1Toju' tq'ijlalil lu yab'ti Esekyiy b'a'nxi'x, ex xi' Isayiy t-sanjelal Dyos, tk'wal Amos, ka'yilte ex xitma'n te:
—Chi Qman Dyos xtma: Q'mankja mankb'il tyola kyeju' toj tjaya, qu'n kkyimela. Lay b'enta, chij te.
2Atzunte Esekyiy okxtmiltz'u'n twitz twitz tapi, ex kub'san te Qman Dyos kjalu:
3Nman Dyos nchin kub'sane' teya, na'ntzju'ya wajb'eb'le' ma japun ex ttxolilti'ju' xnb'inchaye' twitza, ma nb'inchaju'ye' ntzalaja ti'j, chij. Kub' oq'tzuntz b'a'nxi'x.
4Tchaq'tzun Qman Dyos te Isayiy
5tu'n t-xi'tl q'malte te Esekyiy kjalu: Matzaj tma'n Qman Dyos ja k'uluna' Dab'i ojtxi' tyajilb'ena kjalu:
Matxi' nb'iju'ye' tna'j Dyosa ex matxi' wile' ta'l twitza sel. K'anq'il o'lajoj ab'q'itla wu'ne'.
6Knkla'ya tuk'i'l tnam Jerusalen toj tq'ob'ju' nimaqkawil aj Asirya. Ayinwe' chin klolteju' nintnam lu, chiku'ya te, chi Qman Dyos.
7Xittzaq'we'n Isayiy te:
—A techlal ja'lu ktzajel tq'o'n Qman Dyos teya qa kjapumelju' tyol teya:
8Knb'incha'ye' tu'n tanjtzti'ju' tewan q'ij toju' lajoj sqit matxi' ku'tza' toj ttechb'ilq'ij Ajas, chij.
Anjtzun lajoj sqitun ti'ju' tewan q'ij matxi'toq ku'tz.
9Tej tb'anix Esekyiy teju' tyab'il, kub' ttz'ib'a'n b'itz lu:
10Matxi'toq kub' nximane' kjalu:
Chin xe'le' tojku' tb'anil nchwinqlale';
nchinx chq'o'ne' toj tkawb'il kamik
tzmax ajtpon b'aju' nchwinqlale'.
11Kub' nximane': Lay wiltle' Qman Dyos twitzju' tx'otx' lu,
mix-alo'tl junju' nanq'in twitz tx'otx'
okwit k'okyel nka'yi'ntle'.
12Nkub'xitu'n njaye', nelq'i'n weye',
naku'j kypach k'ik'lel.
Naku'j tchemoj jun chmolju' nchwinlale'.
nel jon ti'ju' chinb'ilte.
Nchin yajtiye' tu'na q'ijtl ex qonik'an.
13Nb'aj qonik'an wu'ne' nchin ẍch'ine' tu'n k'ixk'oj,
naku'j tok jun b'alun toqilkye nb'aqile'.
Nchin yajtiye' tu'na q'ijl ex q'onik'an.
14Chab'a nchin t'i'njneye' kse'nqe' pich' kolondrin,
nchin t'i'njneye' kse'nqe' paloms.
Nche sikti nwitze' ka'yb'ente twitz kya'j.
¡Nman Dyos, nchin yajtiye', chin ttzaq'wentza!
15¿Tixi'xti' tu'n txi' nma'ne' te,
ana'te xb'inchante?
Mixti'x noktl nwatle'
tu'n tpaju' k'ixk'oj wi'je'.
16Che anq'ilkye' klo'nqe' tu'n Qman Dyos,
ex chin anq'ilwe' kyuk'i'l kykyaqil ja'lu.
Matxi' tzaj tq'o'n jumajtla nchwinqlale', b'a'nqine' tu'na.
17Ka'nxlu nchin tzalajtle' tu'na te t-xel k'ixk'oj.
Matxi' chin tkola teju' tjul kamik,
qu'n makub' tnajsa'na tkyaqilju' wile'.
18Lay b'entjaw nima'nta kyu'n ate' toj muqb'il,
lay b'entjaw ajwali'na kyu'nju' kyimni,
lay b'ent kyayonju' nche'x toj jul
ti'ju' tyola njapun.
19O'qe'kxkye' itz'qe' che ajwalilteya,
kse'n nb'incha'ne' ja'lo.
Nche yolinju' manb'aj kye kyk'wal
ti'ju' tyola njapun tu'na.
20Atite Qman Dyos tzalu klol weye'.
Che qq'ajtzanxju' qchinab' arpa ex qoqe' b'itzan
toj tja Qman Dyos
toj tkyaqilju' nqanq'i'n, chiju' b'itz.
21Ojetoq txitma'n Isayiy tu'n tkub'incha'n jun q'a'nb'il ti'j iw tu'n tokq'o'n ti'ju' yab'il ti'j nimaqkawil, ex q'anet nimaqkawil tu'n.
22Ex ojetoq txitqani'n Esekyiy te Isayiy:
—¿Ti'tzun techlal k'elela' nnik'e' qa b'a'n tu'n nxi'ye' toj tja Qman Dyos? chij.
Who We AreWhat We EelieveWhat We Do
2025 by iamachristian.org,Inc All rights reserved.
