Is 6 - Mam Ostuncalco Bible

Txokli Isayiy

1Wile' Qman Dyos toju' ab'q'i tkyim nimaqkawil Osiy, q'uqlokx tib'aj jun tq'uqb'il nimin twe'; noj toju' ja te k'u'lb'il tu'n ttxa'n ttxo'w.

2Tokx jte' anjl tib'aj naku'j q'aq'. Qaqchaq kyxik' teyile junjun. Kab'e' kyxik' jpulte kywitz, ex kab'e'tl jpulte jni'tl kyxmilal, kyu'ntzu'n kab'e'tl kyxik' nche lipana'.

3Ex ntoq kyma'n kyxolx:

Xjan, Xjan, Xjante' Qman Dyos nimtipumal;

nojni tkyaqil twitz tx'otx' tu'n tajwalila, chechij.

4Tej tjaw tq'ojq'ojel kywi', majx b'aj lu'lun tjpel tja Qman Dyos ex kub' noj tu'n txqan sib'.

5Ex kub' nxima'ne' ¡Qab'anx nwitze', chin kyimilwe'!, mana' wile' Nimaqkawil, aju' Qman Dyos nimtipumal, tu'nku' nwitze'; xjal qina'we' mixyab'a'n nb'je'tz toj ntziye' twitz Dyos ex ikyqe'x tnam xjalju' janajlqine', nchije'.

6Tojtzu'n kmuj lu tzaj lipan junju' anjl naku'j q'aq' nk'etze'. Q'i'n jun ttxalq'aq' tu'n tzyu'n kyu'n txqan tx'ab'l, jawtiq'i'n tib'aju' q'olb'eb'l,

7oktq'o'n ttxalq'aq' ti'j ntziye', tmatzuntz:

Ka'yintza, matz'okju' ttxalq'aq' lu ti'j ttziya.

matxi' tz'elju' tila,

matxi' b'ajkub'najset tila, chij.

8Xi'tzun nb'i'ne' toj twi' Qman Dyos, intoqtma'n:

¿Alkye kxe'l nchq'o'ne'?

¿Altzunkye qsanjelal?, chij.

Ayintzunwe' xintzaq'we'ne':

Luqine' lu, chin tchq'onxa, nchije'.

9Tzajtzun tma'n weye':

Kutxi'ya ex q'manxa teju' tnam kjalu:

maskye makyb'iye', layx kane toj kywitze';

maskye makyile', layx tz'el kynik'e' ti'j, chiku'ya.

10Q'imila kynab'lju' tnam lu;

jpuma kyẍkyin ex jpunka kywitz

tu'ntzun lalun kyka'yi ex tu'n lalun kyb'i,

ex tu'n lalun kane toj kywitz,

tu'ntzun lalun che b'ju'ltl nk'etze'

ex lay che nq'anaye', chi Dyos.

11Xitzun nqani'ne' te:

¿Jtojxixtzun, taye? nchije'.

Atzunte tzaj tma'n weye:

tzmaxi'j ajkyb'aj xitju' nimaqtnam

ex mix-a'lo' juntl najli kyoj;

tzmaxi' mixti'tl xjal najli kyoju' ja.

ex matxitoq kub' chq'ajlajixju' kytx'otx',

12matxitoq che b'je'x q'i'n xjal ti'jxi' tx'otx' tu'n Qman Dyos,

ex matxitoq kyaju' tx'otx' mixti'tl najalte.

13Qatzun makyajten tlajoji'n tnejtlju' tnam,

ikx che b'ajel xitet,

kse'n ajtkub' tx'emit jun k'ol mujqa b'ansi

o'kxtl tkuchmal kjelten.

(ti'jtzu'n tkuchmal lu k'eletza jun t-xul xjan), chi Dyos.