eleltzun kynik'tze' qa ayine' Dyos Manb'aj.

22Mache jaw b'isunju' b'a'n kyel tu'n kychajyolile', aju' myatoq wajb'ile' tu'n tb'inchet, xi'pe' ẍe'xa kyoni'ntle' b'inchal myab'a'n tu'n txi' kyljo'n kychwinqlal myab'a'n, tu'n lalun txinq'o'ntl anb'ile' tu'n kyanq'in.

23Qu'mtzun lay che witzk'antle' te sb'ub'l ex lay che pakb'antle' ti'ju' tqanil naq chajyolil. Knkla'we' ntanam toj kyq'ob'e', k'eleltzun kynik'tze' qa ayine' Dyos Manb'aj, chiku'ya, chi Dyos.