Is 49 - Mam Ostuncalco Bible

Spik'unte' tmajin Qman Dyos kye nimaqtnam

1Chin kyb'intze' tnam ate'qe'ye' ttzi ninnjab',

kq'ontzpe'ye' anb'il, nimaqtnam najchaq ta'qe'ye':

Ntxkete' tu'n Qman Dyos na'mxtoqpe' witz'jiye';

tzaj ttxko'nju' nb'iye'

tej antinxtoqe' toj t-xmilal ntxuye'.

2Okju' waq'e' tu'n te jun k'uẍtx'e'nb'il jqu'n twitzte,

nkub' tewa'ne' tjaq'ju' tq'ob',

nokye' tu'n te jun talsmaj ch'ut b'a'nxi'x

ex nxitk'u'ne' toju' tkb'el talsmaj.

3Tzaj tma'n weye': Israel, nmajina,

knyek'u'ye' wajwalile' nim toklen ti'ja, chij.

4Atzunwe' ojetoq kub' nximane' kjalu: mixti'x tajb'enju' waq'une' matxi' b'ent,

matxi' b'aj wipumale' ex mixti'xte xb'ent, nchije'.

Axxi'x toj tq'ob' te Qman Dyos ta' twitzlalil waq'unb'ene',

toj tq'ob' Qman Dyos ta'ju' tu'me'l t-xel.

5-6Matxi' nk'ame' woklene' twitz Qman Dyos,

ana'te wipumale'.

Ate Qman Dyos b'inchanweye' toj talb'il ntxuye'

tu'n wokye' te tmajen,

tu'n tanjtzkyi'j aj Israel tyajajil Jakob' tuk'i'l,

chij ikjalu: Mya o'kxte' tu'n toka te nmajine'

tu'n kyjaw jumajtlju' tyajajil Jakob'

ex tu'ntanjtzjumajtl kyi'ju' ẍe' kyej anq'in kyxol aj Israel;

k'okyelta te spik'un wu'ne' kye kykyaqil nimaqtnam,

tu'n tpon tiq'i'na kolb'il wu'ne'

tzmax mankb'il ttxa'n tx'otx', chij.

7Intma'n Qman Dyos kolol,

aju' Dyos xjan kye aj Israel,

teju' tnam matxi'xi'x tz'el ik'u'n,

aju' nnel ik'u'n kyu'n txqantl tnam,

matxi' tz'ok te majin k'a'yi'n kyeju' yajul, kjalu:

Ajtka'yinjtza kyu'n nimaqkawil ex kyu'n kyk'wal,

che jawil we' ex che b'elmeje twitza

qu'n ayine' Dyos Manb'aj xjan kye aj Israel,

njaw sk'onteya ex nche japun nyole', chij.

Tqanil tu'n tjaw B'inchet jumajtlju' tnam Jerusalen

8Chi Qman Dyos ntma'n:

Ulju' kmuj tu'n t-xinyek'u'ne' nxtalb'ile' teya, ex xintzaq'we'na;

ponju' q'ij te kolb'il, ex nkola.

Nkola tu'ntzun naq tu'nela

tu'n tkyaj b'entti'ju' nyole' tuk'i'lju' tnam,

tu'n tjaw b'inchet jumajtlju' tnam,

tu'n kyok te tajawju' tx'otx' kub'ni xitj,

9tu'n txitma'na kyeju' jpu'nqe': Kykyaje' tzaqpi'nqe'ye'.

atzu'n kyeju' ate' toj qxopin: Kyek'untz kyib'e'.

Kknetel kywa kyalu'ne' kytziyile kykyaqil b'e,

ex alkyeku' witz sji'l ktenb'ela' kwa kywakyixe'.

10Lay che naj tu'n we'yaj ex tu'n k'waj,

ex lay che b'aj tu'n q'ij ex tu'n kyaq,

qu'n k'u'jla'nqe' ex ẍaqlu'nqe' wu'ne',

ex che kxe'l wiq'i'ne' ja ta'qe' t-xiklil a'.

11Knb'incha'ye' jun b'e kywi' witz

ex che plansetelju' b'e wu'ne'.

12¡Kka'yinxpe'ye'! Najchaq ẍetzaja':

junjun toj tnayajkya'j, junjuntl tkub'exq'ij,

junjuntl toju' tnej tx'otx' Asuwan.

13¡Ẍch'ina tu'n tzalajb'il kya'j!

¡Tzalajxi'xa tx'otx'!

¡Che ẍch'ine' tu'n tzalajb'il, witz!

Qu'n matxi' tq'uqb'a Qman Dyos tk'u'ju' ttanam,

matxi' tzaj laqjtk'u'j ti'j toju' yajb'ilte.

14Intoq tma'n Syon:

Machin kyej tkolb'i'ne' Qman Dyos,

matzik' nna'le' tu'n Dyos nchin ajb'ene' te, chij.

15¿Ma ntzun ik'tna'l tal jun txub'aj tu'n

mujqa min tk'u'jla'ntl jun txub'aj tal?

Maskyepena' matzik' tna'l tu'nte jun txub'aj,

awe' lay tzik'kyna'le' wu'ne'.

16Majx tz'ib'a'n qe'kye' toj nq'ob'e',

majx na'nqe' nimaqttapiya wu'ne'.

17Ojqelxi'x kyelju' che jawil b'inchantetl kytaname'

kyekywitzju' e'kub' xitunkyeye';

matxi' che b'ajxkye' ẍexitunkyeye'.

18Ka'yinxpe'ya ti'jileya,

ka'yinxa se'n nkyb'u'yi'na' kyib' kykyaqil

ex xitanjtzkyi'j tk'etza.

Axx'ix, ayine' Dyos Manb'aj

ikyqe' kykyaqil kse'n u'wj k'okyel tq'o'na,

kse'n achb'il nok tq'o'n jun txin ajtmje.

19Kub'ni xitju' ttanama,

xitjni ex kub'ni naj;

laytzun kanunte' ttx'otx'a kyeju' che najal toj.

Najchaq ta'qekye' e'kub' xitunteya.

20Kxe'l kyma'n tk'wala t-xe t-ẍkyina

ju' tzpetniqe'toq toj twitza:

Naqch'i'nxi'xte' tx'otx' lu qe;

q'ontz txqantla tu'n qnajane' twitz, chechilo.

21Ktma'ntzuntza toj tk'u'ja:

¿Alkye saj q'onkye k'wal lu weye'?

Mixtoqna'ti'we' wal ex layxtoq chin nalane';

ojetoq chinx iq'i'ne' toj juntl tx'otx' ex najchaq,

¿alkye xch'isankye?

Ojetoq chin kyajq'o'ne' njunale',

¿jatzun ẍetzaja'? chilo.

22Chi Qman Dyos ntma'n:

Kche nq'a'ye' chaq'b'il kye nimaqtnam;

kxe'l nq'o'ne' jun yek'b'il kyeju' tnam

tu'n kytzaj kyiq'i'n tala chle'nqe' kyu'n,

ex tu'n ttzaj kyiq'i'n tala txin ti'j kyqul.

23Che okyelju' nimaqkawil te kymanb'il,

aye'tzu'n kymyal che xelka'yinkye.

Che b'elmeje twitza majx kb'el kyplaj twitz tx'otx',

ex k'elil kyleq'u'n quq ti'j tqana.

K'eleltzun tnik'tza qa ayine' Dyos Manb'aj,

ex min nel kych'ixawju' q'uqlok kyk'u'j wi'je', chi Dyos.

24¿Ma jaku'tzun b'ent tel iq'etju'

xkanb'et tu'n jun xjal kuw toj q'oj?

¿Mujqa jaku' b'ent ttzaqpaj jun xjal jpu'n toj tq'ob' jun kawil kuwxi'x?

25Atzunte Qman Dyos ntma'n qa okyi:

K'elel iq'etju' xkub'ti'j te jun xjal kuw,

ex k'elel iq'etju' xkub'ti'j tu'n kawil kuw.

Ayinwe' chin q'ojil kyi'ju' nche q'ojin ti'ja;

ayinku'we' chin klol kye tk'wala.

26Che okyel nchq'o'ne' nche yajun ti'ja tu'n t-xikych'yo'n kychib'jil

ex tu'n kykub' tx'ojti tu'n kychk'el, naku'xwitloj tu'n b'in.

Tu'ntzun telkynik' kykyaqilju' xjal

qa ayine' Dyos Manb'aj klolteya;

qa ayine' Nim wipumale' jak'uluna' Jakob', kolpilteya, chij.