1 Cr 27 - Mam Ostuncalco Bible

Nuk'b'il kye tnam ex kye xjal te q'oj toj tkawb'il Dab'i

1Atl junjun xjaw tojile junjun ab'q'i, ntoq che ajb'en junjun aq'pun aj Israel te xjal te q'oj, te oxmutx' (24,000) chaq kyb'aj. Ate'toq nejenel kye k'loj xjal kywitze'l kyib' kyxol, e'nejenel kye xjal te q'oj, exqe' aq'unal nim kyoklen nche ajb'en te nimaqkawil. Intoq che ajb'en tjaq' kychaq'b'ilju' xjal lu:

2Atoq Jasob'eam tk'wal Sab'dyel nejenel kyeju' tnejel aq'pun, xq'uqil toju' tnejel xjaw,

3tyajajil Pares ex chaq'ul kye kykyaqilju' nejenel kyeju' tnej xjal te q'oj intoq che ajb'en toju' tnejel xjaw.

4Atzu'n Doday, aj Aoyit, nejenel kyeju' juntl aq'pun xq'uqil toj tkab' xjaw.

5Atzu'n B'enayiy tk'wal Joyada kynejel pale, nejenel kye juntl aq'pun xq'uqil toj toxi'n xjaw,

6ajuntoq kyxolju' junaq lajoj min nche xob' exu' nejenel kye. Atzu'n Amisab'ad ju' tk'wal intoq chaq'un kyeju' aq'pun lu.

7Juntl aq'pun xq'uqil toj tkyaji'n xjaw: a Asael titz'in Joab', nejenel kye. Yajxi'tzuntl atl Seb'adiy ju' tk'wal kyej te t-xel.

8Juntl aq'pun xq'uqil toj tjwe'yi'n xjaw: atoq Samut, aj Isray, nejenel kye.

9Juntl aq'pun xq'uqil toj tqaqi'n xjaw: atoq Ira, tk'wal Ikyes, aj Tekoa, nejenel kye.

10Juntl aq'pun xq'uqil toj twuqi'n xjaw: atoq Eles, aj Paltita, tyajajil Eprayin, nejenel kye.

11Juntl aq'pun xq'uqil toj twajxaqi'n xjaw: atoq Sib'ekay, aj Usa, tyjajil Sera, nejenel kye.

12Juntl aq'pun xq'uqil toj tb'eljuji'n xjaw: atoq Eb'yeser, aj Anatot, tyajajil B'enjamin, nejenel kye.

13Juntl aq'pun xq'uqil toj tlajoji'n xjaw: atoq Maaray, aj Netopa, tyajajil Sera, nejenel kye.

14Juntl aq'pun xq'uqil toj tjunlajoji'n xjaw: atoq B'enayiy, aj Piraton, tyajajil Eprayin, nejenel kye.

15Juntl aq'pun xq'uqil toj tkab'lajoji'n (12) xjaw: atoq Elday, aj Netopa, tyajajil Otonyel, nejenel kye.

16Aye' nejenel ja'lu kye junjun tnej tyajajil Israel: a Elyeser, tk'wal Sikri, nejenel kye tyajajil Rub'en; atzu'n Sepatiy, tk'wal Maaka, nejenel kye tyajajil Simeon;

17atzu'n Asab'iy, tk'wal Kyemwel, nejenel kye tyajajil Leb'i; atzu'n Sadok nejenel kye tyajajil Aaron;

18atzu'n kye tyajajil Juda, a Elyu, jun titz'in Dab'i; atzu'n Omri tk'wal Mikael, nejenel kye tyajajil Isakar;

19atzu'n Ismayiy, tk'wal Ab'diy, nejenel kye tyajajil Sab'ulon; atzu'n Jerimot, tk'wal Asryel, nejenel kye tyajajil Neptali;

20atzu'n Osey, tk'wal Asariy, nejenel kye tyajajil Eprayin; atzu'n Joel, tk'wal Pedayiy, nejenel kye nik'jan tyajajil Manases;

21atzu'n Ido, tk'wal Sakariy, nejenel kyeju' nik'jantl tyajajilju' ate'toq toj Kalaad; atzu'n Jaasyel, tk'wal Ab'ner, nejenel kye tyajajil B'enjamin;

22atzu'n Asarel, tk'wal Jeroam, nejenel kye tyajajil Dan. Aye'tzun nejenelju' kyeju' junjun tnej tyajajil Israel.

23Min jawtiq'i'n Dab'i kyajlalju' na'mxtoq kyjapun toj winqi'n kyab'q'i, qu'n ojetoq tzaj ttziya'n Qman Dyos qatoq che chmetilxi'xju' aj Israel tu'n kse'n kyajlal che'w twitz kya'j.

24Aq'wi Joab' iq'iloktzte kyajlal, ex mixti' ponb'aj tu'n, qu'n tu'n tpaj ja'lu tzaj jun xitb'il kyib'aj aj Israel. Qu'mtzun min tz'ib'a'n toju' tu'jil tqanil ti'ju' nimaqkawil Dab'i.

25Atoq Asmab'et, tk'wal Adyel, k'u'l pwaq toj tja nimaqkawil, aye'tzu'n k'ub'l ate'toq toj kojb'il, kyoj nimaqtnam ex kyoj tnam, ex kyoju' nqach, toj tq'ob'toq Jonatan, tk'wal Osiy ta'qe'.

26Atzu'n Esri, tk'wal Kyelub', nejenel kyeju' aq'unal ti'j awal.

27Atzu'n Simi, aj Ramat, nejenel kyeju' awal ub'a, atzu'n Sab'di, aj Sepam, b'uyilte b'in kyoju' k'ub'lkye.

28Atzu'n B'aal-anan, aj Weder, nejenel kyi'ju' tqan olib'o ex tqan iw nche tzaj ch'iy, ju' atitoq toju' plan tx'otx'.

29Atzu'n Sitray, aj Saron, nejenel kyi'ju' alu'mj intoq che k'ik'lenjtz toj Saron, atzu'n Sapat, tk'wal Adlay, nejenel kyi'ju' alu'mj intoq che k'ik'lenjtz kyoju' b'ya'.

30Atzu'n Ob'il, tyajajil Ismael, nejeneltoq kyi'ju' kamey; atzu'n Jeediy, aj Meronot, nejenel kyi'j ttxu b'ur;

31atzu'n kyeju' rit, atoq Jasis, tyajajil Awar. Kykyaqil ja'lu nejenelqe' ex nuk'ul kyi'ju' ati te nimaqkawil Dab'i.

32A Jonatan, ttiy Dab'i, q'ol nab'l, atixi'x tnab'l ex xnaq'tza'n, atzu'n Jeyel, tk'wal Akmoni, majxtoq ati kyuk'i'lju' tk'wa' nimaqkawil.

33Ex ikx Aytopel, q'ol nab'ltoq te nimaqkawil, atzu'n Usay, aj Arkyit, majxtoq q'uqli tk'u'ju' nimaqkawil ti'j.

34Aye' Joyada, tk'wal B'enayiy, ex Ab'yatar, e'kyaj te t-xel Aytopel. Atzu'n Joab' nejenel kye t-xjal nimaqkawil te q'oj.