Sal 55 - Mam Ostuncalco Bible

Tna'j Dyos jun xjal ljo'n toj tq'ij

1Nman Dyos, b'intzju'ya nna'j Dyose',

lalun txi'tewa'n twitza ajnkub'sane' teya.

2-3Chin tb'intza ex chin ttzaq'wetza;

nchin kub'sane' teya toju' yajb'ilweye'

Nchin lu'lune' noqx tu'n tq'ojq'ojel twi'ju' wajq'oje

ex tu'n nche ẍch'inju' b'inchal myab'a'n.

Matxi' tz'ok nb'ise' kyu'n;

nche oktzaqpaj wi'je' tuk'i'l kytx'u'jil.

4Int'uẍjne wanmiye',

ex matxi' tz'oktenju' tchiylal kamik wi'je'.

5Matxi' tz'ok jun tchiylal wi'je' xob'ajilxi'x;

¡nchin lu'lune' tu'n xob'il!

6Ex a inma'ne':

Noqwit ikj ate' nxik'e' kse'nte paloms;

jaku'wtlo chinx lipane' tu'n wojlane'.

7Jaku' chinx lipane' najchaq,

jaku' chin kyej tentzuntze' najal toj chq'ajlaj.

8Jaku' ja'lo chinxe' ewal

teju' tipumal kyq'iq' ex q'ankyaq. Nchije'.

9Xitunqe'ku'ya Nman Dyos, chuksanku'ya kyyol;

qu'n o'kx q'oj ex ik'b'il nnok nka'yine',

10inkytxoli'nkyib' ti'ju' nintnam q'ijtl ex qonik'an

Ati il ex ik'b'il toju' tnam;

ati sb'ub'l ex taq'wixil toj;

11nojniqe' t-xk'ichb'e tu'n taq'wixil ex sb'ub'l.

12Mya jun wajq'oje sok ik'len weye',

qu'n ma'wtlo tzik'x wu'ne';

ex myaju' ntx'a'lti'j tk'u'j xjaw ti'ntib' wi'je',

qu'n ma'wtlo chin kub' ewane' twitz.

13¡Kuchaqa a pe'lota nwnaqila,

kyexi'x ntene' tuk'i'la,

14intoq qb'u'yi'n qib' tuk'i'la toj tja Dyos

q'uqlixi'xtoq qk'u'j te qib' kyi'ju' qyol

tej intoq qob'et kyxol xjal!

15¡Mixwitti' kynab'enju' wajq'oje ajtul kamik kyi'j!

¡Itz'qe'xwit ajkyb'ajx qoptz'aj toj jul!

qu'n majx atiju' taq'wixil toj kyanmi.

16Ayintzunwe' kchin kub'sale' te Dyos;

ate Qman Dyos kklol weye'.

17Chin kub'sale' tuk'i'l oq'el prim, qale ex qonik'an

ktzajel tb'i'ntzun tq'ojq'ojel nwi'tze'.

18Kchin tkla'ye' kyoj q'oj;

kkletel nchwinqlale' tu'n,

b'a'nqa txqan kyb'etju' wajq'oje.

19Aku' Dyos nkawin tejumajx,

ktzajel b'inweye' ex che kb'el tme'ssa'n,

qu'n mixti'x nkych'exb'e'n kye'lu kychwinqlal

ex mixti' tchi Dyos kye.

20In aq'pon kyq'ob' kyi'j kamiw;

min njapun kyol tziya'n kyu'n.

21Majxpetzun me's che yolin,

atzu'n kynab'l o'kxtzu' toka' ti'j q'oj.

Majx b'uninxi'xju' kyoj nnajb'en kyetwitz aseyt,

extzun ikyqe'ju' kse'n k'uẍtx'e'nb'il jqu'n kywitzte.

22Q'onkja tkyaqilju' nnik'xtu'na toj tq'ob' Qman Dyos,

qu'n ate kwab'alteya b'a'nxi'x;

lay taj tu'n tkub' tz'aqu' xjal b'a'n b'in te.

23Nman Dyos,

lay che kub' anq'in kyeju' b'yolxjal exqe' chalyol,

laype' japun nik'janju' kychwinqlal;

che kb'elex tz'aq tu'na toj muqb'il,

ayintzunwe' q'uqlokwe' nk'u'j ti'ja. Chiju' b'itzal.