Rt 4 - Mam Ostuncalco Bible

Mje B'oos tuk'i'l Rut

1Yajxi'tzuntl xi' B'oos ex kub' qe ttziju' tnam, qu'n atoqtzu' nkyb'u'yi'na' kyib'ju' xjal. Tojtzunju' kmuj lu o'kx tik'u' ttwitze'l Elimelek ju' atix ch'i'ntl toklen tuk'i'l, ju' ojetoq tma B'oos.

—Qlanpe'ya ex qeku'ya tza'lu, chi B'oos te.

Atzunju' twitze'l tzaj lq'e ex kub' qe tk'etz.

2Ex eb'aj tzaj ttxko'n B'oos lajoj tijwnaq toju' tnam, ex ikx xitma'n kye tu'n kykub' qe tuk'i'l. Tetzunj kyb'ajkub' qe,

3xitma'n B'oos teju' twitze'l:

—Matxi' kub't-xima'nte Noemi ju' anjtzni toj Moab', tu'n tik' tk'a'yi'n ttx'otx'ju' qtzan qwitze'l Elimelek.

4Wajb'ile' tu'n tb'inteya, qaj ati tb'is tk'u'ja tu'n tlq'onteya, ex b'a'n tb'inchanteya ja'lo, kywitzju' ate'qe' tza'lu ex kywitzju' tijwnaq toj tnam. Ana'ya tixch'i'ntl toklena tuk'i'l Elimelek, qu'mtzun aya ati toklena tu'n tlq'onteju'ya ttx'otx'. Qatzun min tajb'ila tu'n tlq'onteya, b'a'n tu'n tmanteya ja'lo, qu'n ti'jxi'tla ayine' ati woklene' ti'j, chij te.

Xitzun ttzaq'we'n twitze'l te:

—Knlq'a'we', chij.

5Atzunte B'oos xitma'nxi'xju' tu'me'l:

—Ximanku'na'ya b'a'nxi'x, qu'n qama tloq'ju'ya ttx'otx' Noemi, ilti'j tu'n tmjeya tuk'i'l Rut, aju' qya aj moab' kyimni tchmil, tu'ntzun tkyaju' tx'otx' tojx tb'iju' qtzan tajaw, chij te.

6Tetzunj tb'inteju' twitze'l ikju', xittzaq'we'n:

—Qana' qa iku', lay nloq'we', qu'n jaku' kyaju' wetzb'ile' te juntl. Qa tajb'ila tu'n tlq'onteya, lq'oma; kxe'l nq'o'nwe' oklenj teya tu'n tlq'onteya, chij.

7Intoq b'inchet jun tu'me'l kyxol aj Israel toju' tq'ijlalil lu: Qama txitq'o'n jun xjal oklenj te juntl twitze'l, mujqa ajtkyaj b'entti'j jun kyyol ti'j jun ti'xti', aju' matxiq'onte mujqa matxik'ayinte oklenj, nneltiq'i'n jun t-xajab' ex nxitq'o'n teju' juntl. Kse'nxtzu'n tu'me'l lu,

8eltiq'i'n twitze'l B'oos jun t-xajab', xitq'o'ntzuntz te B'oos ex xitma'n te:

—Lq'omna'ya, chij.

9Atzunte B'oos xitma'n kyeju' tijwnaq ex kyeju' ate'toq atzu':

—Kywitzku'ye' kykyaqile' ja'lo knlq'a'ye' kytx'otx' Elimelek, Kyilyon ex Malon te Noemi.

10Ex kywitzku'ye' ja'lo knk'ma'ye' Rut aj Moab' kyimni tchmil te nxu'jile', tu'ntzun lalun kub'naj tb'i Malon, ju' qtzan tchmil ti'ju' tx'otx'. Laytzun kub'naj tb'i Malontz kyxolju' twitze'l ex tu'n lalun tzik'tna'l toju' tnam lu. Aye'ye' tziyal ti'j ja'lo, chij kye.

11Xi'tzun kytzaq'we'nju' tijwnaq exqe' ate'toq:

—Qwitzku'tzune' ja'lo. ¡Awt Qman Dyos b'inchante tuk'i'lju' qya lu kpomel tjaya, kse'nte Rakyel ex Lea, qu'n kyi'ju' qya lu tzajna' qyajajil ayo' aj Israelqo'! Atzunta tz'okxwita jun ichan nim toklen toj Eprata, jun ichan b'a'n tyolinjtz toj B'elen.

12Tzajxwit q'o'n txqan tk'wala tu'n Qman Dyos tuk'i'lju' qya lu. Che chmet-xwitju' tyajajila kse'nqe' tk'wal Pares, ju' tal Tamar tuk'i'l Juda, chechij te.

13Iktzu'n mjeya' B'oos tuk'i'l Rut. Ex kub'kẍe tuk'i'l, ex tb'incha Qman Dyos tu'n tok ch'onwi', tu'n titz'ji jun tal.

14Aye'tzunju' qya intoq kyma'n te Noemi:

—¡Ajwalinjtzxwitju' Qman Dyos, qu'n matxi' tzaj tq'o'n jun tchmana ka'yilteya! ¡Tz'okxwitju' tal tchmana lu nim toklen toj tkyaqil Israel!

15Ate kq'uqb'alte tk'u'ja ex kk'a'chalteya ajttijina, qu'n talna' tlib'a, aju' tlib'a k'u'jla'nxi'xa tu'n, ex majxpe' b'a'n xjalxi'x teya kyekywitz wuq tala, chechij te.

16Tzajtzun tchle'n Noemi tal ne'ẍ ex xitka'yi'n.

17Tetzunj kyka'yinteju' qya najlqe' nqayin tk'etz, intoq kyma'n:

—¡Matxi' tz'itz'ji junte Noemi tal!, chechij.

Ex okkyq'o'n tb'i, Ob'ed. Atzun tman Jeseju' ex tchman Dab'i.

Ojtxi' tyajilb'en Dab'i

18Aye' tyajajil Pares ja'lu: ate Pares tman Esron,

19atzu'n Esron tman Ram, atzu'n Ram tman Aminadab',

20atzu'n Aminadab' tman Naason, atzu'n Naason tman Salomon,

21atzu'n Salomon tman B'oos, atzu'n B'oos tman Ob'ed,

22atzu'n Ob'ed tman Jese, atzu'n Jese tman Dab'i.